Alang sa mga Ginikanan

Pagkaplag sa Kahayag sa Manluluwas diha sa Basahon ni Mormon

Minahal nga mga Ginikanan,

Ang isyu niini nga bulan naghatag og mga ideya mahitungod sa Basahon ni Mormon isip mao ang kurikulom sa Dali, Sunod Kanako alang sa 2024. Ang mga artikulo sa ubos naghisgot og mga yawe sa pagpangita sa kahayag ug kamatuoran diha sa kalibotan nga napuno sa kangitngit ug kalibog.

Mga Panaghisgotan sa Ebanghelyo

Pagpangita sa Kahayag sa Manluluwas

Ikonsiderar ang pagpakigbahin ngadto sa imong pamilya og pipila ka ideya gikan sa artikulo ni Presidente Eyring diha sa pahina 4, ug hisgoti ang tahas nga mahimo sa kahayag ngari sa atong kinabuhi. Rebyoha ang istorya ni Kamryn mahitungod sa pagpangita sa Manluluwas diha sa kangitngit. Sa unsang paagi nga ang imong pamilya makapangita sa kahayag sa Manluluwas pinaagi sa imong pagtuon sa Basahon ni Mormon niining tuiga?

Asa Pangitaon ang Kamatuoran

Ang Dios mao ang tinubdan sa tanang kamatuoran, ug kita makakat-on sa Iyang kamatuoran pinaagi sa makugihong pagpangita niini. Si Elder ug si Sister Silva kinahanglan nga modesisyon kon asa mopuyo inigpauli human sa misyon, mao nga nagtinguha sila og giya gikan sa Ginoo (tan-awa sa pahina 20). Kanus-a nga ang Ginoo mihatag kanimo sa giya nga imong gikinahanglan?

Tan-awa ang Dugang pa diha sa Inyong Pagtuon sa Ebanghelyo

Kon mobisita sa usa ka museyo sa art, ang mga tawo kasagaran magdalidali nga makita ang tanan kutob sa ilang mahimo, nga maoy hinungdan nga posible nilang malabyan ang katahom sa art. Ingon usab niana, mahimong malabyan sa mga magbabasa sa Basahon ni Mormon ang importante nga mga kamatuoran kon magdalidali sila sa pagbasa. Unsa ang mga estratehiya nga makatabang nato sa pagtan-aw og maayo niini nga basahon sa kasulatan? Tan-awa sa pahina 12 alang sa pipila ka ideya.

Dali, Sunod Kanako Kalingawan sa Pamilya

Ang Higpit ug Pig-ot nga Dalan

1 Nephi 8; 11; 15

Ang pagkaon sa bunga sa kahoy sa kinabuhi usa ka simbolo sa pagpili sa kinabuhing dayon pinaagi ni Jesukristo (tan-awa sa 1 Nephi 15:36; Doktrina ug mga Pakigsaad 14:7). Sulayi kini nga kalihokan sa pagkat-on kon sa unsang paagi nga ang puthaw nga gunitanan (ang pulong sa Dios) mogiya nato ngadto niining labing mahinungdanon nga gasa sa Dios.

1. Ipapilit ang hulagway sa kahoy sa kinabuhi diha sa bungbong.

2. Ipapilit ang lambo (nagrepresentar sa puthaw nga gunitanan) ubos sa hulagway, ug pabaroga ang usa ka tawo sa pikas nga bahin sa lawak nga naggunit sa pikas nga tumoy sa lambo.

3. Orasi kon unsa ka dugay nga ang gipurongan nga bata molakaw gikan sa usa ka tumoy sa lawak ngadto sa kahoy sa kinabuhi nga dili mogunit sa pisi.

4. Karon orasi kon unsa ka dugay nga maabot ngadto sa kahoy sa kinabuhi samtang naggunit sa pisi.

Hisgotanan: Unsa ang atong mabuhat aron mogunit og maayo sa puthaw nga gunitanan ug dili gayod mamuhi?

Gikan sa Alang sa Kalig-on sa mga Kabatan-onan nga Magasin 

2024 nga Tema sa Kabatan-onan

Hibaloi ang 2024 nga tema sa kabatan-onan nga, “Ako Usa ka Tinun-an ni Jesukristo,” nga adunay usa ka mensahe gikan sa Kinatibuk-ang mga Kapangulohan sa Young Women ug Young Men ug usa ka bag-ong kanta mahitungod sa tema.

Ang Imong Pagkatawo isip usa ka Disipulo

Ang kabatan-onan makat-on mahitungod sa ilang pagkatawo isip mga disipulo ni Jesukristo pinaagi sa pagtan-aw kon unsay gihimo sa mga disipulo ug kon giunsa nila kini paghimo.

Pagpakasama ni Sam

Tan-awa kon unsay atong makat-onan mahitungod sa paglikay sa pagkomparar ngadto sa uban pinaagi sa pagkat-on sa ehemplo sa magulang nga igsoong lalaki ni Nephi nga si Sam.

Gikan sa Higala nga Magasin

Tabang gamit ang Dali, Sunod Kanako

Pangitaa ang mga tsart sa pagbasa, sinemana nga mga kalihokan, mga istorya sa kasulatan, ug uban pa aron matabangan ang inyong mga bata mahitungod sa pagbasa sa Basahon ni Mormon niining tuiga.

Mga Paagi sa Pagbasa sa Basahon ni Mormon

Ang isyu niini nga bulan naglakip sa mga istorya bahin sa mga bata nga nakakaplag og talagsaong paagi sa pagbasa sa Basahon ni Mormon. Tan-awa ang mga tip sa pagtabang nga mapalambo ang inyong pagtuon sa pamilya.

Pagsunod ni Jesus diha sa Thailand

Himamata si Panya ug hibaloi kon giunsa niya sa pagsunod si Jesus. Dayon ipadayon ang pagbasa aron makat-on pa og dugang mahitungod sa Thailand.

Mga Tip alang sa Pagtakda og mga Tumong

Gamita ang mga sugyot diha sa seksiyon sa Alang sa Mas Magulang nga mga Bata aron matabangan ang inyong mga bata sa pagtakda og mga tumong alang sa programa sa Kabataan ug Kabatan-onan.