“Pangita nga Makugihon ug Kamo Makakita,” Liahona. 2024.
Pangita nga Makugihon ug Kamo Makakita
Ang Ginoo mipadayag kon unsaon nga makapangita kita og kamatuoran ug direksiyon sa atong kinabuhi.
Sa dihang ang akong asawa, si Regina, ug ako mipauli human sa pagserbisyo didto sa Angola Luanda Mission gikan niadtong 2016 hangtod sa 2019, gikinahanglan namong mohimo og importante nga desisyon. Gibaligya namo ang among balay sa wala pa ang among misyon. Usa ka tuig human sa among pagpauli, gikinahanglan namong magpili kon magpalit o mangabang og balay. Unsaon namo pagpili kon unsa ang husto para namo?
Kini nga matang sa desisyon maoy usa sa daghang mga tahas, mga kalihokan, ug mga kabalaka sa inadlaw nga kinabuhi nga moabot kanatong tanan. Usahay, makapalipat kini kanato sa mahimayaong mga panalangin ug mga pribilihiyo nga ang gipahiuli nga ebanghelyo ni Jesukristo lamang mao ang makatanyag kanato. Sa daghang mga pasalig ug mga responsibilidad nga atong giatubang, mahimong mahagiton ang pagkahibalo kon unsa ang tinuod ug asa ang direksiyon nga atong sundon. Makapahimo kini kanato nga kalit nga mobati nga nabug-atan og maayo sa dagkong mga panginahanglan.
Salamat na lang, wala kita pasagdi sa atong mahigugmaong Amahan sa Langit nga mag-inusara sa pagpangita kon unsa ang tinuod o kon unsa ang atong buhaton.
Ang Tinubdan sa Tanang Kamatuoran
Sa wala pa mobiya niini nga kalibotan, ang atong Manluluwas, si Jesukristo, misaad sa Iyang mga disipulo nga ipadala sa Amahan ang Manlalaban, o ang Espiritu Santo, aron mopanalangin kanila. Ang Manlalaban, si Jesus miingon, “magtudlo ug magpahinumdom kaninyo sa tanan nga akong gisulti kaninyo” (Juan 14:26).
Ang mahinungdanon nga tahas sa Espritu Santo mao ang pagpadayag sa kamatuoran (tan-awa sa Juan 16:13). Ang atong Langitnong Amahan mao ang tinubdan sa tanang gipadayag nga kamatuoran, moabot man kini pinaagi sa mga propeta, mga manalagna, ug mga tigpadayag o ngari kanato sa tinagsatagsa pinaagi sa Espiritu Santo. Samtang magtinguha kita sa pagpakig-uban sa Espiritu Santo, ang atong Langitnong Amahan mogiya kanato bisan pa sa labing mahagiton nga mga panahon.
Pangayo, Pangita, ug Panuktok
Tungod kay gusto sa atong Langitnong Amahan nga modasig, motudlo, mohatag og instruksiyon, ug mopalig-on nato, gidapit kita nga “pangayo ug kamo hatagan; pangita ug kamo makakaplag; panuktok ug ang pultahan ablihan alang kaninyo” (Mateo 7:7; tan-awa usab sa Lucas 11:9; 3 Nephi 14:7).
Sa dihang nadungog ni Nephi ang mga pulong sa iyang amahan, si Lehi, mahitungod sa panan-awon ni Lehi sa kahoy sa kinabuhi, miingon si Nephi nga siya “matinguhaon usab nga unta ako makakita, ug makadungog, ug masayod niini nga mga butang, pinaagi sa gahom sa Espiritu Santo, diin mao ang gasa sa Dios ngadto sa tanan niadto kinsa sa makugihon nga paagi mangita kaniya,” (1 Nephi 10:17).
Ang pagpangita sa kamatuoran nanginahanglan og kakugi. Kon kita makugihon, maningkamot kita sa bug-os, sinsero, ug makusganong paagi aron masayod sa kamatuoran ug sa kabubut-on sa Ginoo alang sa atong kinabuhi. Ang kakugi sa pagpangita sa kamatuoran gikan sa Ginoo makapaduol kanato ngadto Kaniya sa tanang mga lakang sa atong kinabuhi.
Si Propeta Joseph Smith nakakat-on sa sayong bahin sa iyang kinabuhi nga ang usa sa labing epektibo nga mga paagi sa pagpangita sa kamatuoran mao ang matinud-anon nga pagpangita og mga tubag sa mga pangutana (tan-awa sa Joseph Smith—Kasaysayan 1:10, 18). Mahimo kitang mangutana sa mosunod nga mga pangutana samtang mangita sa kamatuoran. Ang mga tubag magpakita og usa ka sundanan nga atong masunod aron mahibalo sa kamatuoran.
Kinsa man ang atong Duolon alang sa Kamatuoran?
Sa kataposang bahin sa Basahon ni Mormon, si propeta Moroni nagdapit sa tanan nga mangutana sa Dios sa kinasingkasing, uban sa tinuod nga katuyoan ug pagtuo diha kang Kristo, “kon kini nga mga butang dili ba tinuod.” Si Moroni nagpamatuod nga ang Dios “mopakita sa kamatuoran sa [Basahon ni Mormon] nganha kaninyo, pinaagi sa gahom sa Espiritu Santo. Ug pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang” (Moroni 10:4–5).
Ang Dios, nga atong Mahangturong Amahan, nag-establisar og usa ka praktikal ug daling mapuslan nga paagi nga ang Iyang mga anak makapangutana Kaniya (tan-awa sa Santiago 1:5) ug makapaduol ngadto Kaniya kada adlaw, kada oras—gani sa tanan nga panahon. Kining yano apan gamhanan nga paagi mao ang pag-ampo.
Ang mga pagtulon-an ni Alma ngadto sa iyang anak nga lalaki nga si Helaman hingpit nga haom kanato: “Pangamuyo ngadto sa Dios alang sa tanan nimo nga kabuhian.” Sa “tanan nimo nga mga buluhaton … ug bisan asa ikaw padulong … , himoa nga ang tanan nimo nga mga hunahuna ipunting ngadto sa Ginoo; oo, himoa nga ang tanan nga mga pagbati sa imong kasingkasing ibutang diha sa Ginoo sa kahangtoran.” (Alma 37:36). Si Alma usab mitudlo, “Pagpakigtambag sa Ginoo sa tanan nimo nga buhaton, ug siya moagak kanimo alang sa kaayohan” (Alma 37:37). Wala kita magkinahanglan og piho nga oras o dapit aron mag-ampo. Bisan tuod dili kita kanunay nga makahimo sa pag-ampo sa kusog nga tingog, kanunay kita nga makahimo sa pag-ampo sulod sa atong kasingkasing (tan-awa sa Alma 34:27).
Ang mga tubag nga atong madawat sa pag-ampo tingali dili mao kanunay ang atong gilaoman. Usahay, tingali masukwahi kini sa atong kagustohan. Ang atong mga pag-ampo mahimo usab nga mas dugay nga matubag kay sa atong gipangandoy. Usahay gani tubagon kini sa kahilom sa taas nga panahon. Apan ang Langitnong Amahan manggihunahunaon sa atong mga panginahanglan. Ang Iyang mga tubag kanunay nga maayo alang kanato. Kinahanglang lang kitang magpadayon inubanan sa hugot nga pagtuo ni Jesukristo. (Tan-awa sa Lucas 11:9–13.)1
Ang atong Manluluwas ug Manunubos namahayag nga dili gayod kita makaabot sa Langitnong Amahan gawas lang kon kini pinaagi Kaniya. “Ako ang dalan, ang kamatuoran, ug ang kinabuhi,” miingon si Jesus. “Walay bisan kinsa nga makaadto sa Amahan, gawas kon pinaagi kanako” (Juan 14:6). Mowagtang kini sa bisan unsang uban pa nga alternatibo, og gani sa bisan unsa nga babag, sa atong pagpakigsulti sa Dios. Mao kini ang hinungdan nga ang atong tanang pag-ampo, mga pakigpulong, mga pagpamatuod, mga klase, ug ang daghan pa kaayong ubang butang nga atong gibuhat—sa simbahan, sa panimalay uban sa atong mga pamilya, o sa atong kaugalingon—gibuhat pinaagi sa ngalan ni Jesukristo.
Unsa man ang Atong Angay nga Kinaiya?
Aron makakaplag sa kamatuoran, kinahanglan nga sinsero kita ug adunay tinuod nga mga katuyoan. Kon kita mapainubsanon nga motawag sa Langitnong Amahan, atong gihimong andam ang atong kaugalingon nga molihok sumala sa mga tubag nga atong madawat ug mopalambo sa atong kapasidad sa pagbuhat sa ingon.
Ang pagkasinsero ug bug-os nga katuyoan moaghat kanato sa pagbuhat sa mga butang nga ipabuhat sa Langitnong Amahan, dili kon unsa ang gusto natong buhaton. Klaro natong mapakita sa Langitnong Amahan ang atong pagsalig Kaniya kon kita “manunuton, maaghop, mapainubsanon, mapailobon, puno sa gugma, mauyonon sa pagtugyan sa tanan nga mga butang diin ang Ginoo makakita nga angay ipahamtang nganha [kanato]” (Mosiah 3:19). Pinaagi niini nga mga hiyas, makasabot kita ug mosalig nga ang Langitnong Amahan kanunay nga mohimo kon unsa ang mas maayo alang kanato.
Hulagway pinaagi ni Lee Michael Ragsdale
Sa Unsang Paagi Moabot ang mga Tubag?
Sa paghukom kon mopalit o mag-abang ba og balay, ang akong asawa ug ako nag-ampo, namalandong, ug naghisgot og daghan mahitungod niini. Sa kataposan, ang pagbati miabot sa among hunahuna ug kasingkasing nga dili mi angay mopalit og balay. Misunod kami pinaagi sa hugot nga pagtuo sumala sa tubag nga among nadawat, wala mahibalo kon unsa ang hapit na mahitabo sa among kinabuhi.
Mga 18 ka bulan human niadto, pagka Abril 2022, gitawag ko isip Kinatibuk-ang Authority Seventy. Human sa Abril 2022 nga kinatibuk-ang komperensiya, tulo na lang ka semana ang among pagpangandam aron mobiya sa Brazil alang sa among unang buluhaton. Ang pagpuyo sa inabangan nga balay mas nakapasayon sa proseso sa pagbalhin og pinuy-anan. Karon, tataw nga nakita namo ni Regina nga ang Ginoo migiya kanamo sa among mga desisyon.
Si Nephi usab nakadawat sumala sa iyang tinguha. Pinaagi sa makugihong pagpangita sa kamatuoran ug sa pagtuo ug pagsalig nga ang Langitnong Amahan mopadayag sa kamatuoran ngadto kaniya, napanalanginan si Nephi aron makakita sa mga butang nga nakita sa iyang amahan. Nakita niya ang kahoy sa kinabuhi, nga nagrepresentar sa gugma sa Dios—ang gugma nga “labing madanihon sa tanan nga mga butang” ug “ang labing hingpit nga kalipay ngadto sa kalag” (1 Nephi 11: 22, 23).
Pinaagi sa Espiritu Santo, ang Langitnong Amahan nagpadayag og kamatuoran nga mapuslan sa tanan Niyang mga anak. Ang Ginoo mipadayag pinaagi kang Propeta Joseph Smith nga ang Espiritu Santo mahimong mosulti ngadto sa atong mga hunahuna ug sa atong mga kasingkasing (tan-awa sa Doktrina ug mga Pakigsaad 8:2), “mitandog … sa [atong] mga pagbati” (Doktrina ug mga Pakigsaad 128:1), mohimo sa [atong dughan nga moinit diha sulod [kanato];” (Doktrina ug mga Pakigsaad 9:8), mopuno sa [atong] kalag uban sa hingpit nga kalipay; molamdag sa atong panumduman, o mosulti og kalinaw sa atong nahasol nga kasingkasing (tan-awa sa Doktrina ug mga Pakigsaad 11:13; 6:14–15, 22–23).
Mopamatuod ko nga ang kamatuoran sa Dios moiway sa mga pagduda ug kahadlok ug molig-on sa atong mga pagpamatuod. Uban ni Nephi, ako mopahayag, “Kay siya nga sa makugihon nga paagi mangita makakaplag” (1 Nephi 10:19). Ang Dios mopadayag sa kamatuoran kon kita makugihong mangita niini, kay “gantihan Niya ang nangita Kaniya” (Mga Hebreo 11:6). Ug buhaton kini Niya sa tataw nga paagi nga dili kini magbilin og pagduda nga ang Iyang kamot nagagiya sa atong kinabuhi.