Digital Lamang: Mga Young Adult
Unsa Pa ang Akong Makat-onan gikan sa Basahon ni Mormon? Daghan Kaayo!
Nagtuo ko nga nahibalo na ko sa tanan bahin sa Basahon ni Mormon—sayop diay ko.
Atol sa akong misyon didto sa Kentucky, nagtudlo ko sa daghang tawo bahin sa Basahon ni Mormon. Nakakita ko og mga tawo nga wala modawat niini ug ang uban midawat niini sa hingpit.
Ako usab adunay makapausab sa kinabuhi nga kasinatian pinaagi niini nga basahon.
Tungod sa Basahon ni Mormon, nakaila ko ni Jesukristo, “ang Ginoong Makagagahom” (Mosiah 3:5). Nakat-onan nako ang Iyang mahangtorong sakripisyo alang nako, ang walay utlanan nga gahom sa Iyang grasya, ug ang Iyang walay kinutoban nga gugma ug sa Langitnong Amahan alang kanatong tanan.
Sa dihang mipauli na ko gikan sa akong misyon, nagtuo ko nga nahibaloan na nako ang tanan nga angay nakong mahibaloan bahin sa Basahon ni Mormon. Wala gayod nako kana giangkon sa dayag, siyempre—apan kon tan-awon og balik, kini nga kinaiya nakaimpluwensya sa paagi sa akong pagtagad sa mga kasulatan human sa akong misyon.
Ug dili sa maayong paagi.
Gikan sa Nagdilaab nga Pagpamatuod ngadto sa Kakompiyansa
Sa dihang nagtuon ko sa mga kasulatan, kanunay nakong makita ang akong kaugalingon nga nagsige og balikbalik ngadto sa pamilyar nga mga tudling—kasagaran aron mahinumdom ug mapamatud-an pag-usab ang mga butang nga akong nakat-onan sauna. Naningkamot gyod ko nga kanunayng mamalandong sa mga kasulatan aron makakat-on og bag-ong butang, apan wala gyod ko mobati nga ako adunay bag-ong mga nadiskobrehan. Ang kadasig nga anaa nako kaniadto sa Basahon ni Mormon misugod sa pagkunhod.
Wala madugay human sa akong pagpauli, nagsugod usab ko og bag-ong trabaho, ug ang akong oras sa pagtuon sa kasulatan mikunhod gikan sa usa ka oras nga pagtuon didto sa akong misyon ngadto sa 30 minutos. Dayon nakadawat ko og calling, ug kadtong 30 minutos nahimong 15. Dayon sa ting-init nagserbisyo ko isip counselor sa FSY. Ug akong gigamit ang kadaghanan sa akong oras sa pagtuon sa pagrebyo og pipila ka bersikulo nga balikbalik nakong gipakigbahin ngadto sa kabatan-onan kada semana.
Ako nasayod nga ang Langitnong Amahan ganahan sa bisan unsa nga oras nga akong gigahin sa pagtuon sa Iyang pulong. Apan, sa prangkang pagkasulti, wala ko mobati nga ako nagsunod sa pagdapit ni Nephi sa “pagbusog sa mga pulong ni Kristo” (2 Nephi 32:3). Akong gikombinsir ang akong kaugalingon nga wala nay bisan unsang butang nga bag-o nga makat-onan. Imbes magbusog sa Basahon ni Mormon, talagsa na lang ko mobasa.
Kini nga kinaiya sa kakompiyansa nagpadayon ngadto sa akong unang semester sa Brigham Young University, atol sa akong pagtambong sa klase sa Basahon ni Mormon. Sa unang adlaw, ang akong propesor mibarog sa atubangan sa among klase. Mitan-aw namo sa mahigalaong paagi apan sa dulot nga tinan-awan, siya miingon, “Ang akong tumong niini nga klase mao ang pagkombinser ninyo nga kamo walay nahibaloan sa Basahon ni Mormon—wala gayod.”
Naintriga ko niini, apan morag maoy sagad isulti sa istrikto nga mga propesor aron makuha ang imong pagtagad imbes aktuwal nga saad.
Salamat na lang, sayop diay kaayo ko.
Usa ka Makabag-o sa Panglantaw
Isip kabahin sa klase, ang akong propesor misangon namo sa pagbasa sa Basahon ni Mormon. Dili lang moabli niini ug mopakli sa mga pulong o mosulay og tabon sa usa ka kapitulo aron mahinumdoman ang mao ra gihapon nga istorya nga atong nabasa sa minilyon ka higayon.
Siya gusto nga kami mobasa gayod.
Pananglitan, kami iyang gitudloan kon sa unsang paagi nga ang orihinal nga manuskrito sa Basahon ni Mormon wala maglakip og mga panulbok [punctuation]—ug gipadugangan niya namo og panulbok [punctuation] ang taas, makalibog nga tudling sa Alma 13 aron tudloan kami bahin sa kalainan nga mahimo sa mga comma ug mga tuldok. Gipabasa niya kami og usa ka bersikulo nga nagtupad og 1828 Webster nga diksyonaryo, mangita sa mahinungdanong mga pulong nga lahi kaayo og mga kahulogan kaysa akong unang gituohan.
Ang klase mihagit sa daghan nakong nag-unang mga gituohan bahin sa kon unsa gayod ang Basahon ni Mormon. Wala gyod ko makamatngon, pananglitan, nga si Nephi misulat sa 1 Nephi mga katuigan human nga siya ug ang iyang pamilya mipanaw ngadto sa gisaad nga yuta (tan-awa sa 1 Nephi 9:1–5; 2 Nephi 5:28–31).
Nadiskobrehan usab nako kon unsa ka daghan sa dagkong mga sayop sa kultura sa mga Nephite nga makapahingangha nga kaparehas sa mga hagit nga giatubang sa atong kaugalingong mga kultura karon.
Akong nasabtan nga ang mainampingon, mahunahunaon nga mga mensahe nga gitisok ni Mormon, ni Moroni, ug sa uban pa ngari kanato sa pihong paagi—ug unsa sila gayod ka matinguhaon nga kita dili madala sa pagkawalay pagsalig ug pagduhaduha sa kalibotan.
Si Presidente Russell M. Nelson nagpamatuod nga “ang Basahon ni Mormon tinuod gayod nga pulong sa Dios. Naglangkob kini sa mga tubag sa labing importante nga mga pangutana sa kinabuhi. Nagtudlo kini sa doktrina ni Kristo. Mipalapad ug mipatin-aw kini sa daghang ‘yano ug bililhon’ [tan-awa sa 1 Nephi 13:29–33] nga mga kamatuoran nga nawagtang sa mga siglo ug sa daghang hubad sa Biblia.
“Ang Basahon ni Mormon naghatag sa kahingpitan sa labing masaligon nga pagsabot sa Pag-ula ni Jesukristo nga makaplagan bisan asa.”1
Ang akong tibuok panglantaw ug pagpamatuod bahin niini nga basahon nagsugod sa pagkausab samtang namalandong ko niini nga mga kamatuoran.
Sa Kanunay Adunay Daghan Pa nga angayng Makat-onan
Pinaagi sa tinuoray nga pagbusog sa mga pulong niini, akong nadiskobrehan nga ang Basahon ni Mormon nagpadayag kon si kinsa si Jesukristo—dili lang sa doktrina, apan sa personal ug kasuod. Ang basahon nagdala sa Iyang pangalan sa matag pahina. Usa kini ka malahutayon nga rekord nga nagpamatuod nga Siya wala mahikalimot sa Iyang mga tawo sa pakigsaad ug Siya dili gayod.
Si Presidente Nelson mitudlo usab: “Adunay impluwensyal kaayong panghitabo kon ang usa ka anak sa Dios magtinguha og dugang nga kahibalo bahin Kaniya ug sa Iyang Pinalangga nga Anak. Walay laing dapit diin kana nga mga kamatuoran mas tin-aw nga gitudlo ug sa impluwensyal nga paagi kay sa diha sa Basahon ni Mormon.”2
Wala matubag ang tanang pangutana sa akong kinabuhi. Apan akong nasabtan nga wala pa diay nako makat-oni ang tanan nga angayng mahibaloan bahin sa Basahon ni Mormon gikan sa akong misyon—sa kanunay adunay daghan pa nga angayng makat-onan ug madugang sa atong hugot nga pagtuo.
Ang atong bisi nga mga eskedyul mao ang makapasayon nga mahimong kompiyansa sa atong pagtuon sa kasulatan. Magtuo dayon kita nga nakahibalo na kita sa tanan nga angayng mahibaloan. Apan akong nahibaloan nga ang Basahon ni Mormon mahimong magpadayon sa paghatag nato og daghan pa kaayo. Kon gusto ninyo nga mabag-o ang inyong panglantaw bahin sa mga kasulatan, himoang prayoridad ang pagtuon. Ang pagbaton og bukas nga kasingkasing ug hunahuna sa pagpalig-on sa inyong pagkakabig ngadto ni Jesukristo ug sa pagpalambo sa inyong kahibalo makatabang ninyo nga tinuoray nga “[mag]busog” sa pulong sa Dios. Nahitabo kini kanako.