“Kon ang Espirituwal nga mga Kasinatian Lahi gikan sa Unsay Inyong Gipaabot,” Liahona, Ago. 2024.
Mga Young Adult
Kon ang Espirituwal nga mga Kasinatian Lahi gikan sa Unsay Inyong Gipaabot
Tambag gikan sa akong mga magtutudlo sa pagpangandam alang sa templo nakapausab sa paagi sa akong paghunahuna mahitungod sa pagbati sa Espiritu.
Litrato sa Gilbert Arizona Temple ni Ronald Lee Enloe
Ang akong manghod nga babaye ug ako nagdungan sa pagdawat sa among tuga, mga pipila lang ka adlaw sa wala pa siya mobiya sa iyang misyon. Naghinam-hinam ko nga motambong sa templo uban kaniya, ug ako andam nga mohimo sa sunod nga lakang diha sa dalan sa pakigsaad.
Apan nianang adlaw, grabe kaayo ang akong mga emosyon. Hinapos na kadto sa ting-init. Usa ka mahagiton nga semester hapit na magsugod. Sa pagpaabot nga mobalik ngadto sa kolehiyo, mobiya sa akong pamilya, ug manamilit sa akong igsuong babaye, gibati nako ang kalit nga kaguol.
Ug bisan ang seremonya sa pagtuga maanindot, daghan kini og bag-ong impormasyon nga ikonsiderar. Gamay ra kaayo ang akong nasabtan ug andam na nga mobiya sa higayon nga mahuman ang sesyon.
Ang akong igsuong babaye adunay lahi nga kasinatian. Didto sa lawak sa celestial, kalma ug masusihon siyang nangutana sa akong mga ginikanan mahitungod sa pagtuga ug ingon og daghan og nasabtan kay kanako. Samtang, naglingkod ko nga naghilom nga walay ikasulti. Nakahinumdom ko nga nagpugong nga mohilak tungod sa kapakyas ug kaulaw tungod sa akong kasinatian nga lahi kaayo sa iyaha.
Sa makadiyot, gibati nako nga gitintal nga mobati og kalagot nga ako wala makaangkon og kasinatian nga akong gilaoman. Apan dayon nakahinumdom ko og duha ka piho nga butang nga gisulti sa akong mga magtutudlo sa pagpangandam alang sa templo kanako:
-
Ako dili gayod makasabot sa tanan nga nahitabo atol sa akong unang sesyon sa pagtuga. Sila misulti nako nga imbis mosulay sa pagsabot sa tanan nianang higayon, kinahanglan nga maningkamot ko nga motutok sa malinawon nga pagbati diha sa sulod sa templo.
-
Basin ako mobiya sa templo nga mobati nga gikapoy ug gikutasan sa espirituwal nga paagi. Ug OK ra kana.
Ang ilang maalamon nga mga pulong nakatabang nako nga mas makalma ug nahinumdoman gihapon nako paglabay sa katuigan. Nagtuo ko nga ang samang tambag makatabang nato samtang atong timbang-timbangon ang atong mga gilaoman mahitungod sa ubang espirituwal nga mga kasinatian, sa sulod ug sa gawas sa templo.
Ipahiuyon ang Inyong mga Gilaoman
Malipayon ko nga mosulti nga ganahan na ko nga motambong sa templo karon, ug ang akong pagsabot sa pagtuga milambo sa milabay nga pipila ka tuig. Apan nakasabot usab ako sa tinguha nga makabaton og piho nga mga gilaoman mahitungod sa espirituwal nga mga panghitabo, sama sa pagdawat sa inyong pagtuga o pag-adto sa misyon. Gani akong mamatikdan ang akong kaugalingon nga magpaabot og talagsaon nga “espirituwal nga kasinatian” matag higayon nga ako mobisita sa templo o mobasa sa akong mga kasulatan.
Apan ako nakakat-on nga ang kanunay nga pagbaton og talagsaon nga espirituwal nga mga kasinatian dili reyalistik. Pananglitan, ang pipila sa akong mga pagbisita sa templo nakapalamdag ug nakapabayaw, apan ang uban nakigbisog ko nga makapokus o magpabilin nga magmata.
Sama sa gipamatuod ni Elder Gary E. Stevenson sa Korum sa Napulog Duha ka Apostoles karong bag-o: “Ang esprituhanong mga butang dili mapugos. Kamo makaugmad og usa ka kinaiya ug usa ka palibot nga makadapit sa Espiritu, ug kamo makaandam sa inyong kaugalingon, apan kamo dili modiktar kon unsaon o kanus-a ang pagdasig moabot.”
Kon kamo napakyas sa pagdawat og pagpadayag o pagbati sa Espiritu sa bisan unsa nga rason, ania ang pipila ka pahinumdom nga nakatabang nako nga mobati nga nakakonektar ngadto sa Langitnong Amahan ug ni Jesukristo ug nagpadayon uban ang hugot nga pagtuo.
Hinumdomi Nga ang Espiritu Makigsulti sa Daghang Paagi
Samtang makapadasig nga makadungog mahitungod sa espirituwal nga mga kasinatian sa uban, usahay sayon nga mobati nga nahigawad kon ang atong mga kasinatian dili sama sa ubang mga tawo.
Ang pagtandi sa akong kasinatian sa templo ngadto sa akong igsuong babaye nakapawala sa akong kadasig. Tungod kay dili nako gusto nga kanang unang kasinatian makapugong nako nga makatagamtam sa mga panalangin sa pagsimba sa templo, kinahanglan nga mahunahunaon kong mohukom nga dili maguol sa mga kalainan sa unsay gibati ug nasabtan sa akong igsuong babaye ug nako nianang adlawa.
Tingali kamo nanghinaot nga kamo mohilak kon inyong mabati ang Espiritu. Tingali kamo nanghinaot nga dili ninyo buhaton! Tingali kamo mibati og kalit nga kasina sa dihang kamo nakadungog og mga istorya sa mga tawo kinsa adunay mapadayagon nga mga damgo ug mga panan-awon. Tingali wala kamo sukad makasinati og kainit sa inyong dughan (tan-awa sa Doktrina ug mga Pakigsaad 9:8). O tingali usa ka tawo miingon nga sila mibati sa Espiritu sa usa ka sitwasyon nga kamo wala mobati.
Ang maayong mga balita mao nga ang Espiritu mamulong ngari kanato sa daghang paagi. Kon ang inyong mga paagi lahi gikan sa uban, kana wala magpasabot nga sila sayop o nga ang Espiritu wala makigsulti kaninyo.
Samtang kita moduol ngadto sa Langitnong Amahan alang sa panabang, kita makakat-on unsaon sa pag-ila kon sa unsang paagi nga ang Espiritu makigsulti kanato ug sa mas hingpit makatagamtam sa atong personal nga espirituwal nga mga kasinatian. Miingon si Elder Ronald A. Rasband sa Korum sa Napulog Duha ka Apostoles, “Kita adunay sagradong responsibilidad nga magkat-on sa pag-ila [sa Espiritu Santo nga] impluwensiya diha sa atong kinabuhi ug molihok.”
Isulat ang Inyong Espirituwal nga mga Kasinatian
Usa ka paagi sa pag-ila sa impluwensya sa Espiritu mao ang pagsulat sa inyong espirituwal nga mga kasinatian. Bisan anaa sa pisikal nga journal, usa ka electronic note, o sa usa ka voice memo, ang pagsulat sa inyong positibo nga mga kasinatian mao ang usa ka gamhanan nga paagi nga dili lamang mahinumdom sa maayong mga butang nga inyong gibati apan usab mahimong mas maayo sa pag-ila kon sa unsa nga paagi ang Espiritu makigsulti kaninyo.
Kon wala kamo makahibalo asa magsugod, paningkamoti nga makahinumdom sa mga higayon sa dihang kamo mibati og kalinaw, pasalamat, kadasig, o hingpit nga kalipay. Si Elder Craig C. Christensen sa Seventy miingon: “Ang mapuno sa Espiritu Santo nagpasabot nga gipuno sa hingpit nga kalipay. Ug ang mapuno sa hingpit nga kalipay nagpasabot sa kapuno sa Espiritu Santo [tan-awa sa Mga Buhat 13:52; Mosiah 4:3].”
Kon buhaton ninyo kini, mahimo ninyong maamgohan nga kamo mibati sa Espiritu labaw pa kaysa inyong gihunahuna sa sinugdanan.
Himoang Prayoridad ang Sinsero nga Pagpakigsulti uban sa Dios
Tungod kay kita gisultihan sa pagtinguha ug pagpaabot og mga milagro ug personal nga pagpadayag (tan-awa sa Mateo 7:7–8), makapawala gayod og kadasig kon kita mobati nga wala makadawat bisan hain niini. Usahay ako makahunahuna ngano nga magpadayon ko sa pagpangutana sa Dios nga para nako Siya wala man motubag niini. Sa niini nga hunahuna, ako nahimong nagmatinguhaon ug masuktanon sa akong kinaiya ngadto Kaniya.
Apan ang mga kasulatan nagsulti nato, “Ayaw pagsulay sa pagtambag sa Ginoo, apan pangayo og tambag gikan kaniya” (Jacob 4:10). Nakamatikod ko og pagkausab sa dihang ako mihunong sa pagtan-aw sa pagpadayag nga mao lamang ang nag-aghat nako sa pag-ampo ug imbis nga himoong prayoridad ang sinsero nga pagpakigsulti sa Langitnong Amahan. Gipasabot nako ang akong gibati ngadto Kaniya, mihulagway sa akong mga kabalaka, mipadayag sa akong pasalamat, ug dayon malumo nga mihangyo sa mga butang nga kulang nako. Gibati nako ang tinuod nga kasuod sa Dios sa dihang ako mihunong sa pagtan-aw Kaniya isip usa ka “cosmic vending machine,” sama sa gipasabot ni Elder D. Todd Christofferson sa Korum sa Napulog Duha ka Apostoles.
Ug bisan ako dili kanunay makadawat og diha-diha o klaro nga tubag, nasayod ako nga Siya naminaw kanunay kanako. Ug kana igo na alang kanako nga magpadayon.
Sunda ang Naggiya nga mga Baroganan
Kon magtinguha sa Espiritu ug personal nga pagpadayag, importante ang pagbuhat sulod sa eksakto nga basehanan. Nagkutlo sa Isangyaw ang Akong Ebanghelyo, si Elder Stevenson miingon: “‘Ang pagbaton sa giya sa Espiritu Santo sa inyong kinabuhi nagkinahanglan og espirituhanong buhat. Kini nga paningkamot naglakip og kinasingkasing nga pag-ampo ug makanunayon nga pagtuon sa kasulatan. Naglakip usab kini sa pagtuman sa inyong mga pakigsaad ug sa mga sugo sa Dios. … Kini naglakip sa takos nga pag-ambit sa sakramento sa matag semana’ [Isangyaw ang Akong Ebanghelyo, 101].”
Dayon mihatag siya og dugang upat ka makagiya nga mga baroganan alang sa “pagdapit ug pag-ila sa mga pag-aghat sa Espiritu”:
-
Barog sa Balaan nga mga Dapit: “Ang atong mga templo ug mga panimalay mao ang labing sagrado niining gipahinungod nga mga dapit.”
-
Barog uban sa Balaan nga mga Tawo: “Kon kamo naglaom sa pagbati sa Espiritu, uban sa mga tawo diin ang Espiritu daling makig-uban.”
-
Pagpamatuod sa Balaan nga mga Kamatuoran: “Ang Maghuhupay kanunayng mopakigbahin sa Iyang tingog kon kita mopamatuod gamit ang atong tingog.”
-
Paminaw sa Balaang Espiritu: “Siya mamulong sa pino, hinay nga tingog. … Pangita og hilom nga dapit, usa ka balaan nga dapit diin kamo mahimong magtinguha sa pagdawat og direksiyon gikan sa Espiritu.”
Bisan og kini dili madramahon o mahitabo sa paagi nga inyong gipaabot, ang Espiritu mouban o mogiya kaninyo kon buhaton ninyo kini nga mga butang.
Usa ka Bag-ong Panglantaw
Sama sa gipahinumdom kanako sa akong mga magtutudlo sa pagpangandam alang sa templo, OK ra nga dili makasabot sa hingpit sa ebanghelyo o, sa akong bahin, sa templo. Ug usahay ang atong espirituwal nga tinguha tingali mohatag nato og gamay nga kaluya. Kini mao ang mga higayon nga sama niini nga makatabang nato nga makat-on og pailob ug pagsusi pag-usab sa atong relasyon uban sa Langitnong Amahan ug sa Espiritu Santo.
Nakamatikod ko nga kon gamiton kadto nga mga pagbati aron ako maghinay-hinay, molihok inubanan sa hugot nga pagtuo, ug mangayo og panabang sa Langitnong Amahan, ang akong mga gipaabot nga espirituwal nga mga kasinatian nahimong matinud-anon imbis sa kahigwaos ug kapahulayan imbis sa kapakyasan. Niini nga mga higayon, gibati nako ang gugma sa Langitnong Amahan alang nako. Ug samtang ako maghulat alang sa mga tubag, kana nga gugma ingon og igo na.