Pagbuntog sa Pagkawalay Espirituhanong Tumong—Unsay Akong Buhaton Karon?,” Liahona, Ene. 2024.
Mga Young Adult
Pagbuntog sa Espirituhanong Pagkawalay Tumong—Unsay Akong Buhaton Karon?
Kon nagpadulong kita ngadto kang Jesukristo, dili gayod kita mahimong walay tumong.
Ang pag-uswag ngadto sa pagkahamtong kulbahinam kaayo para kanako. Andam nako nga magsugod og ugmad sa kinabuhi nga sukad ganahan nako. Nagserbisyo ko og misyon didto sa Brazil ug dayon mi-eskwela sa unibersidad sa dihang mipauli ko. Natapos nako ang akong kurso, nakakita og maayong trabaho, ug naningkamot sa pagpuyo isip usa ka disipulo ni Kristo.
Ug ania pa ako niini nga ang-ang sa kinabuhi. Naningkamot lang sa labing maayo nakong mahimo sa pagsunod Niya.
Mapasalamaton kaayo ko sa mga oportunidad ug mga panalangin nga akong naangkon sa pagkakaron. Apan samtang akong gitan-aw ang nangagi ug nakaamgo nga nahimo na nako ang tanang mga pakigsaad nga akong mahimo kutob niining puntoha (gawas lang sa pagminyo] ug nakakab-ot sa mga dagkong ang-ang sa kalamposan nga kanunay nakong giplano, usahay bation nako nga wala molambo—dili segurado kon unsaon sa pag-uswag, ilabi na sa espirituhanong paagi.
Nagsud-ong ko sa mga young adult sa akong palibot nga nanglimbasog usab. Ang uban kanila mibiya gani sa Simbahan tungod kay gibati nila nga walay tumong o nag-atubang sa wala matuman nga mga gilaoman nga mahitabo. Ang ilang mga aksiyon sa kasagaran nadugang sa akong lista sa mga pangutana sa kinabuhi.
Hinuon, karon mismo, ang akong labing dagkong mga pangutana sa Langitnong Amahan mao kini: Unsaon nako nga mabuntog kining pagbati sa espirituhanong pagkawalay tumong? Unsay akong buhaton karon?
Samtang nanglimbasog ko sa pagsabot niini nga mga pangutana, nakakat-on ko og pipila ka mga kamatuoran nga nakatabang nako sa pagpangita og direksiyon niining panahon sa walay kasegurohan.
Ayaw Itugot nga ang mga Kasamok Mopahisalaag Nimo
Atol niini nga panahon sa pagkawalay kahibalo kon unsa ang sunod nga buhaton o kon unsa ang mapaabot, nabantayan nako kon sa unsang paagi nga ang mga makalinga nga mga butang sa kalibotan dali ra nga mahimong mas importante kaysa mga espirituhanong mga butang. Si Sister Rebecca L. Craven, Ikaduhang Magtatambag sa Kinatibuk-ang Kapangulohan sa Young Women, miingon, “Ang kalibotan napuno sa mga kasamok nga makapahisalaag bisan sa mga pinili, hinungdan nga sila dili kaayo magtagad sa pagtuman sa ilang mga pakigsaad.”1
Akong nakita ang ubang mga young adult nga nanglimbasog sa ilang mga pagpamatuod human mahibalik gikan sa ilang misyon. Akong nakita kon giunsa sa uban sa pagkab-ot og mga kalamposan sama sa paggradwar sa unibersidad o pagminyo ug sa kataposan nahisalaag gikan sa mga butang nga mas mahinungdanon sa dihang wala nila hatagi og lugar ang ebanghelyo ni Jesukristo sa ilang bag-ong naandan nga mga kalihokan.
Ako usab nakasinati og mga espirituhanong pag-uswag ug pagkaluya. Malisod usahay ang pagbaton og kadasig ug dili maluya sa mga espirituhanong mga kinaiya, ilabi na kon ang pipila ka mga panalangin dili moabot dayon sama sa gilaoman. Gusto ko kanunay nga mouswag ug molambo—dili ko gusto nga mohunong sa paglambo sa espirituhanong paagi. Apan usahay bation nako nga nagpaanod-anod lang ko nga walay tumong.
Hinuon, kon akong gahinan og panahon ang Langitnong Amahan ug si Jesukristo matag adlaw, ilabi na sa ginagmay ug yano nga mga paagi (tan-awa sa Alma 37:6), akong bation ang kahupay ug kamakanunayon nga gihatag sa Iyang ebanghelyo ngari kanako, bisan kon ang kalibotan dili makanunayon.
Si President Russell M. Nelson miingon: “Mohangyo ko kaninyo nga ipatigbabaw ang Dios sa inyong kinabuhi. Hatagi Siya og patas nga bahin sa inyong panahon. Kon inyo kining buhaton, panid-i kon unsay mahitabo sa inyong positibo nga espirituhanong paglambo.”2 Kon mahunahunaon nakong pilion ang pagbaton og hugot nga pagtuo ni Jesukristo kada adlaw ug mogahin og panahon alang nianang espirituhanong mga kinaiya nga mokonekta nako ngadto Kaniya, mahinumdoman nako ang espirituhanong mga panahon nga nakapausab sa akong kinabuhi ug mobati og bag-ong pagsabot sa katuyoan, paglaom alang sa umaabot, ug hugot nga pagtuo.
Pangita og Maayong mga Impluwensiya
Laing higayon nga mibati ko nga walay tumong mao kadtong kataposang tuig sa unibersidad. Lisod ang kinabuhi. Atol kadto sa pandemya, mao nga naluya ko samtang napriso sa balay samtang naghuman sa klase. Adunay labihan nga kakulang sa direksiyon ug koneksyon sa akong kinabuhi.
Gani nanglimbasog ko sa simbahan niining higayona. Sa kasagaran pugson nako ang akong kaugalingon sa pagbangon nga nagsul-ob og pajama aron maminaw sa miting sa sakramento sa online kay mao ra kadto ang pagdasig nga akong makaya.
Atol niining walay paglaom nga panahon, miduol ko sa akong pamilya ug mga higala ug mipasabot nila kon unsa ka walay tumong ug kaluya ang akong gibati. Wala ko mobati nga adunay paglaom alang sa umaabot ug wala ko masayod kon unsaon nga makahimo ra. Ug mao kadto ang panahon nga misulti sila nako nga nag-ampo sila alang nako ug nagsuporta nako bisan tuod layo kaayo sila.
Samtang miduol ko sa akong mga minahal kinsa adunay hugot kaayo nga pagtuo ug samtang nag-ampo ko sa Langitnong Amahan pinaagi sa gamay lang kaayo nga espirituhanong kadasig, gibati nako ang makapalig-on nga suporta ug gugma.
Namatikdan nako nga kon mosobra ang akong pagpukos sa akong wala matuman nga mga gilaoman nga mahitabo, sa akong mga pagduda, o sa akong mga panlimbasog, ang akong hugot nga pagtuo nahuyang. Napakyas ako sa pag-ila sa mga panalangin sa akong kinabuhi. Apan pinaagi sa aktibong pagpalibot sa akong kaugalingon sa maayo pinaagi sa pagbasa sa akong patriyarkal nga panalangin, pagpaminaw sa mga mensahe sa kinatibuk-ang komperensiya, ug paggahin og panahon uban sa akong mga minahal kinsa moimpluwensiya nako alang sa mas maayo, akong mapabalik ang akong pagtutok ngadto sa milagroso nga kalainan nga nahimo sa ebanghelyo ni Jesukristo sa akong kinabuhi.
Bisan kon wala kay klaro nga agianan sa unahan nimo usahay o kon ang mga panghitabo wala masubay sa plano, adunay daghan kaayo nga mga pagkamaayo sa imong kinabuhi ug daghan kaayong mga oportunidad nga makatabang nimo sa pag-uswag diha sa dalan sa pakigsaad. Kanunay nga adunay mas daghang makat-onan ug dugang nga panahon sa paglambo, ilabi na sa espirituhanon. Pangayo og direksiyon sa Langitnong Amahan. Motabang Siya kaninyo sa pagpangita ug pagkaplag og maayong mga impluwensiya ug mga oportunidad sa paglambo ug pagkat-on nga anaa sa inyong palibot (tan-awa sa Mga Artikulo sa Hugot nga Pagtuo 1:13).
Padayon sa Pagpaningkamot
Ang atong personal nga pagkaespirituhanon usahay mahimong sama sa balod—mosaka ug moubos. Usahay tingali bation nato ang kalig-on sa atong hugot nga pagtuo ug ang kamaya sa ebanghelyo. Apan sa ubang higayon, tingali manglimbasog kita aron mahibalo kon asa kita sunod nga mopaingon. Tingali manlimbasog kita kon ang mga hagit moabot, mga pangutana motumaw, o mga panalangin malangan, ilabi na kon atong gibuhat ang labing maayo sa pagpuyo sa ebanghelyo. Niining malisod nga mga panahon, sa kasagaran makita nako ang mga tawo nga mopili og usa sa duha ka mga agianan: ang usa diin sila moduol sa Manluluwas, ug ang usa diin dili kini nila buhaton.
Ako usahay mokompara niini nga mga panahon ngadto sa estorya bahin ni Moises ug sa larawan sa bitin nga bronsi (tan-awa sa Numeros 21:8–9). Sa dihang ang mga Israelita desperado na kaayo nga mamaayo human nga mapaaki sa malala nga mga bitin, si Moises mihatag kanila og sayon nga paagi aron maluwas: basta motan-aw lang sa bitin nga nagrepresentar ni Jehova. Mao lang kana ang ilang angay nga buhaton. Usa lang ka pasiplat ug sila mabuhi. Apan daghan kaayo ang mipili nga dili motan-aw ug nangamatay. (Tan-awa sa 1 Nephi 17:41.)
Kini nga estorya nakapahunahuna nako kon giunsa nato sa pagpas-an ang malala nga kabug-aton sa kasagmuyo ug kahiubos gikan sa wala matuman nga mga gilaoman nga mahitabo usahay, kon ang tambal anaa ra sa atong atubangan!
Ang yawe sa pagbati og paglaom, kalinaw, ug hugot nga pagtuo alang sa atong umaabot mao lamang ang pagtan-aw ngadto kang Jesukristo (tan-awa sa Helaman 8:14–15; Juan 3:14–17).
Ako sa kanunay nahimong usa sa grabeng makapanaway sa akong kaugalingon kon makahimo ko og mga sayop. Apan tungod kay tinuoray ko nga naningkamot sa pagkat-on mahitungod sa ug nagtuo sa Langitnong Amahan ug ni Jesukristo, kanunay ko nga makasalig Nila alang sa kapasayloan, paglambo, ug pagkaayo sa malisod nga mga panahon. Nasayod ko nga kon magtan-aw ko Kanila pinaagi sa pag-ampo, pagtuon sa Dali, Sunod Kanako, paggahin og panahon sa templo, ug pagpalambo sa akong calling, bation nako ang pagbati sa pagkamapasalamaton ug pagbag-o.
Samtang mangita ko Nila, makita nako ang ebanghelyo ni Jesukristo kon unsa gayod kini: usa ka dangpanan nga nagtanyag kanato og kahupayan, kahilwasan, ug pagkaayo gikan sa mga bitin sa kalibotan.
Si Elder Jeffrey R. Holland sa Korum sa Napulog Duha ka Apostoles mahigugmaong mipamatuod: “Usa ka hingpit nga kahayag sa paglaom,’ gumikan sa gugma sa Dios ug sa tanan nga mga tawo––mao kana ang among gusto alang kaninyo. … Nag-uban nianang hayag nga paglaom mao ang dili ikalimod nga hunghong nga ang Dios nahigugma kaninyo, nga si Kristo mao ang inyong Manlalaban, nga ang ebanghelyo tinuod. Ang kahayag niini mopahinumdom kaninyo nga sa ebanghelyo kanunay nga adunay––matag adlaw, matag takna––usa ka bag-o nga kahigayonan, usa ka bag-o nga kinabuhi, usa ka bag-o nga tuig. Pagkadako nga milagro! Pagkanindot nga gasa! Ug tungod sa gasa ni Kristo, ang labing maayo nga mga butang sa kinabuhi kay maatoa kon kita lig-on nga magpadayon nga motuo ug magpadayon sa pagpaningkamot ug magpadayon sa paglaom.”3
Magpaduol ngadto kang Jesukristo
Ang pagkahimong young adult magdala og daghang mga kausaban, daghang walay kasegurohan, ug oo, gani dili matuman nga mga gilaoman nga mahitabo usahay. Apan ang ebanghelyo ni Jesukristo kanunay nga segurado ug kanunay nga makanunayon. Ug ang mga saad Niya ug sa Langitnong Amahan segurado samtang magpadayon kita nga magsubay sa dalan sa pakigsaad. Ang kalibotan makapalisod kaayo usahay sa pagpadayon sa atong pagtutok ngadto Kaniya. Apan ang paghimo og lakang padulong sa unahan nga modala kanato ngadto Kaniya usa ka pag-uswag. Kon nagpadulong kita ngadto kang Kristo, dili gayod kita mahimong walay tumong—nagpadulong kita ngadto sa paglaom, kalinaw, ug kamaya.
Ang tagsulat nagpuyo sa Manchester, England.