“Hunong sa Pagtandi! Ikaw Igo Na ka Maayo,” Alang sa Kalig-on sa mga Kabatan-onan, Ene. 2024.
Dali, Sunod Kanako
Hunong sa Pagtandi! Ikaw Igo Na
Ania ang upat ka butang nga atong makat-onan gikan sa usa sa mga magulang nga igsoong lalaki ni Nephi.
Mga paghulagway ni Corey Egbert
Anaa kadtong usa ka estudyante sa usa ka klase kinsa kanunay makamao sa hustong tubag. Ang bata sa basketball team kinsa kanunay nga mopildi kaninyo sa pag-shoot sa bola. Ang tawo nga ang tanan gusto nga makighigala. Sa kalibotan sa mga pagtandi, kini ingon og kanunay adunay usa ka tawo nga mas maayo.
Ang pagtandi mahimong labihan ka malisod kon kini moabot sa pagpuyo sa ebanghelyo. Kamo mahimong maghunahuna nga ang uban mas matarong, adunay mas malig-on nga pagpamatuod, o mobati sa Espiritu nga mas klaro kay kaninyo. Apan ang pagtandi sa inyong mga kaugalingon sama niini dili makatabang.
Gikan sa Basahon ni Mormon, kamo tingali nahibalo nga si Nephi usa ka gamhanang lider ug propeta. Apan unsa ka daghan ang inyong nahibaloan mahitungod sa matinud-anong magulang nga igsoong lalaki ni Nephi, si Sam? Siya dili usa ka lider o propeta sama ni Nephi, apan siya wala magkinahanglan nga mahisama ni Nephi aron mahimong igo na.
1. Nagtuo si Sam
Si Nephi miampo ug nakakuha og tubag alang sa iyang kaugalingon nga ang Ginoo misugo sa ilang pamilya sa pagbiya ngadto sa kamingawan. Ug si Sam “mituo sa mga pulong ni [Nephi]” (tan-awa sa 1 Nephi 2:16–17). Mahimong si Sam walay hingpit nga pagpamatuod. Tingali siya adunay mga pangutana. Apan siya mipili sa pagtuo diha sa mga pulong sa iyang igsoong lalaki ug unya siya milihok diha sa iyang mga pagtuo. Ayaw itandi ang inyong hugot nga pagtuo o pagpamatuod ngadto sa ubang mga tawo. Samtang kamo naglihok diha sa hugot nga pagtuo sama sa gibuhat ni Sam, ang inyong pagpamatuod sa Manluluwas motubo sa hinayhinay. (Tan-awa usab sa Doktrina ug mga Pakigsaad 46:13–14; Alma 32.)
2. Si Sam Mapainubsanon
Sila ni Laman ug Lemuel dili malipayon nga ang ilang mas manghod nga igsoong lalaki nahimong usa ka lider ibabaw kanila. Apan si Sam, kinsa magulang nga igsoong lalaki ni Nephi usab, tingali gayod mapainubsanon. Maminaw siya ni Nephi ug misunod sa iyang tambag (tan-awa sa 2 Nephi 5: 3–6). Kon ang uban nga naglibot kaninyo hangyoon sa pagpangulo ug kamo wala hangyoa, pagmapainubsanon, ug ayaw pagtandi. Suporta kanila, pagkat-on gikan kanila, ug himoa ang inyong labing maayo sa pagpili sa matarong.
3. Si Sam Mapailobon
Kini maingon og ang tanan nga naglibot kaninyo nagpuyo og hingpit nga kinabuhi, apan ang tanan moagi og malisod nga mga panahon. Si Sam apil niini. Sila ni Laman ug Lemuel mibatok ni Sam, sama nga sila mibatok ni Nephi. Gani ilang gibunalan si Sam og bunal, sama sa ilang pagbunal ni Nephi! (Tan-awa sa 1 Nephi 3:28; 1 Nephi 7:6.) Apan si Sam mapainubsanong milahutay sa iyang mga pagsulay. Ang pag-antos og malisod nga mga panahon dili kinahanglan nga magpasabot nga kamo nagbuhat og usa ka butang nga sayop. Ayaw itandi ang inyong mga pagsulay ngadto sa mga pagsulay sa ubang mga tawo. Pagmapainubsanon ug salig diha sa Ginoo. Siya motabang kaninyo sa pagsugakod.
4. Napanalanginan si Sam
Ang amahan ni Sam, si Lehi, misulti ni Sam, “Ikaw panalanginan sa tanan nimo nga mga adlaw” (2 Nephi 4:11). Si Sam wala tingali mahimong usa ka lider o propeta, apan siya sa gihapon matinud-anong misunod ni Jesukristo, ug siya napanalanginan tungod niini. Uban sa tabang sa Manluluwas, siya igo na sa ka maayo. Ug kamo makahimo usab.