“Pagkaplag og Bug-os nga Pagkaayo pinaagi ni Jesukristo,” Liahona, Ene. 2024.
Nagkatigulang nga Matinud-anon
Pagkaplag og Bug-os nga Pagkaayo pinaagi ni Jesukristo
Uban sa akong bag-ong nakaplagan nga kagawasan, mga oportunidad, ug lulinghayaw nga naangkon tungod sa pagpuyo nga nag-inusara, nganong wala man ko mobati og katagbawan? Unsay kulang?
Paghulagway pinaagi ni Dilleen Marsh
Miagas ang mga luha samtang nag-ampo ko alang sa kalinaw sa dihang ang akong kinamanghorang anak nga lalaki nagsulat sa iyang aplikasyon sa pagka-misyonaryo. Gusto gyod ko nga magmisyon siya. Akong gihimo. Kanunay kong misulay sa pagkombinsir sa akong kaugalingon bahin niini.
Gimahal nako ang akong Manluluwas ug tinuoray nga naghinamhinam sa oportunidad sa akong anak nga lalaki nga mopakigbahin sa hingpit nga kalipay nga among makaplagan pinaagi ni Jesukristo. Apan sa kinahiladman nahadlok ko nga mobiya siya. Nasayod ko nga dili na gayod siya mopauli sa panimalay human sa iyang misyon. Bisan kon mopuyo pa siya sa panimalay, lahi na kaayo kini.
Ang akong mga higala misulti nako nga ang panahon sa pagpuyo nga mag-inusara nindot kaayo. Ang akong bana ug ako naghinamhinam ug nagpaabot sa kagawasan ug mga oportunidad nga wala namo masinati samtang nagpadako sa among mga anak.
Uban niining bag-ong nakaplagan nga kagawasan, akong gilingaw ang akong kaugalingon ngadto sa lainlaing mga kalihokan. Mibiyahe ko kuyog sa akong bana, nagkat-on sa pagtugtog sa organ alang sa akong calling, nakigdula sa akong mga apo, ug naghimo sa buhat sa templo ug sa family history.
Akong nakaplagan ang kahinam ug lulinghayaw. Akong nakaplagan ang pagpalambo sa kaugalingon. Akong nakaplagan ang nindot nga mga butang.
Apan sa kanunay morag adunay kulang. Morag adunay wala diha. Sa dihang mibiya ang akong anak nga lalaki, nadala niya ang dakong bahin sa akong kasingkasing nga morag dili nako mahulipan.
Mga usa ka tuig sukad sa pagbiya sa akong anak nga lalaki, aduna koy kasapoton sama sa kasapoton sa akong mga anak niadtong mga bata pa sila. Ang akong bana mitan-aw nako ug miingon, “Michelle, kinahanglan ka nga moserbisyo.” Miapil ko og usa ka oportunidad sa pagserbisyo.
Nagsakit gihapon ang akong kasingkasing. Naglisod ko sa pagpaapil sa akong kaugalingon ngadto sa pagserbisyo o bisan unsang uban pa nga mga panimpalad. Kay ang tanan nakong mga anak wala na sa panimalay, mibati ko nga ang akong kinabuhi dili na matibuok pag-usab.
Usa ka gabii sa dihang nag-ampo ko alang sa tabang, ang Espiritu mipahibalo nako nga ako nagsinati og kahaw-ang tungod sa pagkawala—pagkawala sa katuyoan. Nagtuo ko og makaya ra nako kanang partikular nga kaguol pinaagi sa paghulip sa akong kinabuhi sa tanan niadtong nindot nga mga kalihokan.
Pagpangita og mga Tubag
Samtang nangita ko og mga tubag, akong nakit-an kining pamahayag gikan sa kasaysayan ni Propeta Joseph Smith: “Kon mawala kanato ang [usa ka butang o usa ka tawo] kang kinsa kita mipahimutang sa atong mga kasingkasing mahimo kining usa ka pasidaan ngari nato. … Ang atong mga pagbati kinahanglang ipahimutang diha sa Dios ug sa iyang buhat sa mas hugtanong paagi kaysa diha sa atong isigkatawo.”1
Ang gamhanan nga kahayag milamdag sa ngitngit nga panganod sa akong kasingkasing. Misulay ko sa paghulip sa hilabihan ka lawom nga kasubo pinaagi sa mga butang, mga kalihokan, ug mga kasinatian—pagserbisyo, paghigugma, pagpalambo sa mga talento. Tanang maayo nga mga butang, apan wala kini makahulip sa dako nga lungag. Wala kini moayo sa paagi nga akong gikinahanglan nga kaayohan.
Akong naamgohan nga ang matang sa kalinaw ug katagbawan moabot lamang pinaagi sa atong Manluluwas, si Jesukristo. Si Jesus mitudlo, “Ako ang dalan, ang kamatuoran, ug ang kinabuhi” (Juan 14:6). Pinaagi lamang Kaniya nga kita makakaplag og kalipay ug katibuok ug kalinaw ug kakontento. Ang Salmo 16:11 nag-ingon, “Gitultolan mo akosa dalan paingon sa kinabuhi; ang imong presensya naghatag kanakog tumang kalipay.”
Giunsa Nako Pag-usab
Ang kinabuhi wala mausab dihadiha dayon. Ang akong kasingkasing wala mausab dihadiha dayon. Apan ako nasayod kon asa ko kinahanglang motutok aron mahitabo kini.
Ang akong mga pag-ampo nausab. Misugod ko sa paghangyo sa Langitnong Amahan sa pagtabang nako nga makaugmad og lig-ong relasyon uban sa akong Manluluwas. Kon mawad-an ko og kadasig, pahinumdoman nako ang akong kaugalingon nga si Jesukristo anaa alang nako, ug pinaagi sa grasya sa Iyang maulaong gahom, Siya motabang nako. Ang akong pagtuon sa kasulatan mas nakatutok sa pag-ugmad og lig-ong relasyon uban Kaniya. Migahin kini og panahon, apan mipadayon sa pagpunting sa akong mga emosyon, akong kusog, ug akong mga hunahuna ngadto kang Jesukristo.
Samtang gibuhat nako kini, ang bug-at nga kangitngit nagsugod sa pagkahanaw. Akong nakaplagan ang mas dakong kalipay diha sa mga buhat sa pagserbisyo ug paghigugma sa matag adlaw. Ang kahayag ug paglaom midan-ag sa akong dalan ug mihulip sa kahaw-ang sa akong kasingkasing. Ang pag-una sa Manluluwas nakahatag og mas lawom nga kahulogan ug kalipay ngadto sa matag aspeto sa akong kinabuhi, gikan sa pagserbisyo ngadto sa paggahin og panahon sa akong pamilya, gikan sa pagbiyahe ngadto sa pagpalambo sa akong mga talento. Ang tanan nahimong mas nindot uban kang Kristo diha sa taliwala.
Ang panaw sa matag usa latas sa nagkausab-usab nga panahon sa kinabuhi talagsaon. Hinuon, ang solusyon sa atong mga kasubo mao ang pagtubag sa panawagan ni Kristo sa dihang Siya miingon, “Duol ngari kanako uban sa bug-os nga kasingkasing, ug Ako modawat [kaninyo]” (3 Nephi 18:32). Pinaagi lamang Kaniya nga kita makakaplag og tinuod nga kaayohan, kalinaw, gugma, ug kalipay.
Ang tagsulat nagpuyo sa Utah, USA.