“Ang Akong Mensahe gikan sa Ginoo,” Liahona, Ene. 2024.
Mga Hulagway sa Hugot nga Pagtuo
Ang Akong Mensahe gikan sa Ginoo
Nakakat-on ko nga ang pagtudlo gamit ang Basahon ni Mormon usa ka maayong paagi sa pagkaplag og pagpamatuod mahitungod niini.
Mga litrato pinaagi ni Leslie Nilsson
Niadtong 1993, tulo ka adlaw human ko mobalhin ngadto sa Polokwane, sa amihanang South Africa, adunay nanuktok sa akong pultahan. Sa dihang giablihan ko kini, dihay nagbarog nga mga misyonaryo sa Ang Simbahan ni Jesukristo sa mga Santos sa Ulahing mga Adlaw.
Nagdako ko nga relihiyoso kaayo, ug ang akong pamilya kanunay nga nagpasidaan nako nga magpalayo sa mga misyonaryo. Apan morag buotan sila ug ganahan kong maghisgot mahitungod sa relihiyon, mao nga gipasulod nako sila sa balay.
Human sa usa ka maanindot kaayo nga panag-istoryahanay, misulti sila nako, “Mahimo bang hatagan ka namo og Basahon ni Mormon?”
“Hulat lang kadali,” mitubag ko. “Morag duna ko ana.”
Sa dihang gipakita nako ang akong kopya ngadto nila, nahangangha sila. Gipasabot nako nga didto sa siyudad sa Cape Town diin ko nagdako daghang tuig na ang milabay, ang mga misyonaryo mihatag nako og usa ka Basahon ni Mormon atol sa usa ka pagsundayag. Gitipigan nako kini, sa matag karon ug unya mopakli ko sa mga pahina niini.
Human sa among pagsultihanay, gidapit nako ang mga misyonaryo nga mobalik. Nagdako ko sa lahi nga simbahan, hinuon, kon diin ang akong ama-ama usa ka ministro. Ang paghunahuna nga bunyagan og usab nahimong usa sa mga babag sa akong pagkakabig. Bisan pa niana, nagsugod ko sa pagtambong sa gamay nga branch sa Simbahan. Mga usa ka tuig ug tunga, ang presidente sa branch mitawag nako sa iyang opisina.
“Gusto Namo nga Makaangkon Ka og Pagpamatuod”
“David, gusto kong mohatag nimo og usa ka hagit,” miingon ang presidente sa branch. “Gusto gyod namo nga makaangkon ka og pagpamatuod sa Basahon ni Mormon. Gibati nako nga mahimo nimo kana kon ako kang tawagon sa pagtudlo sa Doktrina sa Ebanghelyo. Nagtudlo na ikaw sa usa ka unibersidad, ug dili ka mahadlok nga magbarog atubangan sa mga tawo.”
Karon, ang mga magtutudlo kinahanglan nga mga miyembro sa Simbahan.1 Apan kaniadto, ang presidente sa branch nadasig sa paghangyo nako nga motudlo. Mapasalamaton ako niadto.
“OK,” miingon ko.
Matag Sabado sa gabii tun-an nako ang leksiyon nga detalyado kaayo aron masabtan nako kini, mahibaloan, ug makasinati sa mga estorya ug sa mga tawo sa Basahon ni Mormon. Para nako, ang pagtudlo gikan sa Basahon ni Mormon usa ka maayong paagi sa pagkaplag og pagpamatuod mahitungod niini.
Usa ka Dominggo, human sa akong pagtudlo sa mga usa ka tuig, ang presidente sa misyon gikan sa Pretoria miabot alang sa usa ka komperensiya ug mitambong sa akong klase sa Sunday School.
“Salamat, Brother Baxter,” miingon siya pagkahuman. “Nindot kadto nga leksiyon. Taga diin ka?”
Sa dihang gisultihan nako siya nga Cape Town, nangutana siya kon unsa nga ward ang akong gitambongan.
“Wala koy ward nga gitambongan.”
“Unsay gipasabot nimo?” nangutana siya.
“Usa ako sa inyong gitawag nga Hentil?” Miingon ko. “Dili ko miyembro sa Simbahan.”
Nangluspad siya ug midali sa pag-adto sa presidente sa branch.
“Imong gipatudlo sa kasulatan ang usa ka dili miyembro?” nangutana niya ang presidente sa misyon.
“Nan, bati ba ang iyang pagtudlo?”
“Dili.”
“Nakadasig ba siya?”
“Oo.”
“Nagtudlo ba siya sa husto nga doktrina?
“Oo.”
Gitugotan ko nila nga magpadayon sa pagtudlo. Paglabay sa pipila ka bulan, gibisita nako ang akong pamilya didto sa Cape Town alang sa bakasyon sa Pasko. Samtang didto ko, miingon ang akong mama nga mobiya siya sa iyang simbahan human mamatay ang akong ama-ama. Human niadtong gutloa mismo, ang Ginoo mitabang nako nga mobati nga gawasnon sa tanang kahasol nga akong gihambin tungod sa pagkamaunongon ngadto sa akong inahan ug sa simbahan diin kon nagdako.
Sa dihang mipauli ako, akong gitawagan ang presidente sa branch.
“Gusto kong magpabunyag ugma,” gisultihan nako siya.
“David, sigurado ka?”
“Sigurado kaayo,” miingon ko. “Nakadawat ko og mensahe gikan sa Ginoo.”
“Aduna Koy Ihatag Nimo”
Sa dihang gisultihan nako ang akong tinuod nga amahan nga nahimo kong miyembro sa Ang Simbahan ni Jesukristo sa mga Santos sa Ulahing mga Adlaw, wala ko makasabot nganong kalmado kaayo siya.
“Sultihan ko ikaw og gamay bahin sa akong kasaysayan,” miingon siya.
Ang akong amahan, kinsa wala gayod makig-istorya nako mahitungod sa relihiyon, misulti nako nga isip usa ka batan-ong lalaki, nakatambong siya sa Cumorah Ward sa Simbahan didto sa Cape Town. Nakadula siya sa basketball team sa ward. Nakahimo siya og daghang suod nga mga higala kinsa mga Santos sa Ulahing mga Adlaw. Usa sa iyang labing suod nga mga higala usa ka misyonaryo kinsa, human sa iyang misyon, namatay didto sa Vietnam.
Kon wala pa unta mawala sa akong papa kadto nga higala, tingali nagpasakop na siya sa Simbahan. Lahi ra unta ang tibuok nga istorya sa iyang kinabuhi. Daghang tuig ang milabay, dako gihapon ang iyang pagtahod sa mga Santos sa Ulahing mga Adlaw. Wala siyay giapilan nga bisan unsa nga relihiyon, apan suportado kaayo siya sa akong desisyon nga magpasakop sa Simbahan.
Pila ka bulan human sa pagkamatay sa akong ama-ama, gisultihan nako ang akong mama bahin sa akong bunyag. Dili maayo ang resulta. Bisan pa niana, sa dihang miadto ko sa Netherlands aron sa pagbisita sa Dutch nga mga sakop sa pamilya sa habig sa akong mama, akong gipakigbahin ang akong pagkakabig ngadto nila. Mao kadtong higayona nga nahimamat nako ang laing koneksyon sa pamilya ngadto sa Simbahan.
Atol sa akong pagbisita, miduol nako ang akong uyoan. “Naa koy ihatag nimo,” miingon siya. Dayon gihatagan ko niya sa unang edisyon sa Basahon ni Mormon sa Dutch, nga gimantala niadtong 1890.
“Gipanag-iya kini sa atong pamilya dugay na kaayo,” miingon siya. “Gusto ko nga imo na kini.”
Kining duha ka pamilya nga mga koneksiyon sa Simbahan nakahupay kaayo nako. Karon, gipangga ko kana nga Basahon ni Mormon sa Dutch. Nagpahinumdom kini kanako sa unang mga misyonaryo nga mibisita nako. Nagpahinumdom kini nako kon unsa kaimportante ang pagtudlo sa Basahon ni Mormon ngadto sa akong pagkakabig. Nagpahinumdom kini kanako sa pagtahod sa akong namatay na nga amahan alang sa Simbahan ug nga ang uban sa akong mga kagikan midawat sa ebanghelyo ni Jesukristo.
Nagpahinumdom usab kini kanako nga ang Basahon ni Mormon sa tinuoray adunay gahom sa pagpamatuod ngadto sa “Judeo ug sa Hentil nga si Jesus mao ang Kristo, ang Dios sa Kahangtoran, nagpaila sa iyang kaugalingon ngadto sa tanan nga mga nasod.”2