“Nganong Wala Man Usaba sa Dios ang Akong Kinabuhi?,” Liahona, Ene. 2024.
Mga Young Adult
Nganong Wala Man Usaba sa Dios ang Akong Kinabuhi?
Sa dihang ang akong kaminyoon napuno sa kahadlok ug kabalaka, nakakat-on ko mahitungod sa gahom sa kabubut-on.
Sa dihang nag-edad ko og 23 anyos, giselyo ko didto sa templo ngadto sa tawo nga akong gipangandoy. Wala ko makahinumdom og mas malipayon nga adlaw sa tibuok nakong kinabuhi.
Apan ang tanang butang nga kanunay nakong gilaoman sa akong kinabuhi nagsugod sa pagkausab sa negatibo nga paagi nga paspas kaayo. Ang akong bana nag-anam og ka hilabihan ka abusado sa pisikal ug emosyonal nga paagi ngari kanako.
Gibati nako ang kalibog ug kasakit. Wala ko makasabot ngano nga ang akong pagkamatinud-anon daw wala makahimo og kausaban sa akong kaminyoon. Nakaserbisyo ko og full-time nga misyon, nagtuman sa akong mga pakigsaad, nagsunod sa mga kasugoan, ug gani nagserbisyo isip usa ka temple worker. Apan bisan giunsa nako og sulay nga mas maduol ngadto kang Jesukristo, ang akong kaminyoon nahimong mas lisod.
Naglantaw sa nangagi, naamgohan nako nga bisan tuod nagmainampoon ko sa pagkonsiderar kon ako bang minyoan ang akong bana ug adunay hugot nga pagtuo nga among masulbad ang mga problema, akong gibaliwala ang mga timailhan sa potensiyal nga mga problema nga sa kaulahian mitumaw sa among kaminyoon.
Pagpangita og mga Tubag
Human sa lima ka tuig nga kamingaw ug pag-abuso, ang akong relasyon sa Langitnong Amahan ug ni Jesukristo nagkalisod. Ang akong mga gilaoman alang sa akong kinabuhi nagubag ug wala matuman.
Mibati ko og kasakit ug walay paglaom.
Sa dihang naklaro na nga ang akong bana dili andam nga mag-usab, nagsugod ko sa paghangyo sa Dios aron luwason ko gikan sa akong sitwasyon o aron ipakita nako ang insakto nga buhaton. Apan sa dihang ang mga tubag nga akong gikinahanglan wala moabot, nagsugod ko sa pagbasol sa Langitnong Amahan isip ang hinungdan sa akong kasakit.
Nagpadayon ko sa pagtambong sa simbahan ug pagtuman sa akong mga pakigsaad, apan ang akong kasingkasing napuno sa kahiubos tungod sa kakulang sa direksiyon.
Dayon usa ka adlaw nakaamgo ko nga adunay tubag sa akong sitwasyon—kinahanglang gamiton nako ang akong kabubut-on sa paglihok ug pag-usab sa akong mga sitwasyon. Ug nasayran nako kon unsa ang labing maayong desisyon alang kanako alang sa akong kinatas-an nga tumong nga mahibalik ngadto sa Langitnong Amahan.
Sa kataposan nakahukom ko nga magpadayon: nakig-estorya ko sa akong bana, ug sa milagrosong paagi, among gitapos ang among relasyon diha sa maayong panagsabot.
Ang Gahom sa Pagpili
Kining malisod nga kasinatian nakatabang nako nga makakat-on mahitungod sa gahom ug sa dakong importansiya sa atong hinatag sa Dios nga gasa sa kabubut-on.
Si Presidente Dallin H. Oaks, Unang Magtatambag sa Unang Kapangulohan, nagtudlo: “Sa paghunahuna niini, makita nato unsa ang dakong kalainan sa pipila sa atong mga pagpili nga gihimo sa atong mga kinabuhi. Kita makahimo og mas maayo nga mga pagpili ug mga desisyon kon atong tan-awon ang mga alternatibo ug unsa ang sangpotanan niini. Kon buhaton nato, kita nagsunod sa tambag ni Presidente Russell M. Nelson nga mosugod nga maghunahuna sa unsa ang atong tumong. Alang kanato, ang atong tumong kanunay nga anaa diha sa dalan sa pakigsaad pinaagi sa templo ngadto sa kinabuhing dayon, ang labing mahinungdanon sa tanang mga gasa sa Dios.”1
Nakaamgo ko nga ang Langitnong Amahan dili manghilabot sa kabubut-on ni bisan kinsa—Gitugotan ko niya nga mohimo sa akong kaugalingon nga desisyon sa pagpakigminyo sa akong bana. Dili usab niya pugson ang akong bana nga mag-usab, bisan tuod nga naghupot ko sa akong mga pakigsaad, tungod kay ang mahangtorong kaminyoon nagkinahanglan og espirituwal ug temporal nga paningkamot gikan sa duha ka tawo samtang magsunod sila kang Kristo.
Kon mag-atubang og mga panlimbasog, makagamit kita sa atong kabubut-on aron mausab ang atong panglantaw, ang atong mga kinaiya, ug gani ang atong mga kaugalingon. Mao kana ang balaanon nga gasa sa kabubut-on. Ang Langitnong Amahan gusto nga mangita kita Kaniya ug sa Espiritu ug dayon mosalig sa atong mga kaugalingon aron mohimo sa labing maayo nga mga desisyon alang sa atong kinabuhi.
Pagduol ngadto sa Manluluwas
Sa sinugdanan naglaom ko nga mamaayo ko ug dihadiha dayon mopadayon gikan sa giabusahan nga kaminyoon, apan ang proseso hinay ug lisod. Pinaagi sa makapaayo nga mga himan, pagpaminaw sa mga mensahe sa propeta, pagbasa sa mga kasulatan, pag-ampo, ug pagbati sa gugma ug suporta gikan sa mga higala ug pamilya, gibati nako ang paglaom alang sa mas maayo nga kaugmaon. Samtang akong gigamit ang akong kabubut-on aron mamaayo, naglantaw ko sa usa ka kinabuhi nga naglangkob sa kapasayloan ug maanindot nga relasyon ngadto sa uban, lakip na sa Manluluwas.
Uban sa nagkadugang nga pagsabot kon unsaon sa paggamit ang kabubut-on sa akong kinabuhi, ang akong kalagot sa Dios nausab ngadto sa pagsabot, ug ang akong relasyon ngadto Kaniya naayo.
Mao kini ang kahulogan sa ebanghelyo—paghimo sa atong kaugalingong mga pagpili aron moduol kang Kristo, mosunod sa tambag gikan sa mga propeta kinsa moawhag kanato sa paggamit sa atong kabubut-on sa pagsalig sa Ginoo, ug pagmugna og maanindot, puno sa hugot nga pagtuo nga kinabuhi.
Sama sa gitudlo ni Sister Camille N. Johnson, Kinatibuk-ang Presidente sa Relief Society: “Ang labing halangdon nga baroganan sa kabubut-on, sa pagkatinuod, magtugot kanato sa pagsulat sa atong kaugalingon nga mga sugilanon. … Apan si Jesukristo andam nga mogamit kanato isip balaan nga mga instrumento … aron sa pagsulat og usa ka obra-maestra … kon [kita] adunay hugot nga pagtuo nga tugotan Siya, kon [kita] motugot nga Siya mosulat sa [atong] sugilanon.2
Ang pagtapos sa akong kaminyoon maoy usa sa labing sakit nga mga kasinatian nga giatubang nako sukad. Apan nakakat-on ko nga kon mag-atubang og wala damha nga mga pagsulay sa kinabuhi, makapangita kita og espirituhanon nga giya ug mohimo og mga desisyon nga mopauswag kanato diha sa dalan sa pakigsaad. Pinaagi sa pagsunod sa Langitnong Amahan ug ni Jesukristo, kanunay kita nga makabaton og paglaom sa maayong mga butang nga moabot ug sa Ilang gisaad nga mga panalangin sa kalinaw ug kamaya.
Ang tagsulat nagpuyo sa Chile.