“Usa ka Piloto diha sa Kasundalohan sa Ginoo,” Alang sa Kalig-on sa mga Kabatan-onan, Ene. 2024.
Usa ka Piloto diha sa Kasundalohan sa Ginoo
Si Lamar F. gikan sa East Midlands sa England adunay dagko nga mga tumong nga nagpabilin kaniya sa pagpalupad og taas bisan og ang mga butang nagkalisod.
Mga litrato gihatag pinaagi ni Satomi Folkett
“Ganahan ko nga magpalupad og mga eroplano sukad sa akong mahinumdoman,” ang 17 ka tuig ang edad nga si Lamar F. nag-ingon. Sa dihang usa ka higala gikan sa iyang mga adlaw sa pagkiglumba og wheelchair misulti kaniya mahitungod sa usa ka British nga kalooy [charity] nga nagtabang sa mga tawo nga may kakulangan sa pagkat-on og pagpalupad, si Lamar naghinamhinam sa pagsulay.
Langit ang Gitas-on nga mga Damgo
Mipirma siya sa duha ka mga programa sa charity. Usa niini, ang Junior Aspiring Program (JAPP), espesyal nga gihimo alang sa mga kabatan-onan tali sa mga edad nga 12 ug 18. Kini nga mga programa ug ubang solo nga mga leksiyon tanan nagdala kaniya usa ka lakang nga nagkaduol ngadto sa iyang dako nga tumong––pagkuha sa iyang Pribado nga Lisensya sa Pagkapiloto.
Kabahin sa iyang inspirasyon nagagikan sa iyang pamilya. Ang nag-amuma nga papa ni Lamar mao ang unang tawo nga naghatag kaniya og kadasig sa pagpalupad, nagdala kaniya ngadto sa mga eksibisyon sa mga eroplano matag tuig. Sa kadugayan, human siya gisagop sa laing pamilya sa edad nga kwatro, ang kagusto ni Lamar sa pagpalupad og eroplano mipadayon sa paglambo samtang gitan-aw niya ang iyang nagsagop nga amahan nga nagtinguha og lisensya sa pagkapiloto. “Siya ang akong inspirasyon sa pagkamahimong piloto,” nag-ingon si Lamar. Karon ang iyang papa makasakay uban kaniya sa usa ka palabad [single-propeller], lima ka lingkoranan [five-seater] nga mga eroplano nga si Lamar nagtuon sa pagpalupad.
Ang mga ginikanan ni Lamar (gilitratohan dinhi anaa sa isig ka kilid kaniya) mao ang pipila sa iyang labing dagko nga mga suporta.
Sa unang pagpalupad ni Lamar sa usa ka tinuod nga eroplano, mibati siya og kakuyaw mahitungod sa paghinumdom sa tanang butang. “Ako misulti og dali, hilom nga pag-ampo sa wala pa ako misaka, ug ako maayo ra,” nag-ingon siya. Karon kon siya maningkamot sa paghinumdom og usa ka butang diha sa kahanginan, kadtong mubo, hilom nga mga pag-ampo nagtabang kaniya sa pagbuhat unsa ang kinahanglan niya nga buhaton. Bisan kon ang iyang papa wala diha sa likod nga lingkoranan, si Lamar nahibalo nga siya sa kanunay adunay iyang Amahan sa Langit nga kauban niya.
Ang Kasundalohan sa Ginoo
Ang pagpalupad dili lamang mao ang naghupot sa espiritu ni Lamar nga malipayon. “Kanunay akong usa ka dakong panatiko sa British nga militar, tanan gikan sa harianong koronasyon ngadto sa usa ka paglubong,” miingon siya.
“Tungod sa akong mga kakulangan, dili ako makasulod sa militar mismo,” nag-ingon si Lamar. Apan usa sa iyang kanhi mga lider sa Young Men kinsa kaniadto usa ka sundalo nakaawhag ni Lamar. Kanunay siya nga mipahinumdom kanako nga ako dili kinahanglan nga usa ka kalibotanong militar tungod kay ako anaa na sa kasundalohan sa Ginoo,” nag-ingon si Lamar. “Ang pagkaanaa sa kasundalohan sa Ginoo naghimo kanako sa pagbati nga dili igsapayan unsay ilabay sa kinabuhi ngari kanako, dili igsapayan unsa ang buhaton ni bisan kinsa ngari kanako, anaa sa akong kiliran si Jesukristo.”
Si Brother Bayliss, Young Men nga lider ni Lamar, midasig kaniya sa pagsulod sa “Ang Kasundalohan sa Ginoo.”
Diha sa kolehiyo sa may mga kakulangan (special-needs college) nga siya nagtambong, naninguha si Lamar sa pagtabang sa ubang mga tawo nga iyang ka edad sa pagsulod sa kasundalohan sa Ginoo samtang siya nagpakigbahin sa ebanghelyo ngadto kanila. “Daghang mga panahon, ako gibalewala,” nag-ingon siya, “apan usahay, naay mainteresado. Tungod sa pipila sa akong mga panginahanglan sa pagkakaron, ang pagserbisyo dayon og full-time nga misyon dili pa angay. Apan nakita ko kini og ingon niini: Wala ako magkinahanglan og name tag nga mahimong usa ka misyonaryo.”
Diyotay kaayo ang mga kabatan-onan diha sa iyang ward, kadaghanan sa mga higala ni Lamar dili mga miyembro sa Ang Simbahan ni Jesukristo sa mga Santos sa Ulahing mga Adlaw. Kana dili kanunay nga sayon diha sa eskwelahan, ilabi na kon adunay mga, ingon sa gisulti ni Lamar bahin niini, “daghan kaayong” mga tintasyon. “Daghan kaayong mga estudyante nga nag-istoryahanay og law-ay nga mga butang ug naminaw og dili angay nga musika. Una sa tanan, kon ang usa ka butang nga sama niana mahitabo, ako mobiya lamang ug moadto sa usa ka lawak diin kana wala mahitabo.”
Pagpabilin nga Lig-on
Kon ang mga tintasyon moabot o ang uban dili interesado sa pagpaminaw mahitungod sa ebanghelyo, gipataas ni Lamar ang iyang paborito nga kasulatan: “Apan alang kanako ug sa akong balay, kami magaalagad sa Ginoo” (Joshua 24:15).
“Kini nga kasulatan nakatabang kanako sa pagpabilin nga lig-on ang hugot nga pagtuo diha ni Jesukristo,” siya nag-ingon. Kini labihan ka importante ngadto ni Lamar diha sa iyang kaugalingong pamilya. Sa dihang si Lamar 10 anyos, ang iyang amahan mihunong sa pag-anha sa simbahan. “Mas bata ako kaniadto, busa wala ako sa hingpit makasabot,” nag-ingon siya. “Naninguha ako sa pagkumbinsir kaniya sa pagbalik. Apan akong nahibaloan nga dili kini mahitungod niana. Hatagan nimo sila og panahon.”
Si Lamar aduna pay suod nga relasyon sa iyang papa ug nagpakita kaniya og pagmahal kada adlaw sa mga paagi, sama sa paagi sa pagsulti kaniya unsay mga panghitabo sa simbahan o sa paggahin og panahon uban kaniya. “Kanunay siya nagtudlo kanako nga dili igsapayan unsa ang imong nasinati, kinahanglan nga ikaw magpabilin nga lig-on.” Ngadto ni bisan kinsa nga mga kabatan-onan nga adunay mga sakop sa pamilya kinsa dili aktibo diha sa Simbahan, nagdugang siya, “Pabilin nga lig-on. Hupot diha sa inyong hugot nga pagtuo. Ayaw pagpadaog, bisan unsa pa.”
Paghangyo ni Kristo Kon Magkalisod
Nakakaplag usab si Lamar og kaisog diha ni Kristo sa laing personal nga mga paagi. “Nag-antos ako usahay ingon og ngil-ad nga kabalaka,” nagsulti si Lamar. “Sa akong paminaw ang kataposang tawo nga maghatag kanako og kaisog sa pagpadayon mao si Jesukristo Mismo. Siya miagi og daghan kaayo, apan Siya mipadayon sa Iyang misyon.”
Sa dihang si Lamar adunay piho nga bati nga adlaw, kasagaran siya maghunahuna sa Manluluwas nga nag-awhag kaniya, nag-ingon, “Ikaw makahimo niini. Ikaw makasugakod og bisan unsa.”
Nagkuha usab siya og kalig-on gikan sa iyang mama ug papa, sa iyang mga higala, ug sa ubang mga tawo kinsa suod nganha niya. “Dihay usa ka panahon diin ingon og ako nahisalaag,” nag-ingon si Lamar. Apan salamat ngadto sa usa ka maayo nga sistema sa pagsuporta, siya nakahimo sa pagtarong sa iyang dalan ug sa paglig-on sa iyang pagpamatuod ni Kristo.
“Sa gihapon nagpalambo pa ako sa akong pagpamatuod,” siya nag-ingon, “apan kini nindot kaayo nga mahimong kabahin sa kasundalohan sa Ginoo ug sa Ang Simbahan ni Jesukristo sa mga Santos sa Ulahing mga Adlaw. Kini usa ka butang nga akong gimahal.”
Ang iyang panaw tingali adunay maayo ug ngil-ad nga mga panahon, apan si Lamar nahibalo kon unsa ang nagpabilin kaniya sa paglupad og taas. “Walay pagsapayan unsa nga mga pagsulay o mga problema nga inyong agian, ang Langitnong Amahan maanaa sa inyong kiliran tungod kay Siya nagpakabana kaninyo ug nagmahal kaninyo.”