“Pilia ang Kahayag!,” Alang sa Kalig-on sa mga Kabatan-onan, Ene. 2024.
Dali, Sunod Kanako
Ulohan nga pahina sa Basahon ni Mormon; Pasiuna sa Basahon ni Mormon
Pilia ang Kahayag!
Ang Basahon ni Mormon nagdala og kahayag ug gahom nganha sa inyong kinabuhi sa paggiya kaninyo diha sa mahagiton ug kulba-hinam nga mga adlaw nga umaabot.
Paghulagway ni Gabriele Cracolici
Isip usa ka bata nga lalaki gusto nako ang istorya sa igsoon nga lalaki ni Jared diha sa Basahon ni Mormon. Akong nakita ang iyang kasinatian ingon og usa ka salida diha sa akong hunahuna. Kini ingon og hapit mahimong mahitabo samtang ako nagbasa mahitungod niini.
Ang igsoong lalaki ni Jared gisugo sa Ginoo sa pagtukod og mga kasko aron siya ug ang iyang pamilya makatabok sa lawod ngadto sa “usa ka yuta sa saad” (Ether 2:9). Apan ang mga kasko ngitngit. Dili buot mobiyahe sa ngitngit, ang igsoong lalaki ni Jared nangalyupo sa panabang sa Ginoo. Ang Ginoo nangutana kaniya, “Unsa ang buot nimo nga Ako kinahanglan mobuhat?” (Ether 2:23).
Uban sa dakong hugot nga pagtuo, ang igsoong lalaki ni Jared midala og 16 ka bato didto sa tumoy sa bukid ug miampo. Mihangyo siya sa Ginoo sa paghikap sa mga bato “nga sila mohayag diha sa ngitngit” (Ether 3:4). Ang Ginoo mituy-od sa Iyang kamot ug mihikap sa matag bato sa Iyang tudlo, naghatag niini og kahayag. Sa akong tibuok nga kinabuhi, akong nahulagway ang Ginoo nga naghikap niadtong mga bato.
Sama lamang nga ang igsoong lalaki ni Jared nahatagan og kahayag, ang Ginoong Jesukristo modala og kahayag nganha kaninyo. Siya mao “ang kahayag ug ang kinabuhi sa kalibotan” (3 Nephi 11:11). Nagdapit ako kaninyo nga pilia ang Kahayag! Ang pagtuon sa Basahon ni Mormon molig-on sa inyong hugot nga pagtuo diha ni Jesukristo ug motabang kaninyo sa pagpabilin nga may kalabotan ngadto sa Iyang Kahayag.
Usa ka Giya ug usa ka Kahayag
Akong nabasa ang Basahon ni Mormon ug gibati ang usa ka saksi sa makadaghang higayon nga kini tinuod. Wala gayod ako magduhaduha niini. Kon ako dili mobati sa Espiritu, kon ako wala malinya sa espirituhanong paagi, akong bation ang kangitngit. Apan kon ako mobasa sa Basahon ni Mormon, ang kahayag mobalik. Usahay kini mokabat lamang sa pagbasa og usa ka bersikulo nga ako mobati sa kahayag pag-usab, apan ako sa kanunay mobati sa kahayag kon ako magbasa niini.
Ang kahayag nagbuntog sa kangitngit tinuod alang kanako. Si Presidente Russell M. Nelson nag-ingon, “Kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw.”1 Kini tungod kay ang Basahon ni Mormon nagdugang sa inyong hugot nga pagtuo diha ni Jesukristo. Kini nagdala og kahayag ug gahom. Ang mga pagtulun-an niini mogiya kaninyo diha sa mahagiton ug kulba-hinam nga mga adlaw nga umaabot.
Pagbati sa Kahayag
Nakabaton ako og panalangin sa pagserbisyo kauban ni Presidente Nelson. Kon mosulod ang propeta ngadto sa usa ka kwarto, dihadiha dayon bation nga ang kwarto mas nagdan-ag. Nagdala siya sa Kahayag ni Kristo uban kaniya.
Usahay kini usa ka panlimbasog nga masiguro nga gibati ninyo ang Kahayag ni Kristo. Dili ninyo makita kini sa inyong pisikal nga mga mata. Kini moabot isip usa ka espirituhanong mga pagbati. Kini mao ang pagbati kon unsa ang matarong ug daotan ug unsa ang tinuod ug bakak (tan-awa sa Moroni 7:13–19).
Bisan kanus-a kamo magpili nga mahimong mas mahisama ni Jesukristo, kamo maglakaw diha sa Kahayag ni Kristo. Ang pagbasa sa Basahon ni Mormon naglig-on niana nga Kahayag.
“Sa Pagkatinuod, Kini Tinuod!”
Ako sa tinuoray nagtuo nga kon ang mga kasulatan nag-ingon, “Hinumdomi, hinumdomi” (Helaman 5:12), kini nagpasabot nga kita kinahanglan dili lamang maghinumdom ni Jesukristo o maghinumdom nga kita sa makausa mibati sa Iyang Kahayag. Kinahanglan gayod nga atong bation ang Iyang Kahayag karon ug bation kini og balik-balik. Kana mao ang unsay nadiskobrehan sa usa ka batan-ong lalaki, si Eric, sa panahon nga iyang gibasa ang Basahon ni Mormon.
Human sa pagbalhin ngadto sa usa ka bag-ong lugar ug pagsugod sa hayskul, si Eric nanlimbasog diha sa iyang mga klase ug nakaplagan nga malisod ang pakig-uban. Misugod usab siya sa pagduhaduha kon siya aduna bay pagpamatuod.
“Misugod ako sa pagbasa og seryoso sa Basahon ni Mormon sa unang higayon sa akong kinabuhi,” miingon si Eric. “Mibasa ug miampo ako matag adlaw.”
Sa dihang miampo si Eric ug nangutana sa Langitnong Amahan kon ang Basahon ni Mormon tinuod ba, nakasiguro siya nga makakuha siya og tubag, apan walay nahitabo.
Pila ka higayon wala madugay, samtang naglakaw ngadto sa mga kakahoyan luyo sa iyang balay, nangutana pag-usab si Eric. Niini nga higayon, siya adunay pagbati, ingon og ang Langitnong Amahan nangutana kaniya, “Eric, unsa ang nahitabo sa imong kinabuhi sukad ikaw misugod sa pagbasa sa Basahon ni Mormon ug nag-ampo kada adlaw?”
Gihunahuna ni Eric ang mahitungod kon giunsa niya sa pakighigala sa maayong mga higala ug mas namaayo sa eskwelahan. Wala makaamgo niini, ang Basahon ni Mormon nakadala og kahayag ug gahom nganha sa iyang kinabuhi.
Dayon kini nahitabo.
“Wala ako makadungog og tingog,” miingon si Eric, “apan ang Espiritu mipuno sa akong kasingkasing samtang kini nga mga pulong miabot sa akong hunahuna: ‘Sa pagkatinuod, kini tinuod!’ Usa ka makasanap nga pagbati sa kalinaw, hingpit nga kalipay, ug kasigurohan mipuno kanako. Ako nahibalo nga sa kataposan akong nakaplagan ang akong tubag.”2
Padayon sa Unahan diha sa Kahayag
Gikan sa unang pahina niini ngadto sa kataposan niini, ang Basahon ni Mormon nagpamatuod nga si “Jesus mao ang Kristo”3 ug kini nagtudlo kanato kon “unsa ang [atong] kinahanglan gayod nga pagabuhaton aron maangkon ang kalinaw niini nga kinabuhi ug ang kaluwasan sa kahangturan sa kinabuhi nga umaabot.”4
Samtang kamo magtuon sa Basahon ni Mormon, ako manghinaot nga inyong bation nga kini gisulat alang kaninyo. Ang mga doktrina diha sa Basahon ni Mormon ug ang maisogong mga panig-ingnan ni Nephi, Lehi ug Sariah, Abinadi, Alma, Amulek, Abish, ang mga anak nga lalaki ni Mosiah, ug daghang uban pa mobayaw, mogiya, ug mohatag og gahom kaninyo nga mahimong mas maayong tinun-an ni Jesukristo ug mogiya kaninyo sa paglakaw nga masaligon sa Iyang Kahayag.
Ako magpamatuod nga ang Basahon ni Mormon usa ka bililhon ug tinuod nga saksi nga si Jesukristo buhi ug mao ang atong tinubdan sa kahupayan, paglaom, kalinaw, hingpit nga kalipay, ug kahayag. Nag-ampo ako uban sa akong tibuok nga kasingkasing nga kamo mopili sa Kahayag nga makaplagan diha sa Basahon ni Mormon, mas mopaduol ngadto ni Jesukristo, ug mobati sa kainit sa Iyang kahayag ug gugma nga mas labaw kay sa kamo sukad aduna kaniadto.