Digital Lamang: Mga Young Adult
5 ka Leksiyon gikan ni Nephi Kon ang Kinabuhi Wala Mahitabo sama sa Giplano
Makakat-on kita gikan sa mga tubag ni Nephi ngadto sa mga hagit ug pagkawalay kaseguroan.
Ang pagka-young adult usa ka makapahinam nga panahon sa kinabuhi, puno sa mga oportunidad alang sa kalamboan ug kausaban. Apan usa usab kini ka yugto nga puno sa mga gilaoman—mga gilaoman nga atong gibutang sa atong kaugalingon, kultural o soyal nga mga gilaoman, ug gani mga gilaoman diha sa plano sa Langitnong Amahan alang sa Iyang mga anak. Kita tingali adunay mga ideya kon sama sa unsa ang atong propesyon o sosyal nga kinabuhi o gitakda nga panahon kon kanus-a nato makab-ot ang mahinungdanong mga gipangandoy. Ug tingali magdahom kita nga hatagan kita sa tanan nga atong gitinguha kon kita matarong ug magpaduol sa Ginoo.
Apan ang kamatuoran mao, ang kinabuhi panagsa ra nga mouyon sa paagi nga atong gilaoman.
Kon ang kinabuhi wala mahitabo sa paagi nga inyong giplano, wala kamo mag-inusara. Si Nephi, usa sa bantogan nga mga propeta sa Basahon ni Mormon, nahiagom usab sa kahigawad ug sa dili matag-an nga mga hagit.
Ang mga butang nagpadayon nga dili maayo samtang si Nephi ug ang iyang pamilya nagbiyahe paingon sa gisaad nga yuta. Apan bisan pa man sa daghang kalisdanan ug mga pag-abuso ug pagsukol nga nadawat, si Nephi mipadayon latas sa dili maayo nga mga kahimtang, nagmasaligon sa Ginoo. Ania ang lima ka butang nga gitudlo sa mga ehemplo ni Nephi nga atong buhaton kon ang kinabuhi wala mahitabo sama sa giplano.
Sulayi Pag-usab (1 Nephi 4:1–3)
Human sa dili malamposong pagsulay ni Laman sa pagkuha sa mga palid nga tumbaga gikan ni Laban, si Nephi ug ang iyang mga igsoong lalaki misulay pag-usab. Niining higayona, si Laban mipagukod nila sa iyang mga guwardiya ug ang mga igsoong lalaki hapit wala makaeskapo. Sa dihang miabot ang anghel aron sa pagpanton ni Laman ug ni Lemuel tungod sa pagpangdagmal kang Sam ug kang Nephi tungod sa pagkawalay kadasig, siya misugo nila nga sulayan pag-usab ang pagkuha sa mga palid. Apan niining ikatulong pagsulay, si Nephi nagmalamposon.
Kabahin sa unsay gitudlo sa kasinatian ni Nephi kanato mao nga bisan kon dili kita makasinati og kalamposan sa paagi nga atong gidahoman, kon kita magpadayon nga mosulay, ang Ginoo motabang nato nga molambo, makat-on, ug motubo samtang magpadayon kita sa pagsalig Kaniya.
Pagpasaylo (1 Nephi 7:20–21)
Human nga ang pamilya ni Ishmael mikuyog sa pamilya ni Lehi sa kamingawan, si Laman ug si Lemuel ug ang pipila ka anak ni Ishmael misupak ni Nephi. Gigapos nila ang iyang mga tiil ug mga kamot ug nagplano sila nga pasagdan siya hangtod mamatay. Apan, pinaagi sa kalig-on gikan sa Ginoo, si Nephi mibugto sa iyang mga gapos. Sa dihang si Laman ug si Lemuel nangamuyo alang sa kapasayloan, si Nephi wala mosilot nila pinaagi sa kasilag, pagbati og kamatarong sa kaugalingon, o pagpanaway. Siya mipasaylo nila dihadiha dayon ug nagpadayon sa unahan sa pagkamasulondon sa Ginoo.
Usahay ang kataposang butang nga gusto natong buhaton mao ang pagpasaylo sa tawo nga nakapasakit nato. Apan kon atong buhian ang kasuko ug kayugot, atong mapasulod ang kalinaw ngari sa atong kinabuhi ug maluwas nato ang atong kaugalingon ug ang uban sa wala kinahanglana nga pag-antos. Ug makapadayon kita sa unahan uban sa paglaom ug kalinaw ni Kristo.
Lihok (1 Nephi 16:23)
Samtang si Nephi ug ang iyang mga igsoong lalaki nangayam, ang asero nga gapasan ni Nephi nabali, ug sila wala nay pagkaon. Gimahay nila si Nephi, ug gani si Lehi misugod sa pagbagulbol batok sa Ginoo tungod sa ilang kagutom ug pag-antos. Apan si Nephi midumala niini sa iyang kaugalingon ug milihok. Naghimo siya og kahoy nga gapasan ug pana, unya mihangyo ni Lehi nga mangutana sa Ginoo kon asa sila mangita og pagkaon.
Sama ni Nephi, kita makapangita og paagi kon kita mag-atubang og problema. Kita makausab sa atong panglantaw bahin sa atong mga kahimtang ug makaandam sa atong kaugalingon sa pagtinguha og tambag gikan sa Ginoo, mosalig nga Siya mohatag nato og direksiyon.
Modangop ngadto sa mga Kasulatan (1 Nephi 17:22–42)
Sa dihang si Laman ug si Lemuel mibugalbugal niya tungod sa pagsugod sa paghimo og usa ka barko, si Nephi mikutlo sa mga kasulatan aron ipakita ngadto nila ang kaimportante sa pagsunod sa mga sugo sa Ginoo. Gipahinumdoman niya ang iyang mga igsoong lalaki nga si Moises, pinaagi sa gahom gikan sa Ginoo, mitunga sa Pulang Dagat ug mitabang sa mga Israelita nga makaeskapo gikan sa Ehipto.
Sa higayon nga kita maglisod sa pagsabot sa impluwensya sa Ginoo sa atong kinabuhi, makadangop kita ngadto sa mga kasulatan aron makabaton og bag-ong panglantaw ug inspirasyon samtang mangita kita og kasusama tali sa atong mga kasinatian ug niadtong sa karaang mga propeta.
Mosalig sa Ginoo (2 Nephi 4:19–35)
Niini nga kapitulo, si Nephi gibuntog sa kagul-anan tungod sa iyang mga kahuyang, mga sala, ug mga tentasyon. Apan ang iyang kasubo milungtad lamang og tulo ka bersikulo. Sa madaogong paghinumdom, si Nephi nahinumdom “kang kinsa [siya] mosalig” (bersikulo 19) ug namahayag nga “dili mobutang sa [iyang] pagsalig diha sa gahom sa tawo” (bersikulo 34).
Ang mga pulong ni Nephi nagpahinumdom nato nga, kon mapakyas kita sa pagtuman sa mga gilaoman sa bisan unsa nga matang, kita makadangop ngadto sa Ginoo ug makasalig sa Iyang matubsanong gahom.
Ang kinabuhi puno sa wala damha nga mga pagtipas ug mga pagliko, ug usahay ang pagkadili matag-an morag lisod kaayo dawaton.
Apan sama sa gitudlo ni Presidente Russell M. Nelson bag-ohay lang: “Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulon-an ni Jesukristo. Pagkat-on pa og dugang bahin sa Iyang Pag-ula, sa Iyang gugma, sa Iyang kalooy, sa Iyang doktrina, ug sa Iyang gipahiuli nga ebanghelyo sa pagkaayo ug paglambo. Dangop ngadto Kaniya! Sunod Kaniya!”1
Ug asa pa man ang mas maayo nga kadangpan alang sa Iyang gugma ug mga pagtulon-an kaysa mga pulong sa mga propeta diha sa Basahon ni Mormon? Ang mga pagtulon-an gikan sa karaang mga propeta sama ni Nephi gisulat alang sa atong panahon, ug kita sa kanunay makakaplag og kalinaw, kahupayan, ug kaseguroan bahin sa umaabot gikan sa mga kamatuoran niini sa higayon nga ang kinabuhi daw dili mahitabo sa paagi nga atong gilaoman.
Ako modapit ninyo sa pagtuon sa mga pagtulon-an ug sa mga kamatuoran sa Basahon ni Mormon karong tuiga.