Ang mga Kasulatan ni Sami

Ni Carolina Maldonado

(Gibase sa usa ka tinuod nga istorya)

Si Sami ganahan usab nga mobasa.

Kini nga istorya nahitabo sa Bolivia.

Si Papi mipakpak sa iyang mga kamot pagkahuman sa family home evening. “Aduna akoy ideya alang sa usa ka tumong sa pamilya,” miingon siya. “Magdungan kita og basa sa Basahon ni Mormon kada adlaw.”

Ang mga magulang nga lalaki ni Sami, si Andrés ug Juan, mitando uban sa dagko nga pahiyom sa ideya.

“OK!” miingon si Andrés.

Naghinam-hinam usab si Sami. Apan dayon aduna siyay nahinumdoman. Siya miisa sa iyang kamot. “Dili ko makamaong mobasa. Unsaon nako sa pagtabang?”

Mikibo si Juan. “Maminaw ka na lang.”

Ang mga igsoong lalaki ni Sami kahibalo na nga mobasa. Apan si Sami singko anyos pa lang. Wala pa siya makat-on sa pagbasa.

“Apan gusto usab nako nga motabang!” Si Sami miingon nga nagmug-ot.

Si Mamá migakos ni Sami. “Ug makatabang ka,” miingon siya. “Kanunay nga adunay paagi aron mabuhat kon unsa ang gisugo sa Dios kanato.”

Pagka sunod gabii, ang pamilya ni Sami nagpundok aron magbasa sa Basahon ni Mormon. Silang tanan nagdala sa ilang kaugalingon nga mga kasulatan, gawas ni Sami. Si Mamá mihatag niya og libro sa mga hulagway sa mga istorya sa Basahon ni Mormon.

“Dili pa ka makabasa sa mga pulong. Apan makabasa ka og mga litrato,” miingon siya nga nagpahiyom.

Gipaduol og kupot ni Sami ang basahon. Karon makabasa na usab siya kauban sa iyang pamilya!

Nagpuli-puli sila sa pagbasa. Gitan-aw ni Sami ang mga litrato nga nagpakita sa istorya. Sa dihang iya na nga turno, giistoryahan niya ang uban kon unsa ang iyang nakita sa mga litrato. Miistorya siya sa daghang detalye kutob sa iyang mahimo.

Sa paglabay sa mga adlaw, gusto ni Sami nga mobasa pa og mas daghan. Gitudloan siya ni Mamá kon unsa nga tunog ang mahimo sa matag titik. Dayon iyang gipakita niya kon unsaon sa pagpatunog sa mga pulong. Mga bulan ang milabay, dili na kaayo kinahanglan ni Sami ang libro sa mga hulagway. Hinuon, basahon niya ang kataposang pulong sa matag bersikulo nga gibasa sa iyang pamilya. Basahon og una ni Mamá ang pulong, ug basahon kini og balik ni Sami.

Sa sinugdanan, hinay ang ilang pagbasa. Ang pag-abot sa kataposan sa matag kapitulo molungtad og dugay. Si Andrés ug Juan moagumod kon turno na ni Sami. Apan nagbasa gihapon sila isip pamilya.

Sa hinay-hinay, si Sami mas daghan na og mabasa. Mobasa siya og usa ka pulong sa usa ka bersikulo, dayon duha ka pulong, dayon tulo. Dayon nagsugod na siya og basa og tibuok bersikulo!

Sa duol na sa kataposan sa ilang tumong, si Sami makabasa na og pipila ka bersikulo sa iyang kaugalingon. Ang iyang pagbasa mas nagkamaayo. Ang iyang gugma sa Basahon ni Mormon milambo usab.

Sa kataposan, ang pamilya ni Sami nahuman sa Basahon ni Mormon. Miabot kini og duha ka tuig! Karon si Sami siyete anyos na, ug nakat-on na nga mobasa og maayo.

“Pahalipay!” Miingon si Papi. “Nabuhat nato!”

Si Sami miabiba kauban sa iyang pamilya. Siya nakatabang nila nga mahuman ang Basahon ni Mormon!

Si Juan migakos og maayo ni Sami. “Unsa ang imong tumong sa mosunod nga duha ka tuig?”

Mipahiyom si Sami. Mibarog siya ug miingon, “Akong basahon og usab ang Basahon ni Mormon!”

Unsa ang nakatabang ni Sami nga makabasa sa mga kasulatan?

Mga paghulagway pinaagi ni Melissa Manwill Kashiwagi