“Mga Kurso sa Pagbarog Pinaagi sa Kinaugalingong Paningkamot: Pagkonektar sa mga Panalapi ngadto sa mga Kamatuoran sa Ebanghelyo,” Liahona, Ene 2024.
Mga Kurso sa Pagbarog Pinaagi sa Kinaugalingong Paningkamot: Pagkonektar sa mga Panalapi ngadto sa mga Kamatuoran sa Ebanghelyo
Ang mga kurso sa Simbahan sa pagbarog pinaagi sa kinaugalingong paningkamot maghatag og espirituwal nga mga panabot sa ilang pinansiyal nga mga panginahanglan.
Ang uban sa labing unang mga panudlo sa Ginoo sa Iyang mga anak may kalabotan sa trabaho ug pagbarog pinaagi sa kinaugalingong paningkamot. Sa Karaang Tugon, Iyang gimandoan si Adan ug si Eva, “Magpatulo ka sa imong singot ug maghago pag-ayo una pa mohatag kanimog abot ang yuta” (Genesis 3:19). Ug ngadto sa mga Israelita, miingon Siya, “Makatrabaho kamo sulod sa unom ka adlaw ” (Exodo 20:9).
Karon, ang gi-esponsoran sa Simbahan nga mga grupo sa pagbarog pinaagi sa kinaugalingong paningkamot sa tibuok kalibotan nagtabang sa mga anak sa Dios nga mapalambo ang ilang edukasyon, mahimong mas lig-on sa emosyon, makakita og mas maayo nga trabaho, magsugod og mga negosyo, ug—sama sa ipakita sa mosunod nga mga kasinatian—mas maayo nga pagdumala sa ilang panalapi.
Pagbayad sa Ikapulo sa Gamayng Kita
Atol sa iyang kaminyoon, si Deborah, taga Michigan, USA, wala gayod magkaproblema sa pagdumala sa iyang panalapi. Apan human sa panagbulag niya ug sa iyang bana, ang mga balayronon nahimong mas lisod nga bayaran. Bisan tuod si Deborah nalipay sa regular nga pagtambong sa templo, nagsugod siya og kalisod sa pagbayad sa iyang ikapulo ug wala mopadayon sa pag-adto sa templo.
Nangayo siya og tabang sa iyang bishop, kinsa misulti kaniya mahitungod sa klase sa Simbahan alang sa pagbarog pinaagi sa kinaugalingong paningkamot, nga gipahigayon sa iyang stake. Miuyon si Deborah nga moadto, apan sa sinugdanan wala siya makakita og rason nga moapil: “Sa tinuod lang, miingon ko sa akong kaugalingon, ‘Wala ko kahibalo nganong nia ko dinhi. Kahibalo ko unsaon sa pagbadyet sa akong kwarta. Nagsige ko og badyet sa tibuok nakong kinabuhi.’”
Nakahimamat si Deborah sa grupo ug sa usa ka tigpahigayon sa klase. Sulod sa duha ka oras matag semana, nakakat-on sila mahitungod sa temporal nga mga aspeto sa pinansiyal nga kalig-on (sama sa paghimo og badyet) ug sa espirituhanong mga aspeto sa pinansyal nga kalig-on (sama sa pagkamatinud-anon nga tinugyanan sa kinitaan). “Wala pa gayod nako makonektar kining duha sama sa paagi nga kini nga klase nagkonektar niini,” si Deborah misugilon.
Si Deborah mibati nga ang iyang koneksiyon pinaagi sa pakigsaad ngadto sa Langitnong Amahan nakatabang niya nga makat-on sa pag-apil Niya sa iyang mga desisyon kalabot sa pinansiyal. “Ang akong Langitnong Amahan kanunay nga anaa para kanako. … Angay nako Siya nga iapil sa tanang butang.”
Sa dihang si Deborah misunod sa mga pag-aghat ug direksiyon nga iyang nadawat gikan sa iyang grupo sa pagbarog pinaagi sa kinaugalingon nga paningkamot, nakahimo siya sa paggahin og kwarta alang sa ikapulo, pagbayad sa iyang mga bayranan, ug gani pagtigom og kwarta, ang tanan nahimo nga walay napuno sa iyang kinitaan.
Si Presidente Heber J. Grant (1856–1945) mipamatuod nga mas daghan ang mahimo sa nahabilin nga porsiyon sa kinitaan human nga mabayaran ang ikapulo kay sa mahimo sa tibuok nga kantidad sa dili pa mabayaran ang ikapulo: “Ako mopamatuod … nga ang mga lalaki ug mga babaye kinsa bug-os nga matinuoron sa Dios, kinsa nagbayad sa ilang ikapulo … nagpamatuod … nga ang Dios naghatag kanila og kaalam diin sila nakahimo sa paggamit sa nahabilin nga ikasiyam sa napulo, ug nahimong mas dako og bili niini alang kanila, ug mas daghan sila og nahimo niini kaysa unsa ra ang ilang mahimo kon wala pa sila magmatinuoron sa Ginoo.”1
Si Deborah nakadawat og mga panalangin “sa temporal ug espirituhanon” (Mosiah 2:41) samtang nagtuman siya sa balaod sa ikapulo ug migamit sa mga baroganan sa ebanghelyo sa iyang badyet. Ang direksiyon gikan sa iyang grupo sa pagbarog pinaagi sa kinaugalingong paningkamot ug sa inspirasyon gikan sa Espiritu Santo nakahatag og paagi aron siya makakuha og rekomend sa templo ug makabalik sa templo. “Ang tanan nga akong gisulti nga dili nako mahimo, Iyang gipakita nako nga mahimo nako kana ug sobra pa kaayo” mipamatuod siya. “Kon unsa ang imong buhaton karong adlawa maoy motino sa imong kaugmaon, ug gusto nako nga ang akong kaugmaon mao nga makasulod ko sa Detroit Temple ug makasugod na usab sa paghimo sa buhat alang sa akong mga kagikanan.”
Litrato pinaagi sa maayong kabubut-on ni Berry ug Light Chu
Paglingkawas gikan sa Utang
Si Berry Chu sa Middle Taipei Stake sa Taiwan nagkinahanglan og kaalam lapas pa sa iyang panabot human siya mibuhi og puhonan nga wala molampos, hinungdan nga nakautang siya og dako. Ang sitwasyon nakaparalisar ni Berry sa mubong panahon nga wala siya makapadayon. Apan si Berry mipaubos sa iyang kaugalingon ug nangayo og tabang sa Langitnong Amahan pinaagi sa pag-ampo. Gikan niana nga pag-ampo, nakaangkon siya og kaisog sa pagsulti sa iyang bana kon unsa ang nahitabo. Sa malumo ug mapaubsanong paagi, ang bana ni Berry, si Light Tsai, mipasalig kaniya nga makakaplag sila og paagi ug masulbad ang utang. Silang duha, si Light ug Berry nag-ampo aron mangayo og giya sa Ginoo.
Gibati ni Berry ug Light nga makabenepisyo sila gikan sa pagbarog pinaagi sa kinaugalingong paningkamot nga kurso sa Simbahan alang sa personal nga panalapi. Bisan sa hilabihan kadako nga utang, nakahimo sila og plano sa pagbayad. Pinaagi sa tabang gikan sa kurso, nakakat-on sila nga “unahon ang ikapulo ug … atimanon ang mga panalapi sa diosnon nga paagi,” miingon si Berry. “Nakakat-on usab kami sa pagbadyet ug sa pag-una sa among mga galastohan alang sa mga kinahanglanon lamang.”
Dili lang kay si Berry ug Light nakakat-on sa pagbadyet sa ilang kinitaan sa responsable nga paagi, apan ang ilang grupo sa personal nga panalapi usab nakadasig ni Berry sa pagpangita og laing trabaho. Ang kausaban misangpot sa mas taas nga suweldo, nga iyang magahin sa pagbayad sa iyang utang.
Nagkahiusa sa ilang tumong, si Berry ug Light migamit sa tanan nilang mga bonus, mga puhonan, ug sobra nga kinitaan gikan sa ilang full- ug part-time nga mga trabaho aron mabayran ang utang ni Berry. Sa tabang sa Ginoo, ilang naatiman ang tanan nilang mga galastohan ug, labing importante, nakabayad gihapon sa ikapulo ug nakahatag og ubang mga halad.
Ang Ginoo namahayag, “Mao kini ang akong katuyoan sa paghatag sa akong mga santos. … Apan kini kinahanglan nga pagahimoon sa akong kaugalingon nga pamaagi” (Doktrina ug mga Pakigsaad 104:15–16). Ang mga indibidwal ug mga pamilya sa tibuok kalibotan nakakita kon giunsa Niya pagsangkap kanila samtang ilang gituman ang mga baroganan sa espirituwal ug pinansiyal nga pagbarog pinaagi sa kinaugalingong paningkamot.
Pagtudlo sa “Unsaon,” Dili Lang ang “Unsa”
Si Curtis ug Pshaunda Scott, nga taga Texas, USA, silang duha gusto nga mahimong maalamon sa ilang panalapi, apan dili sila magkasabot kon unsaon. Si Pshaunda nasayod nga nagkinahanglan sila og medikal nga insurance, apan si Curtis nasayod nga wala silay igong ikabayad niini. Bisan tuod gihiguma nila ang usag usa, ang ilang magkalahi nga panglantaw sa panalapi nakahatag og kabug-aton sa ilang kaminyoon. “Kon kabahin na sa panalapi,” Si Pshaunda nakahinumdom, “Managlahi ang among mga panglantaw ug mga hunahuna sa panalapi.”
Miuyon si Curtis. “Ang kwarta kanunay nga makapaluya nga hisgotanan, ug dunay importante nga mga pagsultihanay nga wala namo mabuhat.”
Misugyot ang bishop nga si Pshaunda ug Curtis magsugod sa pagtambong sa kurso sa pagbarog pinaagi sa kinaugalingong paningkamot nga gitanyag sa stake.
Nasurprisa si Curtis kon sa unsang paagi nga ang bukas nga paghisgotanay sa ilang klase misalir para niya. Nakahimo siya sa pagpasabot sa iyang hunahuna ug nakaangkon og panabot gikan sa uban kinsa nakasabot sa kahimtang sa iyang pamilya. Ang panaghisgot sa grupo nakatabang ni Curtis aron makakaplag dili lang sa mga baroganan sa ebanghelyo apan usab sa mga praktikal nga paagi sa paggamit niini. Sulod sa unom ka tuig gikan sa iyang bunyag, si Curtis kanunay nga gitudloan nga kinahanglan iyang dugangan ang iyang hugot nga pagtuo, himoong mas maayo ang iyang mga pag-ampo, ug magpaduol pa ngadto sa Manluluwas, apan gibati niya nga ang kurso sa pagbarog pinaagi sa kinaugalinong paningkamot nakatudlo niya kon unsaon sa paghimo niana nga mga paglambo.
Samtang nakat-on si Curtis kon unsaon paggamit ang mga baroganan sa ebanghelyo sa iyang mga panalapi sa balay ug sa iyang mga negosyo, mas napalawom ang iyang kahibalo sa gugma sa Ginoo alang kaniya. “Kini sa tinuoray nakapalig-on sa akong pagtuo ug pagsabot sa pag-atiman ug paghunahuna sa Langitnong Amahan alang kanato,” miingon siya.
Si Pshaunda mibati nga ang espirituwal nga aspeto sa kurso sa pagpabarog pinaagi sa kinaugalingong paningkamot nakatabang niya nga makasabot kon sa unsang paagi nga gani ang mga butang mahitungod sa panalapi mohaom ngadto sa plano sa Ginoo. “Nakalig-on kini sa akong pagpamatuod … sa hinayhinay nga lakang, sa hinayhinay nga pagsunod sa matag lagda.”
Ang pag-apil sa mga pagtulon-an sa Ginoo sa ilang pinansiyal nga mga desisyon sa kataposan misangpot sa pagkahiusa sa panabot ni Curtis ug Pshaunda. “Nahimo kaming usa ka team,” miingon si Pshaunda. “Dili ko moingon nga dato mi o nga mas daghan ang among kwarta, apan segurado nga nagpadulong mi sa insakto nga direksiyon.”