“Pagpasaylo Sama ni Nephi,” Higala, Ene. 2024, 4–5.
Pagpasaylo Sama ni Nephi
Si Aisea dili gusto nga magpabiling masuko ni Josh hangtod sa hangtod.
Kini nga istorya nahitabo sa USA.
Midagan si Aisea ug gipatiran ang bola padulong sa iyang kauban sa team, si Timothy. Nagtan-aw siya samtang gilabyog ni Timothy ang iyang tiil sa likod ug gipatiran ang bola ngadto sa goal.
“Puntos!” Misinggit si Timothy samtang ang bola miigo sa net.
Miabiba si Aisea. Nakadaog sila sa dula!
Samtang siya milakaw pagawas sa field, nindot ang iyang gibati! Apan dayon usa sa mga bata sa lain nga team, si Josh, mitawag niya og bati nga ngalan.
Mibati og kakurat si Aisea ug nasakitan. Wala siya kahibalo unsa ang isulti. Miduko siya sa yuta ug hinay nga milakaw padulong sa iyang mga kauban sa team.
“Nabuhat nato!” Miingon si Timothy. “Nindot nga pagpasa, Aisea.”
Apan dili maayo ang gibati ni Aisea. Dili human sa gisulti ni Josh niya! Gibati niya ang kasubo ug kasuko.
Sa nahibilin nga mga oras sa adlaw, gibati ni Aisea nga mora og adunay bug-at nga mibira kaniya. Siya dili na ganahan ni Josh.
Nianang gabhiona, milingkod si Aisea kauban sa iyang pamilya atol sa oras sa pagbasa sa kasulatan. Naningkamot siyang maminaw ngadto sa iyang igsoong babaye nga nagbasa. Apan dili siya makahunong og hunahuna mahitungod sa unsay gisulti ni Josh.
Mitan-aw si Aisea sa mga pahina sa iyang Basahon ni Mormon. Mihunong siya sa usa ka kasulatan sa 1 Nephi. Mahitungod kini sa panahon dihang ang mga igsoong lalaki ni Nephi dili mabination kaniya.
“Ug nahinabo nga sa walay lipod-lipod ako mipasaylo kanila,” ang kasulatan nag-ingon.*
Si Nephi mipasaylo sa iyang mga igsoong lalaki? Naghunahuna si Aisea. Bisan human sila nagminaldito og maayo?
Naghunahuna si Aisea mahitungod ni Josh. Dili siya ganahan nga magpabilin ang iyang dili maayo nga gibati ngadto ni Josh hangtod sa hangtod. Siya 10 anyos pa lang!
Gusto si Aisea nga mahimong sama ni Nephi. Makapasaylo siya ni Josh, sama sa pagpasaylo ni Nephi sa iyang mga igsoong lalaki. Ug kon si Josh mosulti og dili maayo na usab nga butang, iya lang siyang hangyoon nga dili kini buhaton.
Gibati niya ang kainit ug kalinaw sa sulod. Kini mora og ang Espiritu Santo nga nag-ingon, “Gihimo nimo ang sakto nga butang.”
“Aisea, unsay imong nakat-onan gikan niini nga mga kasulatan?” Nangutana si Mama.
Miyahat si Aisea. “Pasaylo, nagbasa ko og lahi nga kasulatan,” miingon siya. Gisultihan niya ang iyang pamilya kon unsa ang nahitabo sa soccer.
Gibira ni Mama ug ni Papa si Aisea aron gakson. “Naguol ko nga si Josh nagminaldito nimo,” miingon si Papa. “Ang iyang gisulti dili tinuod. Apan OK lang nga mobati nga nasakitan niini.”
Mipahiyom si Aisea. “Salamat. Sa makadiyot nasuko gayod kaayo ko. Apan karon nga akong nabasa ang mga kasulatan, dili na ko gusto nga masuko niya. Ganahan ko nga mopasaylo niya. Ug mas nindot na ang akong gibati!”
“Maanindot kana!” Mipahiyom usab si Mama. “Ang pagpasaylo dili kanunay nga sayon. Apan sakto ka. Takos kini.”
Gitan-aw ni Aisea ang iyang mga kasulatan. Kini nakatabang kaniya! Ang kabug-at nga iyang gibati kaniadto nawala. Ang iyang kasingkasing mibati na hinuon og kainit ug puno sa kalinaw.
Mga paghulagway pinaagi ni Alyssa Tallent