“O Auala e 3 e Onosaia ai le Olaga ma Olioli Ai,” Liahona, Sete. 2024.
Autalavou Matutua
O Auala e 3 e Onosaia ai le Olaga ma Olioli Ai
E finagalo le Tama Faalelagi ia tatou maua le olioli i le olaga ua tuuina mai ia i tatou.
Guido mai Siamani
O le a le taimi mulimuli na e matuai fiafia ai?
Pe sa faigata ea ona tali lena fesili?
I taimi faigata, atonu ua tatou tamau tele i o tatou tofotofoga lea e le mafai ai ona tatou manatuaina moni pe faape’i le olioli. E pei ona faamatalaina e Sister Reyna I. Aburto, o lē sa avea muamua ma Fesoasoani Lua i le Au Peresitene Aoao o le Aualofa: “E mafai e ao pogisa ona … oo mai i o tatou olaga, lea e mafai ona faatauaso ai i tatou i le malamalama o le Atua ma mafua ai ona tatou fesiligia pe o toe i ai lena malamalama mo i tatou.”
Mo le toatele o i tatou o talavou matutua, o nisi taimi e mafai ona lagona o le olaga e pei o se mea e na ona onosaia—o se mea e tauivi ai seia iu ina tatou mauaina na faamanuiaga ua folafolaina mai ia i tatou.
O le mea e galo ia i tatou i nisi taimi o se mea foi e olioli ai. O le faamanuiaga o le fiafia e faavavau e mafai ona amata i le taimi nei.
O ni nai auala nei e mafai ona tatou toe faaolaina ai le malamalama ma le olioli i o tatou olaga.
Manatua Upumoni Faigofie
Nai lo le aoaoina o o tatou mata e vaai ai i le pogisa, e mafai ona tatou saili mo ave o le malamalama lea e aumaia e le talalelei a Iesu Keriso i o tatou olaga.
Na faamanatu mai e Peresitene Russell M. Nelson ia i tatou o le “olioli e sau mai ma ona o [Iesu Keriso]. O Ia o le punavai o le olioli uma.” Pe a e tauivi e maua le malamalama i lou olaga, o le liliu atu ia Iesu Keriso e tatau lava ona avea ma laasaga muamua i taimi uma.
E mafai foi ona e ole atu i le Tama Faalelagi e fesoasoani ia te oe ia manatua le taua o lou faasinomaga paia.
Na aoao mai Elder Gary B.Sabin o le Fitugafulu, “E taua mo lo tatou fiafia ona tatou manatua o i tatou o atalii ma afafine o se Tama Faalelagi alofa.” E moni lava o le iloaina o loo silafia oe e le Atua ma e finagalo i le mea sili mo oe e mafai ona faamumuina lou olaga.
E ui lava i luitau o loo e feagai ai, o le manatuaina o nei aoaoga faavae autu o le talalelei e mafai ona fesoasoani ia te oe e valaaulia ai le malamalama o le Faaola i lou olaga.
Saili le Mea e Aumaia ia te Oe le Fiafia
O nisi taimi e mafai ona faigata ona manatua o lo tatou fiafia e le foliga tutusa i taimi uma e pei o isi tagata uma. O le mea moni, i le avea ai ma talavou matutua, e faigata ona le faatusatusaina o tatou olaga ia i latou o siomia i tatou. Ae ia manatua o loo ia te oe le pule i lou lava fiafia.
Fesili ifo ia te oe lava: o le a se mea e te maua ai le fiafia?
O le a se mea e te maua ai le ’ata’ata?
E pei ona fautuaina mai e Peresitene Dieter F. Uchtdorf i lena taimi a o avea o ia ma Fesoasoani Lua i le Au Peresitene Sili, “Ia faaitiitia le faatopetope ma faaalu sina taimi faaopoopo e te faamasani lelei ai ia te oe lava.” Vaavaai mo le matagofie i mea iti: Savalivali. Asiasi i le malumalu. Lesitala i se galuega faatino. Saili se mea fou e fiafia i ai pe toe fai le mea na e tuua mai se mea tuai.
Sa saunoa Elder Richard G. Scott (1928–2015) o le Korama a Aposetolo e Toasefululua i se tasi taimi e uiga i le auala e mafai ai e le fatufatuai ona faamalamalamaina o tatou olaga: “Filifili se mea e pei o musika, siva, vane faatagata, po o solo. O le fatufatuai o le a fesoasoani ia te oe e olioli ai i le olaga. Na te faaosofia se agaga o le lotofaafetai. Na te atiae ai taleni tuai, faaleleia lou gafatia e mafaufau, faatino, ma maua ai le faamoemoega i le olaga. Na te aveesea le tuuatoatasi ma le lototiga. Na te aumaia se faafouga, se aloiafi o le naunautai, ma le fiafia mo le olaga.”
O le sailia o mea e faatumulia ai lou loto i le fiafia e mafai ona fesoasoani e toe faaola ai le malamalama i lou olaga pe a e i ai i se tulaga faigata.
Taulai Atu i Mea e Sili ona Taua
Afai e matua lofituina le olaga ma e te lagona le pei ua alu uma lou malosi e te ola ai i aso taitasi, faaalu sina taimi o le filemu e taulai atu ai i mea e siliona taua.
Ina ia faia, na fautua mai Peresitene Uchtdorf ia tatou “faafaigofie teisi o tatou olaga.” Toe taulai atu lou olaga i le alofa o le Tama Faalelagi ma le meaalofa matagofie o le Togiola a Keriso. Faamuamua au sootaga ma lou aiga, uo, ma oe lava ia.
Sui mea e le lelei i le lelei, le pogisa i le malamalama o Iesu Keriso ma Lana talalelei.
E pei ona uunaia i tatou e Peresitene Nelson: “Aua le na ona tatou onosaia o lenei vaitau. Ia tatou opogi le lumanai ma le faatuatua!” A o onosaia faigata o le olaga, aoao ia olioli foi i le matagofie o lena mea. O le fiafia e faavavau lea e folafola mai e le talalelei e le amataina i se taimi i le lumanai—e amata nei.