Digital Lamang
4 ka Doktrinal nga mga Kamatuoran nga Makatabang sa Pagbuntog sa Pagkawalay Kadasig
Ang pagtuon sa mga pagsulay ni Josue ug ni Joseph Smith makatabang nato nga makasagubang sa atong kaugalingong mga pagsulay.
Sa dihang ang propeta nga si Josue gitawag aron mangulo sa mga anak sa Israel paingon sa gisaad nga yuta, nabug-atan siya sa umaabot nga buluhaton.
Ang Ginoo mitubag ngadto sa iyang pagkawalay kadasig, nag-ingon, “Magmakusganon ka ug magmaisog; ayaw pagkahadlok ug dili magmaluya: kay ang Ginoo nga imong Dios, magauban kanimo bisan asa ikaw paingon” (Josue 1:9).
Sa dihang si Propeta Joseph Smith nabilanggo sa Bilanggoan sa Liberty, nawad-an siya og kadasig tungod sa grabe nga mga pagpanggukod ngadto sa mga Santos.
Ang Ginoo mitubag:
“Akong anak, kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon;
“Ug unya, kon ikaw molahutay pag-ayo, ang Dios mobayaw kanimo sa kahitas-an; ikaw magmadaugon ibabaw sa imong tanan nga mga kaaway” (Doktrina ug mga Pakigsaad 121:7–8).
Ang Ginoo mihupay usab ni Joseph pinaagi sa pag-ingon:
“Ikaw masayod, akong anak, nga kining tanan nga mga butang makahatag kanimo og kasinatian, ug alang sa imong kaayohan.
“Ang Anak sa Tawo mikunsad ubos kanilang tanan. Labaw pa ba ikaw kay kaniya?” (Doktrina ug mga Pakigsaad 122:7–8).
Bahin ni Josue ug Joseph, gikuha ba sa Ginoo ang mga problema niini nga mga propeta? Wala. Gani mipakigbahin siya niining doktrinal nga mga kamatuoran:
-
Ang atong Langitnong Amahan ug ang Iyang Anak, si Jesukristo, mag-uban nato kanunay.
-
Kon tan-awon gamit ang mahangtorong panglantaw, ang atong mga pagsulay molabay ra.
-
Ang atong mga pagsulay maghatag kanato og kasinatian.
-
Si Jesukristo sa hingpit nakasabot gayod nato ug sa unsay atong gisagubang.
Sa higayon nga mobati kita og pagkawalay kadasig, kita makaampo sa atong Langitnong Amahan aron makadawat og pagpamatuod niining doktrinal nga mga kamatuoran pinaagi sa gahom sa Espiritu Santo.
Pagkat-on pa og dugang bahin sa pagdumala sa pakawalay kadasig diha sa “Kahimsog sa Pangisip” nga seksiyon sa Tabang sa Kinabuhi nga mga kapanguhaan diha sa Gospel Library.