“Kamo Makahimo og Kalainan,” Higala, Ene. 2024, 32.
Higala ngadto sa Higala
Kamo Makahimo og Kalainan
Gikan sa usa ka interbiyo uban ni Olivia Kitterman ug Rachel Peterson.
Ang Langitnong Amahan ug si Jesukristo nahigugma kaninyo sa hilabihan. Tungod kay Sila nahigugma kaninyo, Sila nagdapit kaninyo sa paghimo og mga pakigsaad, o mga saad, uban Nila. Kamo magsugod sa paghimo niadto nga mga saad dihang kamo gibunyagan.
Human sa inyong bunyag, makadawat kamo sa gasa sa Espiritu Santo. Mahimo kamo nga usa ka miyembro sa Ang Simbahan ni Jesukristo sa mga Santos sa Ulahing mga Adlaw. Nagpasabot kana nga ang Langitnong Amahan nagsalig kaninyo sa pagtuman sa inyong mga pakigsaad.
Unsa ang inyong mahimo isip usa ka bug-os nga miyembro sa Simbahan sa pagtuman sa inyong mga pakigsaad? Mahimo kamong moabiabi sa uban ngadto sa Primary. Mahimo kamong motapad sa usa ka tawo kinsa bag-o ug tabangan sila nga makat-on sa mga awit. Makatabang kamo sa mga kalihokan sa Primary. Mahimo usab kamong usa ka lider diha sa inyong pamilya. Makahangyo kamo nga mag-ampo sa pamilya o mopakigbahin unsay inyong nakat-onan diha sa Primary.
Human ninyo madawat ang Espiritu Santo, makita ninyo ang panginahanglan sa uban diha sa bag-ong paagi. Makaampo kamo ngadto sa Langitnong Amahan og moingon, “Tabangi ako nga mahibalo kinsa ang akong tabangan karon.” Dayon ang Esiritu Santo makatabang kaninyo nga makabantay og usa ka tawo nga nag-inusarang naglingkod o moingon kaninyo sa pag-ingon og kumusta ngadto sa usa ka higala. Kamo naghimo og dako nga kalainan kon mopili kamo sa pagtabang sa uban. Naglihok kamo isip usa ka miyembro sa Simbahan sa Langitnong Amahan!
Ang Langitnong Amahan nahigugma kaninyo. Gusto Niya nga kamo mopasiugda uban sa inyong ehemplo bisan asa kamo paingon aron makadala kamo sa uban nga maduol Kaniya. Apan dili kinahanglang mag-inusara kamo sa pagbuhat niini. Ang Langitnong Amahan ug si Jesukristo dili gayod mohunong sa pagtabang kaninyo. Kamo makabati og pagsalig tungod kay nasayod kamo nga Sila anaa uban kaninyo. Makahunahuna kamo ni Jesus nga kanunay nagbarog sa inyong kilid.