Tinun-an ngadto sa Tinun-an

Sa unsang paagi kamo mahimong tinun-an ni Jesukristo? Mas sayon kini kay sa inyo tingaling paghunahuna. Susiha kini nga mga ehemplo nga gipakigbahin sa mga kabatan-onan mahitungod sa mga tinun-an diha sa ilang mga kinabuhi.

Kyler C., edad 13

Gikan sa Guayas, Ecuador. Gusto nga magdula og basketball ug sa biyolin.

Duha sa akong higala gikan sa simbahan, sila ni Arick ug Mike, nakatudlo kanako sa importansya sa pagkatinun-an ni Jesukristo. Ang ilang ehemplo nakatabang kanako sa pagbaton pa og dugang nga tinguha sa pagserbisyo og usa ka misyon. Karon ako naghinamhinam sa pagpakigbahin mahitungod ni Jesukristo ngadto niadtong nanginahanglan.

Ang akong mga higala maayo usab nga mga ehemplo ni Kristo pinaagi sa ilang pagsulti. Nakapakigbahin sila og daghang mga kasinatian ngari kanako mahitungod sa pagsunod ni Jesukristo, nga nakapaawhag kanako nga mas magpaduol ngadto Kaniya. Sama pananglitan, ang akong higala nakatudlo kanako nga kon kita adunay pangutana, kita makapangutana sa Dios. Ug unsaon nato pagkahibalo kon Siya nakatubag? Mahibaloan nato diha sa atong mga kasingkasing. Kana mao ang Espiritu nga nag-ingon nga ang Dios nagsulti ngari kanato ug nga kita nagpili sa hustong dalan.

Ayotunde Raphael A., edad 15

Gikan sa Oyo, Nigeria. Gusto nga mosayaw, mga sports, ug pagtudlo uban ang mga misyonaryo.

Ang akong higala nga si Ewa (angga sa Ewaoluwa) usa ka ehemplo sa usa ka tinun-an ni Kristo ngari kanako. Makausa siya nakapasilo kanako, ug nasuko ako kaniya. Dayon nangayo siya og pasaylo kanako. Pinaagi niana nga proseso, nakat-onan ko ang pagpaubos ug pagpasaylo gikan kaniya. Mapainubsanon kaayo siya sa dihang siya nangayo og pasaylo, ug gipasaylo ko siya.

Ngari kanako, ang pagkatinun-an ni Jesukristo mao ang paghupot sa mga sugo sa Langitnong Amahan, sa paghigugma sa Dios ug sa Iyang Anak, si Jesukristo, ug sa pag-amuma pa og dugang sa uban.

Gabriel A., edad 12

Gikan sa Oyo, Nigeria. Gustong magdula og football (soccer).

Nakaila ako og usa ka batang lalaki gikan sa simbahan kinsa madaogdaogon kaniadto, apan usa ka adlaw kalit siya nga nausab. Mihukom ako sa pagpangutana kaniya, “Nganong nausab ka?” Misulti siya kanako nga siya miampo, mibasa sa iyang mga kasulatan, dihay hugot nga pagtuo, ug naningkamot pag-ayo sa pag-usab sa iyang batasan. Kini mitabang kanako tungod kay kon ako buot nga maghimo og usa ka desisyon, sa akademiko o espirituhanon nga paagi, kasagaran mag-ampo ako alang sa paggiya sa Dios kanako.

Ang akong higala mahimong dili hingpit, apan ang iyang batasan mitandog sa akong kasingkasing. Ako karon kasagaran nga magbasa sa mga kasulatan sa dili pa ako maghimo og bisan unsa nga lakang sa akong kinabuhi. Ang ehemplo sa akong higala nakadala kanako nga mas maduol ngadto ni Kristo tungod kay bisan unsa nga panahon nga ako makasala, ako makabalik ngadto sa Ginoo diha sa pag-ampo ug paghinulsol. Ang pagduol ngadto sa Ginoo nakatabang kanako sa pagsalikway sa akong mga palas-anon.