Pagkahimong usa ka Saksi

Moroni nagpakita kang Mary Whitmer sa mga palid nga bulawan

Niadtong tingpamulak sa 1829, gipadayon ni Mary ug Peter Whitmer si Joseph ug Emma Smith ug si Oliver Cowdery sa ilang panimalay aron ang paghubad sa bulawan nga mga palid makompleto. Ang mga panginahanglan sa panahon ni Mary dako kaayo. Nag-atiman siya sa siyam ka tawo sa iyang kaugalingong panimalay ug nagtabang sa iyang minyo nga mga anak nga nagpuyo sa duol.

Lima sa anak nga lalaki ni Mary ug ang duha sa iyang (sa kadugayan nahimong) umagad nga mga lalaki nahimong opisyal nga mga saksi sa palid nga mga bulawan niadtong Hunyo 1829. Nianang sama nga bulan, si Mary nakadawat sa iyang kaugalingong pagsaksi.

Sa gawas sa iyang panimalay, usa ka ubanon nga tawo nga may dala nga napsak nga gisab-it sa iyang abaga miduol kang Mary ug miingon, “Ang akong ngalan si Moroni. Gikapoy kaayo ka sa tanang dugang gimbuhaton nga kinahanglan imong buhaton.” Gikuha ang napsak gikan sa iyang abaga, si Moroni mipadayon, “Nagmatinud-anon kaayo ka ug nagmakugihon sa imong mga gimbuhaton. Busa, angay lang, nga makadawat ikaw og usa ka pagpamatuod aron ang imong hugot nga pagtuo malig-on” Dayon iyang gipakita ang sulod sa napsak—ang bulawan nga mga palid.¹

Si Mary nahimong saksi sa bulawan nga mga palid, sama sa Tulo ka mga Saksi ug Walo ka mga Saksi, kansang mga pagpamatuod anaa sa pasiuna nga mga pahina sa Basahon ni Mormon. Ang pagkamapainubsaon ug pagkakugihan ni Mary miandam kaniya aron mahimong usa ka saksi. Ang iyang pagpamatuod wala masulat diha sa pasiuna nga mga pahina sa Basahon ni Mormon, ug ang iyang ngalan wala mabutang sa mga plake, sa mga monyumento, o sa mga hunahuna sa daghang mga Santos nga nagsunod kaniya. Bisan kon ang iyang inadlaw nga mga kontribusyon sa iyang panimalay ug pamilya sagad wala mahibaloi sa kadaghanan, kini nakita sa Dios.

Si Elder Dieter F. Uchtdorf sa Korum sa Napulog Duha ka Apostoles mitudlo:

“Ang Ginoo mohukom nga lahi kaayo kay sa paagi nga atong buhaton. Siya mahimuot sa halangdon nga sulugoon, dili ngadto sa nagdahom sa kaugalingon nga halangdon.

“Kadtong mapainubsanon nining kinabuhia magasul-ob unya og mga mahimayaong korona sa umaabot.”²

Ang talaan ni Moroni karon gihubad ngadto sa Basahon ni Mormon, ug mahimo kitang makadawat og usa ka pagpamatuod sa pagkatinuod niini sumala sa saad nga gibilin ni Moroni sa kataposan niini nga mga pahina: “Ako moawhag kaninyo nga kamo mangutana sa Dios, ang Amahan sa Kahangtoran, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahom sa Espiritu Santo.” (Moroni 10:4).

Nakabati ba kamo nga ang inyong mga kalisod bug-at kaayo apan ang inyong mga paningkamot wala panumbalinga? Ang Langitnong Amahan nakaila kaninyo, ug Siya nasayod sa maayo nga inyong gibuhat. Samtang magbuhat kamo og maayo (tan-awa sa Mga Buhat 10:38), magserbisyo nga walay pagpasigarbo, ug magsiksik sa mga kasulatan, ang Espiritu Santo mopamatuod sa kamatuoran sa ebanghelyo nganha kaninyo.

Mga Anak ni Mary ug Peter Whitmer Sr.

Christian Whitmer	Jacob Whitmer	John Whitmer	David Whitmer	Catherine Whitmer (Page)	Peter Whitmer	Elizabeth Ann Whitmer (Cowdery)
Usa sa Walo ka mga Saksi	Usa sa Walo ka mga Saksi	Usa sa Walo ka mga Saksi	Usa sa Tulo ka mga Saksi	Naminyo ni Hiram Page, usa sa Walo ka mga Saksi	Usa sa Walo ka mga Saksi	Naminyo ni Oliver Cowdery, usa sa Walo ka mga Saksi