“Si Jesukristo diha sa Basahon ni Mormon,” Liahona, Ene. 2024.
Jesukristo diha sa Basahon ni Mormon
Pila ka higayon gihisgotan ang Ginoo diha sa Basahon ni Mormon?
Kinsa ang imong isulti nga maoy labing mahinungdanon nga tawo diha sa Basahon ni Mormon? Samtang ang uban mosugyot nga si Nephi, si Alma, o si Mormon, ang tinuod nga labing mahinungdanon nga tawo mao si Jesukristo. Si Nephi misulat:
“Kay kami nagkugi sa pagsulat, aron sa pagdasig sa among mga anak … sa pagtuo kang Kristo. …
“Ug kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo” (2 Nephi 25: 23, 26).
Niadtong 1978 si Susan Ward Easton mimantala og usa ka talagsaon nga artikulo, nagpadayag pinaagi sa numero nga si Jesukristo mao ang labing mahinungdanon nga tawo sa Basahon ni Mormon. Iyang gilista ang lainlaing mga ngalan ni Jesukristo ug gipakita nga gihisgotan Siya gamit ang ngalan mismo o titulo sa 3,925 ka higayon diha sa Basahon ni Mormon, nga gibanabana nga kausa sa matag 1.7 ka bersikulo.1
Kining bililhon nga pagtuon naghatag og dakong importansiya sa pagkasentro sa Manluluwas diha sa Basahon ni Mormon; hinuon, dako ang pagkunhod sa ihap sa gidaghanon sa paghisgot ni Kristo kay wala man iapil sa ihap ang mga panghulip sa Iyang ngalan [pronouns].
Sa kataposan, ang gidaghanon sa mga pakisayran alang ni Jesukristo dili mao ang labing importante nga detalye nga angay kat-onan gikan sa Basahon ni Mormon, hinuon, ang matag pakisayran alang Niya makatudlo kanato mahitungod sa Iyang balaanong kinaiyahan ug misyon. Among gitun-an pag-ayo ang Basahon ni Mormon, nangita sa tanang paghisgot ni Jesukristo, lakip sa mga titulo ug mga panghulip sa ngalan. Among nakita ang tanang 7,452 ka mga pakisayran—gibanabana nga sobra sa usa ka pakisayran sa matag bersikulo.2 Ang mga titulo ni Kristo naglangkob sa mga 50 ka porsento sa mga pakisayran mahitungod kang Kristo diha sa Basahon ni Mormon, ug ang nahabilin naggikan sa panghulip nga ngalan.
Ang pagpangita kang Jesukristo maghatag og talagsaong paagi sa pagkat-on kabahin Niya. Ikonsiderar kon sa unsang paagi nga ang mosunod nga bersikulo naghatag og gibug-aton Kaniya: “Sugdi ang pagtuo sa anak sa Dios, nga siya moanhi sa pagtubos sa iyang katawhan, ug nga siya mag-antos ug mamatay aron sa pagtubos sa ilang mga sala; ug nga siya mobangon pag-usab gikan sa mga patay, nga mao ang magpahinabo sa pagkabanhaw, nga ang tanan nga mga tawo mobarog sa iyang atubangan, aron pagahukman sa kataposan ug sa adlaw sa paghukom, sumala sa ilang mga buhat.” (Alma 33:22).
Sa orihinal nga pagtuon ni Sister Easton, kini nga bersikulo maihap unta nga usa ka pakisayran ngadto ni Kristo gikan sa titulo nga “Anak sa Dios .” Hinuon, ang Manluluwas gihisgotan sa lima pa ka higayon. Kini nga bersikulo nagpasabot og maayo nga si Jesukristo dili lang mao ang Anak sa Dios apan usab nga Siya mao ang motubos kanato pinaagi sa Iyang mahangtorong Pag-ula ug Pagkabanhaw ug mao ang mohukom kanato.
Tingali sa labing gamhanang paagi, si Kristo naghisgot sa Iyang Kaugalingon diha sa Basahon ni Mormon. Pananglitan, atong mabasa nga ang Manluluwas nag-ingon, “Kon ang mga tawo moduol ngari kanako Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila” (Ether 12:27). Bisan tuod ang ngalan ni Kristo dili makita niini nga bersikulo, ang Manluluwas naghisgot sa Iyang Kaugalingon sa walo ka higayon. Ang iyang tahas gihatagan og dakong importansiya samtang mangita kita sa Manluluwas niini nga tudling.
Ang mosunod nga mga bersikulo nagpakita og personal nga koneksiyon nga gibati sa Manluluwas ngadto niini nga mga indibidwal ug unsay ilang gibati ngadto Kaniya:
“Duol kamo ngari kanako, aron kamo mohikap pinaagi sa inyong kamot sa akong kilid, ug usab kamo mobati sa mga agi sa lansang sa akong mga kamot ug sa akong mga tiil, nga kamo masayod nga Ako mao ang Dios sa Israel, ug ang Dios sa tibuok yuta, nga gipatay tungod sa mga sala sa kalibotan.
“… Ang pundok sa mga katawhan miduol ngadto kaniya, ug mihikap pinaagi sa ilang mga kamot ngadto sa iyang kilid, ug mibati sa mga agi sa mga lansang sa iyang mga kamot ug sa iyang mga tiil” (3 Nephi 11:14–15).
Bisan tuod dili nato mabati sa pisikal ang Iyang mga marka, pinaagi sa Basahon ni Mormon atong mapalawman ang atong personal nga pagsaksi ni Jesukristo.
Ang kasagad sa mga pakisayran ngadto sa Ginoo diha sa Basahon ni Mormon makatabang kanato nga makakita sa Iyang pagkasentro niining sagrado nga buhat. Ang pag-ila sa Manluluwas diha sa Basahon ni Mormon: Lain nga Tugon ni Jesukristo usa ka gamhanang paagi sa pagpaduol ngadto Kaniya.