Ang Among Labing Maayo nga Halad

Ni Dean Cooper, Washington, D.C., USA

Sa higayon nga kita mopahinungod sa usa ka templo, moingon kita ngadto sa Ginoo, “Ania ang among halad. Kinahanglan maayo kini kutob sa atong mahimo.”

Mga duha ka semana sa wala pa ang pagpahinungod pag-usab sa Washington D.C. Temple niadtong Agosto 2022, ang akong boss ug ako nakamatikod nga ang usa sa mga kahoy nga European hornbeam paingon sa templo morag masakiton. Diyotay na lang ang mga dahon diha sa tunga ug adunay nadaot nga mga sanga.

Isip tig-atiman sa mga nataran sa templo, nabalaka ko nga ang matahom nga mga nataran sa templo andam na gawas lamang nianang gamay nga luna. Ang kahoy anaa tupad sa fountain duol sa entrada sa templo.

Aduna kami himsog nga kahoy nga ikapuli nga gitanom sa duol, ug among gihisgotan ang posibilidad nga ibaylo ang himsog nga kahoy sa masakiton nga kahoy. Apan kinahanglan una namong tangtangon ang agianan [sidewalk] sa duol ug ang mga sagbot ug ibalhin ang sprinkler ug elektrikal nga mga linya nga nagsubay diha sa dapit. Ang labing gikahadlokan nako mao nga among ibton ang masakiton nga kahoy, itanom ang puli nga kahoy, ug wala nay panahon aron sa paghimo sa tanan libot sa kahoy nga nindot tan-awon alang sa pagpahinungod pag-usab.

Sa dihang akong gisultihan ang akong asawa, si Carolyn, nga basin among ibalhin ang kahoy, siya mitubag: “Pul-ongi lang ang nadaot nga mga sanga, ug akong pahibaloon ang akong mga sister nga kauban sa pagtuon sa mga kasulatan sa tibuok nasod nga mag-ampo alang niini. Ang mga nataran sa templo iya sa Ginoo. Siya mopanalangin sa kahoy.”

Si Carolyn adunay grupo sa mga higala nga iyang gitawag nga iyang mga sister sa pagtuon sa mga kasulatan—mga miyembro sa Simbahan nga kanhi nagpuyo sa sama nga ward. Nagtuon sila og dungan sa Dali, Sunod Kanako hangtod nga mibalhin silang tanan, apan nagpadayon gihapon sila sa pagkontakanay. Kon ang pag-ampo gikinahanglan, motawag sila sa usag usa.

Human sa pagsulti ni Carolyn nila mahitungod sa masakiton nga kahoy, misulti sila sa ilang mga anak ug ubang mga sakop sa pamilya. Walay ideya si Carolyn kon pila kabuok ang nag-ampo alang sa kahoy, apan siya adunay hugot nga pagtuo nga ang Langitnong Amahan maminaw sa ilang mga pag-ampo.

Sulod lamang sa pipila ka adlaw, ang kahoy adunay migitib nga bag-ong mga dahon, nga mipuno sa dapit nga diyotay na lang og dahon. “Siyempre mas nindot na kini tan-awon,” miingon si Carolyn. Nagpadala siya og mga litrato sa kahoy ngadto sa iyang mga sister sa pagtuon sa mga kasulatan, miingon nila, “Tan-awa kon giunsa kita pagtubag sa Ginoo!”

Nasayod ko nga ang mga tawo nag-ampo alang sa kahoy, mao nga wala ko masurprisa. Nasayod usab ako nga si Presidente Russell M. Nelson sa dili madugay mopanalangin sa templo ug sa mga nataran sa templo atol sa iyang pagpahinungod nga pag-ampo. Ang kahoy ma-OK ra.

Nagpasalamat kami nga ang Ginoo mipasidungog sa among halad ug hugot nga pagtuo.