Usa ba Ako ka “Tig-ubog” o “Tigsawom”?

Diha sa damgo ni Lehi sa kahoy sa kinabuhi (tan-awa sa 1 Nephi 8), sa imong hunahuna ngano man nga ang ubang tawo mibiya sa kahoy ug ang uban nagpabilin diha sa kahoy aron mokaon sa bunga? Ang ubang tawo nga nakakaon sa bunga mibiya, naulaw sa nanagsinggit nga pundok sa katawhan diha sa dako ug lapad nga gambalay. Usa sa mahinungdanong kalainan tali niadto nga mga grupo adunay kalabotan sa unsay ilang gihimo sa wala pa sila moabot didto: kon giunsa nila paggunit diha sa gunitanan nga puthaw—ang pulong sa Dios.

Nanggunit o sa Kanunay Naggunit

Nakita ni Lehi nga kadtong “mipadayon paingon sa unahan … nanggunit sa gunitanan nga puthaw” ug kadtong “mipadayon sa ilang agianan paingon sa unahan, nga sa kanunay naggunit sa gunitanan nga puthaw” (1 Nephi 8:24, 30).

Si Elder David A. Bednar sa Korum sa Napulog Duha ka Apostoles miingon nga tulo ka grupo nagsugod diha sa agianan, apan ang duha lang ka grupo ang naggunit sa gunitanan nga puthaw:

“[Ang ikaduha nga grupo] usab adunay gidugang nga panalangin sa gunitanan nga puthaw, ug sila nanggunit niini! … Ang panggunit sa gunitanan nga puthaw alang kanako nagsugyot sa panagsa ra nga ‘paghimo’ sa pagtuon o dili kanunay nga pagtuon imbes kanunay, padayon gayod nga pagtuon sa pulong sa Dios. …

“Ang ikatulo nga grupo mipadayon usab sa unahan nga adunay hugot nga pagtuo ug konbiksyon; bisan pa niana, walay timailhan nga sila nahisalaag. … Tingali kining ikatulong grupo sa mga tawo makanunayong nagbasa ug nagtuon ug nagsiksik sa mga kasulatan. … Kini ang grupo nga kinahanglang paningkamotang apilan ninyo ug nako.”¹

Kita ba mga “tig-ubog” o mga “tigsawom” kon bahin kini sa pagsinati sa pulong sa Dios? Bisan kon ang mga tig-ubog ug ang mga tigsawom parehong nabasa, ang mga tigsawom adunay mas lawom ug makanunayon nga kasinatian nga makahatag og nagpadayon nga kalipay.