Edukasyon—usa ka Mahinungdanong Pundasyon sa Pagtuman sa Atong mga Misyon

Ni Milton Camargo

Unang Magtatambag sa Kinatibuk-ang Kapangulohan sa Sunday School

Imahe

Brother Milton Camargo

Gikan sa “Ang Edukasyon, ang Misyon, ug ang Kalibotan,” usa ka debosyonal nga pakigpulong nga gihatag ngadto sa mga estudyante sa Brigham Young University–Hawaii sa Pebrero 28, 2023. Alang sa kompleto nga pakigpulong, bisitaha ang speeches.byuh.edu.

Ang kalibotan nagkinahanglan nga mahibalo sa unsay inyong nahibaloan bahin sa maanindot nga mga panalangin nga gihatag ni Jesukristo niadtong nagsunod Kaniya.

Imahe

usa ka collage sa mga tawo nga nagtuon ug nagkat-on og bag-ong mga kahanas

Ang Ginoo nahigugma kaninyo ug misalig kaninyo nga dad-on ang Iyang kahayag ngadto sa tanan nga inyong ikahinabi. Gusto Niya nga ang inyong kinabuhi mahimong usa ka panig-ingnan ngadto sa inyong mga higala ug mga paryente. Siya naglaom nga kamo mopamatuod bahin sa katinuod sa atong Langitnong Amahan—nga kitang tanan Iyang espirituhanong mga anak ug, busa, ang tanang katawhan atong mga kaigsoonan. Ang Ginoo naglaom usab ninyo nga mopamatuod bahin sa Iyang sagradong misyon dinhi sa yuta—nga Siya mao ang Anak sa buhi nga Dios, nga Siya mao kaniadto, nga Siya mao karon, ug nga Siya moabot (tan-awa sa Doktrina ug mga Pakigsaad 68:6).

Edukasyon usa ka Relihiyoso nga Responsibilidad

Si Presidente Russell M. Nelson, ang atong propeta, misulti ngadto sa mga young adult niadtong Mayo 2022: “Ang edukasyon importante kaayo. Gikonsiderar nako kini nga usa ka relihiyoso nga responsibilidad.”¹ Ang Ginoo wala motan-aw sa edukasyon isip bulag ug lahi kaysa pagka-espirituhanon.

Gani, sa Doktrina ug mga Pakigsaad 88:77–78, Siya mihatag nato og usa ka sugo nga “motudlo sa usag usa,” nagsaad sa Iyang grasya nga motabang nato nga makakat-on sa “tanan nga mga butang mahitungod ngadto sa gingharian sa Dios.” Ug unsa kadto nga mga butang nga mahitungod sa Iyang gingharian? Ang lista diha sa bersikulo 79 tingali makasurprisa ninyo tungod kay wala lamang kini maglakip sa mga hilisgotan sa ebanghelyo sama sa hugot nga pagtuo ug paghinulsol. Naglakip usab kini (sa pipila sa akong posible nga mga gikonsiderar tungod sa koneksyon niini ngadto sa unsay atong matun-an):

“Mga butang … sa langit”: Ang mga bitoon ug mga planeta? Ang kalikopan sa yuta? Mga Abyon [Aviation]? (Tingali si Elder Uchtdorf mouyon nako!)
“Mga butang … sa yuta”: Konstruksiyon? Buhatan [Manufacturing]? Industriyal nga mga proseso? Teknolohiya sa Impormasyon? Siyensya sa kahimsog ug ang tanang may kalabotan niini? Soolohiya [Zoology]? Biyolohiya [Biology]? Biochemistry? Agrikultura?
“Mga butang … ilawom sa yuta”: Geology? Mineralohiya [Mineralogy]? Oceanography? Marine biology?
“Mga butang nga diha na”: Kasaysayan?
“Mga butang nga anaa”: Kasamtangan nga mga panghitabo? Siyensya sa Politika [Political science]? Sosyolohiya [Sociology]? Pangnegosyo? Palisiya sa publiko?
“Mga butang nga sa mubong panahon mahinabo”: Pagbalita sa kahimtang sa panahon? Pinansyal nga mga pagbana-bana? Pag-analisar sa posible nga mga pandemya? Mga kalamboan sa teknolohiya?
“Mga butang nga anaa sa panimalay”: Mga kalihokan sa panimalay sama sa edukasyon, mga buhis, balaod, lokal nga mga proyekto sa pagpalambo sa siyudad, ug pagplano sa produksiyon sa pagkaon?
“Mga butang nga atua sa layong dapit”: Panglangyaw nga mga kalihokan [Foreign affairs]? Internasyonal nga mga relasyon? Diplomasya?
“Ang mga gubat ug ang mga kagubot sa mga nasod, ug ang mga paghukom nga anaa sa yuta; ug ang kasayoran usab sa mga nasod ug sa mga gingharian”: Lainlaing mga matang sa gobyerno, mga kultura, ug mga pinulongan? Antropolohiya [Anthropology]? Artistiko ug literaryo nga mga tradisyon sa tibuok kalibotan?

Wow! Daghan kaayo kana kaysa atong makat-onan sa tibuok kinabuhi (ug segurado ko nga ang Ginoo gusto nga kita usab makakat-on pa og dugang!).

Ug nganong gusto man Siya nga kita makakat-on niining tanan?

Dili lang aron makaangkon kamo og nindot nga trabaho—bisan kon importante kana ngadto Kaniya. Apan ang Iyang panglantaw mas halapad pa kaysa niana, ug ang Iyang katuyoan adunay mas mahangtorong mga sangpotanan. Gihulagway kini diha sa bersikulo 80: “Nga kamo unta maandam diha sa tanan nga mga butang kon Ako mopadala kaninyo pag-usab aron sa pagpalambo sa balaan nga tawag diin Ako nagtawag kaninyo, ug sa misyon diin Ako nagsugo kaninyo.”

Edukasyon isip usa ka Pagpangandam alang sa Atong mga Misyon

Kini, morag, ang dakong katuyoan sa edukasyon—nga maandam alang sa misyon nga gihatag sa Dios kanato, nga maandam kon Siya mopadala nato pag-usab.

Ang uban ninyo tingali moingon, “Ipadala ko pag-usab? Nakamisyon na man ko. Ipadala ba ko pag-usab?”

Sa pagkatinuod, adunay usa lang ka misyon. Kon nakaserbisyo kamo og full-time nga misyon, nindot kaayo kana nga higayon sa pagtutok sa pagserbisyo sa Ginoo. Apan dili kana ang sinugdanan o kataposan sa misyon nga Siya mipadala nimo dinhi aron tumanon. Ug unsa man kana nga misyon? Ikonsiderar kini nga mga paghulagway gikan sa mga kasulatan:

“Kita magbuhat og usa ka yuta diin [ang mga anak sa Dios] mahimo nga makapuyo; ug kita mosulay kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila” (Abraham 3:24–25).
Ngadto ni Adan ug ni Eva, ang anghel sa Ginoo miingon, “Ikaw mobuhat sa tanan nga imong buhaton diha sa ngalan sa Anak, ug ikaw maghinulsol ug motawag sa Dios diha sa ngalan sa Anak hangtod sa kahangtoran” (Moises 5:8). Ug si Adan ug si Eva “mihimo sa tanan nga mga butang nga mahibaloan ngadto sa ilang anak nga mga lalaki ug sa ilang anak nga mga babaye” (Moises 5:12).
Human sa Iyang pagkabanhaw, ang Manluluwas miingon kang Pedro, “Pakan-a ang akong mga karnero” (Juan 21:17), ug ngadto sa Iyang mga disipulo, “Panglakaw kamo ug himoa ninyong mga tinun-an ang tanang kanasoran, sa pagbunyag kanila sa ngalan sa Amahan ug sa Anak ug sa Espiritu Santo: nga magtudlo kanila sa pagtuman sa tanan nga akong gisugo kaninyo: ug tan-awa, ako magauban kaninyo sa kanunay, hangtud sa kataposan sa kapanahonan” (Mateo 28:19–20).
Sa dihang nagpakita si Kristo didto sa Amerika, Siya miingon, “Ang mga buhat nga kamo nakakita nga Ako mihimo kana kamo mobuhat usab” (3 Nephi 27:21).
Sa panahon ni Joseph Smith, Siya miingon: “Karon tan-awa, usa ka kahibulongan nga buhat hapit na moabot diha sa mga katawhan. Busa, O kamo nga anaa sa pag-alagad sa Dios, tan-awa nga kamo moalagad kaniya sa tibuok ninyo nga kasingkasing, gahom, hunahuna ug kusog, nga kamo magbarog nga walay mansa sa atubangan sa Dios sa kataposan nga adlaw. Busa, kon kamo adunay tinguha sa pag-alagad sa Ginoo kamo gitawag ngadto sa buhat” (Doktrina ug mga Pakigsaad 4:1–3).
Ug karon, pinaagi sa buhing propeta sa Ginoo, si Presidente Russell M. Nelson, Siya nag-ingon kanato: “Ang pagpundok sa Israel mao ang labing importante nga buhat nga nahitabo karon sa yuta. Usa sa importante nga elemento niini nga pagpundok mao ang pag-andam og katawhan kinsa makahimo, andam, ug takos sa pagdawat sa Ginoo kon Siya moabot pag-usab; usa ka katawhan kinsa mipili na ni Jesukristo kay sa niining napukan nga kalibotan; usa ka katawhan kinsa nagmaya sa ilang kabubut-on sa pagsunod sa mas taas, mas balaan nga mga balaod ni Jesukristo. Ako naghangyo kaninyo, akong minahal nga mga kaigsoonan, nga mahimong matarong nga katawhan. Bahandia ug tahora ang inyong mga pakigsaad labaw sa tanan nga ubang mga pasalig. … Ipatigbabaw ang Dios diha sa imong kinabuhi.”²

Kon akong iminubo ang atong misyon, niana, ako moingon nga mao kini:

Sa pagsunod sa mga sugo sa Dios, sa Iyang mas taas ug mas balaan nga balaod.
Sa pagsunod ni Jesukristo sa tibuok natong kasingkasing, magbuhat sa tanan pinaagi sa Iyang ngalan.
Ug sa pagpahibalo niining tanan ngadto sa ubang mga anak sa Dios, sa pagpundok nila og balik ngadto Kaniya agi og pagpangandam alang sa Ikaduhang Pag-anhi sa Ginoo.

Sa unsang paagi nga ang pagbaton og edukasyon makatabang ninyo sa pagpangandam alang niini nga misyon? Adunay daghang posible nga mga tubag niini nga pangutana, apan ania ang pipila ka hunahuna:

Ang pagkat-on bahin sa langit ug sa yuta makapalig-on sa atong balaang pagtahod ni Jesukristo, kinsa naglalang niini.
Ang pagkat-on bahin sa nangagi, sa karon, ug sa umaabot makaabli sa atong mga mata ngadto sa mga sangpotanan sa pagsunod—ug pagsupak—sa mga sugo sa Dios sa tibuok kasaysayan sa tawo.
Ang pagkat-on bahin sa “mga kagubot sa mga nasod, … ug sa mga gingharian” makapahimo natong mas sensitibo sa kultural nga mga panaglahi. Kon mas makaila kita sa mga kasingkasing sa mga tawo sa kalibotan—sa ilang mga panginahanglan, sa ilang mga mithi, ug sa unsay mahinungdanon ngadto nila—mas maandam kita sa pagpakigbahin sa ebanghelyo ngadto nila sa paagi nga ilang masabtan, mahangop, ug mahatagan og bili.

Ako adunay hingpit nga pagsalig nga kamo ug ako makatuman niini nga misyon tungod kay si Jesukristo nakatuman sa Iyang misyon. Ang atong kalamposan magdepende Kaniya, ug Siya nagmatinuoron sa misyon nga gihatag sa Iyang Amahan Kaniya—usa ka misyon nga Siya lamang ang makatuman.

Ako mopamatuod nga si Jesukristo nakatuman sa Iyang misyon aron kamo makatuman sa inyong misyon. “Dalan Niya may timaan.”³ Karon ang inyong misyon mao ang pagsunod sa Iyang dalan—ang dalan sa pakigsaad—ug ipahibalo kini sa tanan. Sama sa giingon ni Lehi, “Unsa ka dako ang pagkamahinungdanon sa paghimo niini nga mga butang nga masayran ngadto sa mga lumulupyo sa yuta” (2 Nephi 2:8). Ipahibalo kini ngadto sa imong mga anak, ngadto sa imong mga kaigsoonan, ngadto sa mga karnero sa Ginoo, ngadto sa tanang nasod—gani ngadto sa kinatumyan sa kalibotan. Ipahibalo kini pinaagi sa pulong ug pinaagi sa ehemplo, ipakigbahin ug magpakabuhi sa unsay imong nahibaloan bahin sa Manluluwas. Ipahibalo kini pinaagi sa pagserbisyo sa Dios ug sa Iyang mga anak sa tibuok ninyong kasingkasing, gahom, hunahuna, ug kusog dinhi niining maanindot nga buhat sa pagpundok sa Israel, sa pag-andam og usa ka katawhan kinsa makahimo, andam, ug takos nga modawat sa Ginoo kon Siya mobalik na.

Mga Panalipod batok sa Kalibotan

Kini ang inyong misyon, ug usa gayod kini ka maanindot nga misyon. Ang kalibotan nagkinahanglan sa unsay inyong matanyag isip sumusunod sa pakigsaad ni Kristo. Ang hagit nga inyong atubangon mao nga kamo mopuyo niana nga kalibotan samtang nagtuman usab sa inyong importante nga misyon. Ug usa kini ka komplikado nga kalibotan, diin ang kaaway naggamit og malipoton nga mga hinagiban, nagtinguha sa paglingla ninyo, naghimo sa sayop nga daw matarong, o hinayhinay nga nagtuis sa unsay orihinal nga matarong hangtod nga mamahimo kining sayop.

Si Elder David A. Bednar sa Korum sa napulog Duha ka Apostoles miingon atol sa Oktubre 2022 nga kinatibuk-ang komperensiya, “Sa kabisi sa atong inadlaw-adlaw nga mga kinabuhi ug sa kaguliyang sa kasamtangang kalibotan diin kita nagpuyo, mahimong malinga kita gikan sa mahangtoron nga mga butang nga labing mahinungdanon pinaagi sa paghimo sa kalipay, kabulahan, kasikat, ug kabantogan nga maoy atong una nga mga prayoridad.”⁴

Sa unsang paagi nga mahitabo kini sa atong kinabuhi? Ingon kini niini:

Nagpalit kita og usa ka paresan sa itom nga mga sapatos pangtrabaho. Kadugayan, gusto kita og brown nga paresan alang sa kataposan sa semana. Dayon gusto kita og blue nga paresan aron mobagay sa bag-ong sinina nga bag-o lang natong napalit, apan dili kini mobagay sa atong paboritong sinina—ang puting sapatos ang mas nindot ipares niana. Wala madugay kita may 10 o 15 ka paresan sa mga sapatos. Apan, kita adunay duha ra gihapon ka tiil!
Uban sa atong kapikas, kita nagtino nga ang paggahin og panahon nga manag-uban isip usa ka pamilya mao ang importante nga prayoridad. Gani, “Ang Pamilya: Usa ka Pamahayag ngadto sa Kalibotan ” nag-ingon nga ang “malamposon nga kaminyoon ug mga pamilya natukod ug napadayon diha sa mga baroganan, [inubanan sa uban pang mga butang] lakip sa maayo makalingawng mga kalihokan.” Mao nga nakadesisyon kami nga matag tuig ang among pamilya moadto sa makapahinam nga bag-ong adtoan. Kadugayan, ang mga biyahe nag-anam ka taas. Moabot kini hangtod sa mga Dominggo, didto sa mga lugar nga walay chapel aron motambong og mga miting sa Dominggo. Kini mas gasto na usab, ug ang resulta nagasto namo ang tanan nga anaa kanamo—apil ang pipila ka butang nga wala kanamo! Tingali nakadungog na kamo niining hugpong sa mga pulong: “Mopalit kita og mga butang nga dili nato kinahanglanon, sa kwarta nga wala nato, aron daygon sa tawo nga dili nato ganahan!” Apan atong ibutang ang tanang litrato diha sa pahina sa atong social media, ug naglaom kita nga daghan ang mo-like!

Si Presidente Nelson mipasabot niini nga hagit sa dihang miingon siya: “Unsa ang kahulogan sa pagbuntog sa kalibotan? Kini nagpasabot sa pagbuntog sa tentasyon sa labaw nga pag-atiman sa mga butang niini nga kalibotan kaysa mga butang sa Dios. Kini nagpasabot sa pagsalig sa doktrina ni Kristo labaw kaysa mga pilosopiya sa mga tawo. Kini nagpasabot nga mahimuot diha sa kamatuoran, mosalikway sa panglimbong, ug mahimong “mapainubsanon nga mga sumusunod ni Kristo.’ Kini nagpasabot sa pagpili sa paglikay gikan sa bisan unsa nga makapabugaw sa Espiritu. Kini nagpasabot nga andam nga ‘mobiya’ bisan sa atong paborito nga mga sala.”⁵

Hinumdomi kini nga mga pagtulon-an sa atong propeta. Isulat kini, ug basaha kini pag-usab kon kamo tentalon sa mga gipakabililhon niining kalibotana:

Mas hatagan og bili ang mga butang sa Dios kaysa mga butang niining kalibotan.
Mosalig sa doktrina ni Kristo labaw pa kaysa mga pilosopiya sa mga tawo.
Magtinguha ug magmalipayon diha sa mahangtorong kamatuoran, sama sa makita diha sa mga kasulatan ug sa mga pulong sa buhing mga propeta ug apostoles.
Magmahimong usa ka mapaubsanong sumusunod ni Kristo.
Likayi ang bisan unsang butang nga makapabugaw sa Espiritu. Ang Balaang Espiritu tinuod, ug usa kini ka talagsaong gasa sa inyong kinabuhi. Kamo makahimo ug kinahanglan nga magtinguha kanunay sa mga pag-aghat sa Espiritu.
Biyai ang inyong paborito nga mga sala!

Si Presidente Nelson mikutlo usab niini nga saad gikan ni Presidente Ezra Taft Benson (1899–1994):

“Ang mga kalalakin-an ug mga kababayen-an kinsa mosalig sa ilang mga kinabuhi ngadto sa Dios makadiskobre nga Siya makahimo og daghan pa sa ilang mga kinabuhi kay sa ilang mahimo. Siya

makapadaghan sa ilang mga kalipay,
mas makapalambo sa ilang panglantaw,
makapaabtik sa ilang mga hunahuna, …
makapabayaw sa ilang mga espiritu,
makapadugang sa ilang mga panalangin,
makapadaghan sa ilang mga oportunidad,
makahupay sa ilang mga kalag,
makahatag og daghang mga higala, ug
makabu-bo og kalinaw.”⁶

Sa pagkatinuod, aduna bay bisan unsa nga butang nga makakomparar sa unsay gitanyag sa Ginoo kaninyo?

Ang kalibotan nagkinahanglan nga mahibalo sa unsay inyong nahibaloan bahin sa maanindot nga mga panalangin nga gihatag ni Jesukristo niadtong nagsunod Kaniya.

Ang Ginoo Misalig Kaninyo

Akong taposon pinaagi sa unsay akong gisulat sa sinugdanan: Ang Ginoo nahigugma kaninyo ug misalig kaninyo nga dad-on ang Iyang kahayag ngadto sa tanan nga inyong ikahinabi. Gusto Niya nga ang inyong kinabuhi mahimong usa ka panig-ingnan ngadto sa inyong mga higala ug mga paryente. Siya naglaom nga kamo mopamatuod bahin sa katinuod sa atong Langitnong Amahan ug bahin sa sagradong misyon sa Ginoo dinhi sa yuta.

Ang inyong edukasyon mahinungdanon sa inyong misyon nga hinatag sa Dios. Ug ang inyong misyon mahinungdanon ug gikinahanglan kaayo sa kalibotan karon.