“Ang Husto nga Prekuwensiya,” Liahona, Ene. 2024.
Mga Tingog sa mga Santos sa Ulahing mga Adlaw
Ang Husto nga Prekuwensiya
Wala ko makasabot kon nganong ang nasaag nga piloto wala mokomunikar namo.
Paghulagway pinaagi ni Roger Motzkusart
Usa ka hapon atol sa akong internship isip air traffic controller diha sa tugpahanan sa Tijuana, Mexico, ang akong instruktor ug ako nakamatikod nga ang baga nga gabon gikan sa dagat mitabon sa tugpahanan ug sa dakong bahin sa siyudad. Ang pagkaklaro [visibility], hinoon, anaa ra sa limitasyon nga gitugotan aron ang sakyanan sa kahanginan makatugpa ug makalupad.
Wala madugay, nakamatikod kami pinaagi sa radar sa Cessna 172 nga naggikan sa habagatan subay sa kabaybayonan, naglupad pinaagi sa visual flight rules (VFR). Ubos sa VFR, ang mga piloto mao ra ang motan-aw kon asa sila motugpa gamit ang mga timailhan diha sa yuta aron moabot sa ilang destinasyon.
Walay swerte, ang piloto nasaag diha sa gabon. Naglupad nga nagtuyok-tuyok sa dapit sa baybayon, siya misulay sa pagtan-aw kon asa siya motugpa sa tugpahanan, apan ang dili pagkaklaro [poor visibility] nakababag sa iyang panan-aw. Nangutana ko sa akong instruktor kon unsay among mahimo aron matabangan siya.
“Kinahanglan siya nga mo-tune in sa prekuwensiya [frequency] sa airband sa tower ug mokomunikar nato,” siya mitubag. “Kay kondili, kita walay mahimo alang niya.”
Wala ko makasabot kon nganong ang nasaag nga piloto wala mokomunikar namo. Aduna bay problema ang iyang radyo? Sa iyang pamati makalingkawas ra siya sa kakuyaw nga siya ra?
Mga minuto ang milabay. Sa kataposan, ang piloto mi-tune in sa prekuwensiya sa tower. May kabalaka sa tono, siya nangayo og tabang. Dihadiha dayon kami mihatag niya sa mga direksiyon nga luwas nga mogiya niya paingon sa runway sa tugpahanan. Kinahanglan lang siya nga mosalig sa among mga instruksiyon ug sa iyang mga instrumento sa pagpalupad.
Ang pagkakita sa eroplano nga migawas gikan sa gabon pipila ka minuto ang milabay ug dayon luwas nga mitugpa nakahatag namo og kalipay nga dili matukib.
Sa pagpauli sa balay, namalandong ko sa unsay nasinati sa piloto. Ang pagtawag namo diha sa husto nga airband frequency nakahimo og kalainan tali sa pagdawat og tabang o pagpalupad nga nagtuyok-tuyok—o mas grabe pa.
Sama niini nga piloto, adunay mga panahon nga nasaag ko sa “usa ka gabon sa kangitngit” (1 Nephi 8:23). Sa higayon nga magkinahanglan ko og giya sa Dios, Siya mapailobon nga naghulat nga makadungog sa akong tingog.
Ingon nga ako nakakita sa nasaag nga eroplano diha sa radar, ang atong Langitnong Amahan nakakita kanato ug sa atong mga hagit. Mapasalamaton ko nga Siya naghatag nato og giya. Siya naghatag og tabang pinaagi sa pag-ampo, mga kasulatan, buhi nga mga propeta, ug gasa sa Espiritu Santo. Siya mopalingkawas kanato gikan sa pisikal ug espirituwal nga kakuyaw kon kita mo-tune in ngadto sa husto nga prekuwensiya, mangayo og giya, ug maminaw sa Iyang tingog.