“Panahon sa Katulogon nga Pagbasa sa Kasulatan,” Higala, Ene. 2024, 30–31.
Panahon sa Katulogon nga Pagbasa sa Kasulatan
Bisan og sayo pa to, si Elvira nasayod nga ang pagbasa sa mga kasulatan maayo gayod.
Kini nga istorya nahitabo sa Norway.
Nakamata si Elvira sa tingog ni Papa. “Panahon na alang sa mga kasulatan,” miingon siya.
Milingkod siya sa higdaanan ug milugod sa iyang katulogon nga mga mata. Ngitngit pa sa gawas. Ug bugnaw kini! Si Elvira dili gusto mobiya sa iyang haruhay nga higdaanan.
Miingon si Mama nga ang pagbasa sa mga kasulatan mao ang paagi nga makaila sila og maayo kang Jesus. Apan ang pagbasa sa mga kasulatan matag buntag lisod!
Si Elvira hinay nga misaka sa hagdanan ug mitapad og lingkod sa iyang magulang nga babaye, si Sigrid, diha sa sopa. Gigakos niya ang unlan ug mibalokot sa mainiton nga humok niyang habol. Ang iyang mga igsoong lalaki tua sa pikas kwarto nagsugod na sa ilang online nga klase sa seminary.
Ang telepono ni Papa mibagting. Iya kining gitubag, ug mipakita diha sa screen ang mga miyembro sa pamilya. Si Tiya Liv nakasinina ug andam na nga motrabaho. Ang ilang ig-agaw, si Dorthea, nag-pajama pa, pareho kang Elvira.
Mikawaykaway si Elvira ngadto nila sa video call ug nanghuy-ab. Kanunay silang may panahon sa kasulatan uban ni Tiya Liv ug Dorthea. Nagpuyo sila sa laing bahin sa Norway upat ka oras ang gilay-on. Mas sayon para nilang tanan sa pagbasa sa mga kasulatan kon duna silay tumong sa pagtawag sa matag usa kada adlaw. Ug si Elvira ganahan kaayo makigkita sa iyang ig-agaw!
Pipila ka minuto human niadto, miapil usab si Mama sa tawag. “Kumusta mo!” miingon siya. Mobiyahe siya alang sa trabaho karong semanaha, apan nanawag gihapon siya alang sa panahon sa pamilya alang sa kasulatan.
Militok sila og pag-ampo. Dayon giabli ni Elvira ang iyang mga kasulatan. Dungan silang nagbasa sa Basahon ni Mormon. Nagpuli-puli sila sa pagbasa sa mga bersikulo.
Naminaw si Elvira samtang nagbasa ang uban, apan lisod ang magpabiling nagmata. Si Sigrid nakatulog og balik sa sopa. Gipikpik siya ni Elvira. Apan adunay usa ka butang diha sa bersikulo ang nakakuha sa iyang pagtagad.
“Ug ako nakakita og usa ka gunitanan nga puthaw, ug kini naglugway subay sa daplin sa suba, ug nagpaingon ngadto sa kahoy diin ako nagbarog,” mibasa si Dorthea.*
“Ako nasayod niini nga istorya!” Miingon si Elvira. “Damgo kini ni Lehi.” Nakakita siya og bidyo sa kasulatan mahitungod niini. Dinhay maanindot nga kahoy nga adunay puti nga bunga, ug ang katawhan migunit sa gunitanan nga puthaw aron pagtabang kanila nga makaadto niini.
“Nakahinumdom ba kamo unsa ang gunitanan nga puthaw?” nangutana si Mama.
“Ang mga kasulatan?”
“Sakto kana!” Miingon si Papa. “Nagtudlo si Nephi human niadto nga ang gunitanan nga puthaw nahisama sa pulong sa Dios. Sa unsang paagi kaha nga kita mahimong makagunit sa gunitanan nga puthaw sama sa katawhan sa damgo ni Lehi?”
“Naggunit kita karon sa gunitanan nga puthaw!” Gigunitan ni Elvira ang iyang Basahon ni Mormon. “Pinaagi sa pagpahigayon og panahon sa kasulatan.”
Miyango si Mama. “Kon mobasa kita sa mga kasulatan, mas mapaduol kita ngadto kang Jesuskristo. Sama sa katawhan nga nagpaduol ngadto sa kahoy sa kinabuhi sa dihang migunit sila sa gunitanan nga puthaw.”
Samtang nagpadayon sila sa pagbasa, naghanduraw si Elvira nga naggunit sa gunitanan nga puthaw ug naglakaw paingon sa nindot nga kahoy. Siya wala na gibati nga katulogon.
Sa wala madugay panahon na nga molakaw. Si Tiya Liv ug si Mama kinahanglan na nga motrabaho. Ug si Elvira, Sigrid, ug Dorthea kinahanglan na nga mag-andam para moadto sa eskwelahan.
“Babay ninyong tanan!” Si Elvira miwarawara sa iyang pamilya diha sa screen. “Gihigugma ko kamo!”
Sa iyang pagdagan paingon kanaog aron mag-andam para sa eskwelahan nindot ang gibati ni Elvira. Ug dili tungod sa iyang humok nga habol. Nasayod siya ang nindot nga pagbati mao ang Espiritu Santo nga nagsulti kaniya nga ang Basahon ni Mormon tinuod. Nindot kini nga paagi sa pagsugod sa adlaw!
Paghulagway pinaagi ni Hector Borlasca