Dali, Sunod Kanako nga mga Kalihokan

Alang sa home evening o pagtuon sa kasulatan—o lingaw-lingaw lamang!

Enero 1–7

Ang Imong Pagpamatuod

Mga paghulagway pinaagi ni Katy Dockrill

Alang sa Pasiuna nga mga Pahina sa Basahon ni Mormon

Ang Basahon ni Mormon unang gisulat diha sa mga palid nga bulawan. Ang mga tawo nga nakakita sa mga palid misulat nga sila nasayod nga kini tinuod (tan-awa sa Pagpamatuod sa Tulo ka Saksi ug ang Pagpamatuod sa Walo ka Saksi). Isulat o idrowing ang imong kaugalingon nga pagpamatuod sa Basahon ni Mormon ug ibutang kini diha sa imong mga kasulatan.

Alang sa mas gagmay nga mga bata: Pagdungan og tukod og tore. Paghisgot kon sa unsang paagi magtukod kita sa atong pagpamatuod sa Langitnong Amahan ug ni Jesukristo usa ka piraso sa matag higayon.

Enero 8–14

Pagpakigbahin og Bahandi

Alang sa 1 Nephi 1–5

Ang mga kasulatan dako nga bahandi (tan-awa sa 1 Nephi 5:21). Pagdrowing og pipila ka porma sa mutya diha sa papel ug guntinga kini. Hangyoa ang matag tawo sa pagsulat og Basahon ni Mormon nga kasulatan diha sa mga mutya. Sagola ang mga mutya ug papuli-puliha sa pagpili og usa ug basahon ang matag kasulatan.

Alang sa mas gagmay nga mga bata: Pagbuhat og pagpakita-ug-isulti nga paborito nga mga dulaan o mga basahon sa inyong gagmay nga mga bata. Sultihi sila nga makahimo sila sa mga kasulatan nga usa sa ilang paborito nga mga butang pinaagi sa pagpaminaw kanila ug pagkat-on sa mga istorya.

Enero 15–21

Yano ug Labing Bililhon nga mga Palid

Alang sa 1 Nephi 6–10

Ang Ginoo misugo ni Nephi sa paghimo og laing pundok sa mga palid alang sa usa ka linain ug maalamon nga katuyoan (tan-awa sa 1 Nephi 9). Paghimo og imong kaugalingon nga pundok sa mga palid hinimo sa pinilo nga papel o mga piraso sa karton. (Mahimo gani nimong puston ang imong papel o karton sa aluminum foil!) Pagsulat o pagdrowing unsay imong nakat-onan gikan sa Basahon ni Mormon diha sa imong mga palid.

Alang sa mas gagmay nga mga bata: Kantaha ang awit nga “Ang Kaisog ni Nephi” diha sa pahina 13. Matag higayon nga inyong kantahon ang mga pulong nga “moadto” o “mobuhat,” lukso sa hangin!

Enero 22–28

Gugma sa Dios

Alang sa 1 Nephi 11–15

Basaha ang istorya sa kasulatan mahitungod sa damgo ni Lehi diha sa pahina 26. Karon pagdrowing og usa ka kahoy. Padugangi og usa ka dahon sa matag miyembro sa pamilya ngadto sa kahoy ug pasultiha og usa ka butang nga gihatag kanato sa Langitnong Amahan nga nagpakita nga Siya nahigugma kanato.

Alang sa mas gagmay nga mga bata: Ang gugma sa Langitnong Amahan nahisama sa usa ka kahayag diha sa kangitngit. Palunga ang mga suga ug ibutang ang gamay nga suga sa tumoy sa kwarto. Lakaw padulong niini uban sa inyong gagmay nga mga bata.