E Na’o Tusiga Faaeletonika: Aoaoga a Taitai o le Ekalesia mai Ala o Faasalalauga Faaagafesootai
Faamalologa e ala i le Togiola a Iesu Keriso
Tagai po o ai perofeta, aposetolo, ma isi taitai o le Ekalesia na aoao mai i luga o ala o faasalalauga faaagafesootai e uiga i le faamalologa.
E ui lava o le a tatou feagai ma le tele o luitau i le olaga nei, ae o le folafolaga a le Faaola o le faamalologa e mafai ona tuuina mai ia i tatou le mafanafana, filemu, ma le olioli tatou te manaomia e faatoilalo ai na luitau. E mafai ona faamaloloina i tatou mai o tatou manu’a faaleagaga, faalemafaufau, faalelagona, ma faaletino a o tatou taliaina le valaaulia a Iesu Keriso e o mai ia te Ia.
Ua aoao mai Peresitene Nelson:
“Ou te valaaulia foi outou e toe suesue i le tala i le faaali atu o le Faaola i sa Nifae i Amerika, e pei ona tusia i le 3 Nifae. E le’i mamao atu lena faaaliga, na faalogoina ai Lona siufofoga i le motu o tagata, e aofia ai upu nei o le aioiga:
“‘Pe tou te le foi mai nei ea ia te a’u, ma salamo i a outou agasala, ma liua, ina ia Ou faamaloloina outou?”
“‘… Faauta, ua faaloaloa atu ia te outou lou lima alofa mutimutivale, ma o soo se tasi e sau … o le a ou taliaina’ [3 Nifae 9:13–14].
“Uso e ma tuafafine pele, ua faalautele mai e Iesu Keriso lena lava valaaulia e tasi ia te outou i le asō. Ou te aioi atu ia outou o mai ia te Ia ina ia mafai ona Ia faamaloloina outou! O le a Ia faamaloloina oe mai le agasala pe a e salamo. O le a Ia faamaloloina oe mai le faanoanoa ma le fefe. O le a Ia faamaloloina oe mai manu’a o lenei lalolagi.”
Na saunoa taitai o le Ekalesia i le konafesi aoao e uiga i le faamalologa. Na latou faasoa mai foi ni savali e uiga i lenei autu i luga o ala o faasalalauga faaleagafesootai, e aofia ai mea nei:
Mauaina o le Mafanafana e ala i le Togiola a Iesu Keriso
“I la’u fonotaga talu ai nei ma nisi o tagata talavou o Le Ekalesia a Iesu Keriso o le Au Paia o Aso e Gata Ai, sa fesili ai se tamaitai talavou mo se fautuaga e uiga i le taulimaina o luitau faalelagona a o auai i le galuega a le Alii.
“Ou te faafetai i la’u uo fou o Carol, o le na faasoa mai le auala na maua ai e lona malamalamaaga i le Togiola a Iesu Keriso le faamafanafanaga ia te ia e ala i lona popole.”
Vitio:
Peresitene Oaks: “Ina ua maliu lo’u tama, sa siitia e lo’u tina lana fanau e toatolu … e nonofo faatasi ma o matou matua matutua ona sa mafatia o ia i se tulaga ogaoga o le mafaufau ma sa le mafai ona ia tausia o ia lava. Pe, muamua lava, sa le mafai ona faaauau se polokalama o le faailoga o le matuaofaiva sa ia amataina i lena taimi. Ma sa toeitiiti atoa le lua tausaga o iai se fesoasoani faafomai ina ia mafai ona faagaoioia. Ia, o se ituaiga o le le mautu o le faalesoifua maloloina faalemafaufau. Ma sa ou ola ae ai i lena mea ona sa toe manuia faavavega lo’u tina mai lona popolevale ma avea ai ma se tagata e tulaga ese lona malosi faalemafaufau, i le i ai o se olaga faalegaluega lea sa ia fesoasoani ai e faatulaga polokalama faaleaoaoga e tausia ai tagata sa i ai se tulaga le mautu faalemafaufau ma sa avea ai o ia ma se tagata atamai i lona olaga. Ma o nisi tagata e sili atu meaalofa o le mausali o le mafaufau nai lo isi. Atonu e tauivi nisi i o latou olaga atoa. Atonu e i ai se mea ogaoga na tupu i nisi ma faatoilaloina ai, e pei ona sa faia e lo’u tina. Ae o a nisi o auala e faalauiloa ai le tulaga mausali o le mafaufau?”
Carol: “Sa ou oo i le tele o popole i lo’u olaga atoa. Ma ou te lagona ai e pei o se fesili lenei sa tele ina ou mafaufau i ai ma sa tele lava foi ina ma tauivi. Ae o nai vaiaso ua mavae atu nei i le seminare, sa matou taulai moni lava i le aoao e uiga i le Togiola. Ma a o ou aoao e uiga ia Iesu Keriso, ma le tulaga sa mafatia ai o ia i mea taitasi uma sa ou lagonaina, sa ou lagonaina le mafanafana tele, i le iloaina o soo se tulaga le mautu faalemafaufau ou te lagonaina, po o le a lava le mafuaaga, sa ia lagonaina foi lena mea. Ma sa mafai ona ou maua le mafanafana tele i lena mea ma le iloaina e le o tuua na o a’u.”
Peresitene Oaks: “O se faamatalaga matagofie lena o se vaega o le Togiola lea e toatele tagata e le amanaiaina. Sa le na ona puapuagatia o Ia mo a tatou agasala. Sa mafatia o Ia mo o tatou tiga, o tatou lē atoatoa, e aofia ai o tatou atuatuvalega ma popolega. Sa Ia lagonaina uma lava.”
Peresitene Dallin H. Oaks, Facebook, 6 Aok. 2023, facebook.com/dallin.h.oaks
O Keriso e Aumaia le Faamalologa i le Agaga.
“Ona o luitau o le soifua maloloina o se tasi o tagata pele o lo matou aiga, sa toe faamanatu mai ai ia i maua ma Harriet le manaomia ona faatuatuaina pea le Alii ma le mana faamalolo lea e na o Iesu Keriso e mafai ona saunia.
“Ina ua matou faatoa faalogo i le tala e uiga i le ma’i, sa nutimomoia o matou loto—ae sa faamoemoe. Na faamautinoa mai ia i matou o le a faia e tagata faigaluega o le soifua mālōlōina mea uma e mafai e faamalolo ai le ma’i faaletino. Ma sa matou iloaina o le alofa tunoa o le Faaola o le mana lea e aumai ai le faamalologa paia i le agaga.
“E mafai ona tatou maua uma le mafanafana i le iloaina o le meaalofa a le Atua i tagata uma, e oo lava i Lona Alo, o Iesu Keriso, o se mana faamalolo malosi i le aluga o le tausaga, e le na o le Kerisimasi ma le Eseta.
“Ma te matua faafetai lava ma Harriet ona o le savali o le Kerisimasi o se savali o le olioli ma le faamalologa. O le vaitau lenei o le Kerisimasi, ma vaitau uma o le tausaga, e mafai ona tatou faalagolago ia Iesu Keriso. O le a Ia aumaia le faamoemoe ma le faamalologa i o tatou olaga.
“Manuia le Kerisimasi! Ia faamanuia outou uma e le Atua.”
Elder Dieter F. Uchtdorf, Facebook, 20 Tes. 2023, facebook.com/dieterf.uchtdorf
O Taunuuga o le Salamo Faamaoni o le Filemu, Faamafanafanaga, Faamalologa Faaleagaga, ma le Olioli
“O le salamo e manaomia ai le Togiola. O le liliu ese mai le leaga e le aumaia ai le faamalologa faaleagaga e aunoa ma le liliu atu ia te Ia.
“O Ezra Taft Benson (1899–1994), peresitene o le Ekalesia a Iesu Keriso o le Au Paia o Aso e Gata Ai, na aoao mai o le salamo e moni lava e maua ai suiga i uiga ma amioga, ae o le na o le suia o uiga faaalia ma amioga e le o le salamo lea.
“Na saunoa Peresitene Benson, ‘O le faatuatua i le Alii o Iesu Keriso o le faavae lea e tatau ona fausia ai i luga le salamo faamaoni ma le anoa. Afai tatou te saili moni e lafoai ese le agasala, e tatau ona tatou vaai muamua atu ia te Ia o lē o le Mataisau o lo tatou faaolataga.’”
Vitio:
“O le iloaina ma le lafoaia o le agasala, lagonaina o le faanoanoa ma le toe faaleleia o agasala, ma le ta’uta’u atu o agasala i le Atua ma, pe a manaomia, i o tatou taitai perisitua o elemene uma ia e tatau ai ma taua i le faagasologa o le salamo. Ae peitai, o nei laasaga taua e le na o se lisi o mea e fai mo amioga e mafai ona tatou faamaeaina faainisiniaina, faavave, ma faasamasamanoa. Afai tatou te faia nei mea ma lē iloa ma faalagolago i le Togiola ma Lana taulaga togiola, o lona uiga e oo lava i a tatou taumafaiga sili taitoatasi e le aoga. O taunuuga o le salamo faamaoni o le filemu, faamafanafanaga, faamalologa faaleagaga ma le faafouina, ma le olioli.”
Elder David A. Bednar, Facebook, 8 Set. 2023, facebook.com/davida.bednar,
O Loo I Ai Keriso Iina—e Faamafanafana ia i Tatou, Faamalolo i Tatou, ma Fesoasoani ia i Tatou ia Avea Faapei o Ia
“A o tatou saili e atiina ae uiga faaKeriso ma faaaoga le alofa mama o Keriso e taialaina ai o tatou faanaunauga, e tatau ona tatou iloaina o le alualu i luma ma le faaleleia e oo mai i le aluga o taimi ma faatasi ai ma le fesoasoani paia—o le alofa tunoa i le alofa tunoa, ma le alofa tunoa mo le alofa tunoa.
“E moni, tatou te faavalevalea uma pe a faatusatusa ia Iesu Keriso. Ae o loo Ia manatu pea ua tatou agavaa mo Lona gauai atu, alofa, ma le fesoasoani, ma faatasi ai ma lena fesoasoani, e tuputupu ae ai lo tatou tomai. O le naunau o Keriso ia i tatou e matua taitoatasi lava ma patino, e pei lava o Ana uo i aso o Lana galuega faaletino.
“O loo faatasi pea o Ia ma i tatou e ui e le vaaia. E mafai lava ona ia tagi ma faamafanafana i le au Maria ua maliliu tuagane, uso, matua, toalua, po o fanau. E mafai lava ona tafe mai le mamā mai ia te Ia e faamalolo ai tamaitai ma alii o loo aapa atu e pai atu i le pito o Lona ofu. E le fefe Iesu i faauoga vavalalata.”
Elder D. Todd Christofferson, Facebook, 10 Tes., 2023, facebook.com/dtodd.christofferson
Faamālōlōina ina ua Maliu se Tasi e Pele iā te Ia
“O la matou asiasiga i lenei vaiaso [i Pasila] ma le Kovana o Pernambuco [Setete] o Raquel Lyra o se aafiaga faapitoa lea o le a le vave ona galo ia i maua ma Kathy.
“Sa alofa ma agalelei Kovana Lyra i le mea e mafai ona ia faia. Sa matou fiafia ona sa matou faatasi foi ma Elder ma Sister Joni Koch mai le au peresitene o le eria o Pasila.
“Ae peitai, o le mea na amata o se asiasiga faigofie, ma le fiafia na vave lava ona avea ma se mea e sili atu ona anoa mo i matou taitoatasi.
“O le mea e faanoanoa ai, na maliu le tane a Kovana Lyra i ni nai masina talu ai nei i se mai oso faafuasei o le fatu ia Oketopa 2022. E pei ona faamoemoeina, o le maliu o lona toalua ua tuua ai Kovana Lyra ma lana fanau laiti e toalua ma se lagona maoae o le leiloloa ma le faanoanoa.
“A o faasoa mai e Kovana Lyra ona lagona o le alofa ma le faanoanoa ia i matou, sa mafai ona matou faamautinoa atu ia te ia e uiga i le natura e faavavau o o tatou agaga ma o loo ola pea lona toalua.
“Sa ma faasoaina atu ia te ia se Tusi a Mamona, ma sa ia faitauina le Alema 40:11–12 lea e talanoa matagofie e uiga i le olaga e mulimuli mai ia i latou o e talitonu ia Iesu Keriso ma mulimuli ia te Ia. Sa ou faasoa atu la’u molimau patino i le Faaola ia te ia.
“I se faaaliga faatasi o le alofa ma le faaaloalo, ina ua maea la matou fonotaga, sa matou savavali ma Kovana Lyra i lalo o le faasitepu maa matagofie ma faatofa mai ia i matou i luma o le Maota o le Kovana.
“O le lagona o le leiloloa tatou te lagonaina i le oti e matua moni ma patino lava—ae e faapena foi le faamoemoe ma le faamalologa e oo mai ia i tatou ona o Iesu Keriso.
“‘Le oti e, o fea o i ai lou tui? Le tuugamau e, o fea o i ai lou manumalo?’
“‘A e faafetai i le Atua, o le na te foaiina mai le manumalo ia te i tatou talu lo tatou Alii o Iesu Keriso’ (1 Korinito 15:55, 57).”
Elder Neil L. Andersen, Facebook, 23 Ape., 2023, facebook.com/neill.andersen.
O le Mana Faamalolo o le Faaola e Faatumulia Ai o Tatou Agaga i le Filemu, Susulu, Malamalama, Olioli, ma le Alofa.”
“Sa ma fiafia ma lo’u toalua o Rosana, i le faatasi ai ma tamaiti aoga i le BYU–Hawaii talu ai nei. Sa matou talanoaina o le faatuatua ia Iesu Keriso o le mana silisili lea ua avanoa ia i tatou i lenei olaga.
“O le filifili e talitonu ma atiina ae le faatuatua ia Iesu Keriso e faateleina ai lo tatou mauaina o le mana faale-Atua, e tusa lava po o a faanoanoaga ma le le mautonu o le olaga. O le puna lea o le ola faatasi ai ma se faamoemoega paia ma se vaaiga e faavavau.
A taulai atu o tatou olaga i le Faaola, o le a tatou maua tali i fesili loloto ma taua i o tatou agaga. Ou te faamautinoa atu ia te outou o lo tatou talitonuga ma le faatuatua i lo tatou Faaola, o Iesu Keriso, o le a faamalosia ai i tatou e faaauau pea ona agai i luma e ui lava i o tatou luitau. E tuuina mai ai ia i tatou le mafuaaga mo le faamoemoe mausali ma tuuina mai ai se taula mautu i o tatou agaga, e tuuina mai ai ia i tatou se filemu tumau i totonu lea e manaomia ona tatou ola ai i nei aso ma maua ai le malologa ia te Ia.
“E ala mai i le Faaola o Iesu Keriso ma Lana taulaga togiola faamalolo, ua mafai ai ona tatou tutu maualuga ma malolosi, e ui lava i le feagai ai ma faigata. O le mana faamalolo o le Faaola e faatumulia ai o tatou agaga i le filemu, susulu, malamalama, olioli, ma le alofa.”
Elder Ulisses Soares, Facebook, 21 Mat., 2023, facebook.com/soares.u
E Tuuina Atu e le Faaola le Toomaga Faalelagona i le Avea ai ma Matai Faamalolo
“O le masina ua te’a na maua ai e le matou au peresitene le avanoa e lauga ai i le Konafesi a Tamaitai a le BYU e uiga i le autu ‘O Iesu Keriso o le Toomaga.’ Sa ou taulai atu i le toomaga faalelagona ua saunia e le Faaola o le Matai Faamalolo. Sa ou faasoa atu le aafiaga o la’u tama teine laitiiti i luitau faalelagona o le soifua maloloina lea na amata a o laitiiti lava o ia. I le lima tausaga ua mavae o lana malaga faamalologa, ua ia malamalama ai i le auala na faatasi ai le Faaola ma ia i lona olaga atoa, e oo lava i taimi na ia lagonaina ai le matuai tuulafoaiina o ia e Ia ma le mafai ai ona lagonaina le Agaga. Na oo ina ia iloaina sa i ai Iesu Keriso iina i mea lelei uma na oo mai i lona olaga ma i tagata lelei uma o e na ofoina atu se lima fesoasoani.
“E faitau miliona i latou e tauivi ma luitau o le soifua maloloina faalemafaufau ma faalelagona. O se tasi o vaega sili ona faigata o nei luitau o le faalumaina lea o loo siomia ai i latou ma le faamasinoga saua a nisi faapea o i latou o se faaletonu o uiga po o se faailoga o le vaivai po o le paie. O aafiaga o ma’i faalemafaufau ma faalelagona e tutusa lava le moni ma le faataumaoia e pei o se ma’i po o se manu’a, ae o aafiaga e mafai ona itiiti ifo le iloagofie i fafo nai lo le gau o le vae po o le kanesa. O aafiaga o ma’i faalemafaufau ma faalogona e masani ona faafaigatā ai i se tagata ona faagaoioia pe maua le olioli. O nisi e tau atu ia i latou e i ai luitau o le soifua maloloina faalemafaufau ia tau lava ina ‘faaleleia’ ma ‘taumafai malosi atili’ po o le ‘ia sili atu ona faamaoni.’ Tatou te le fai atu lena mea i se tasi e i ai le kanesa po o se vae gau.
“O lo tatou Faaola, o Iesu Keriso, o lo tatou punavai silisili lea o le toomaga. O se faamanuiaga le mafai ona tatou soa ma Ia e fesoasoani e aumaia le toomaga faalelagona, faaleagaga, ma faaletino ia i latou o siomia i tatou. Ia avea i tatou ma meafaigaluega o le toomaga i Ona aao mo i latou o loo siomia i tatou, e aofia ai tagata o o tatou lava aiga. E toatele naua e manaomia le toomaga a le Faaola!”
Sister J. Annette Dennis, Facebook, 20 Iuni, 2023, https://www.facebook.com/RS1stCounselor.
Mana Faamalolo o le Lotofaafetai
“Ua saunoa mai Peresitene Nelson, ‘E leai se vailaau po o se ta’otoga e mafai ona fo’ia ai le tele o mala ma faama’i faaleagaga o loo tatou fetaia’i.
“‘Peitai, o loo i ai se vaifofo—o le tasi e foliga mai e faate’ia ai—ona e feteenai ma o tatou manatu ma lagona faalenatura. Ae ui i lea, o ona aafiaga ua faamaoniaina e saienitisi faapea ai foi ma alii ma tamaitai o le faatuatua.
“‘O loo ou faasino atu i le mana faamalolo o le lotofaafetai. …
“‘O le faitauina o o tatou faamanuiaga e sili mamao atu i lo le toefaitauina o o tatou faafitauli. Po o a lava o tatou tulaga, o le faaalia o le lotofaafetai mo o tatou faamanuiaga o se vaifofo faaleagaga lea e vave maua ai le toomaga ma umi ona tumau. …
“‘Faamata e faasao i tatou e le lotofaafetai mai faanoanoaga, lofituina, faavauvau, ma tiga? Leai, ae na te faamālūina o tatou lagona. E maua ai se vaaiga sili atu i le faamoemoega ma le olioli o le olaga’ (The Church of Jesus Christ of Latter-day Saints, “President Russell M. Nelson on the Healing Power of Gratitude,” Nov. 20, 2020, YouTube video).
“E pei ona saunoa mai Peresitene Nelson, e lagolagoina e le faasaienisi ana upu. Ua taua i le uepisaite a le Mayo Clinic: ‘O le faaalia o le lotofaafetai e fesootai ma le anoanoai o faamanuiaga faalemafaufau ma faaletino. Ua faaalia i suesuega e faapea, o le lagona o le lotofaafetai e mafai ona faaleleia ai le moe, le lagona ma le puipuiga. O le lotofaafetai e mafai ona faaitiitia ai le atuatuvale, popole, faigata i tiga faaumiumi ma le tulaga lamatia o faama’i’ (“Can Expressing Gratitude Improve Your Mental, Physical Health?,” Mayo Clinic Health System, Tes. 6, 2022).
“Ma o sailiiliga a le BYU ua fautuaina mai ai le lotofaafetai i le Atua, ma le nofo aitalafu ia te Ia, e sili atu ona anoa ma aafia ai nai lo le na o le lotofaafetai. I se isi faaupuga, o le faitauina o ou faamanuiaga ma le iloaina o le puna e oo mai ai, e mafai ona sili atu ona mamana i o tatou olaga.
“Sa ta’ua e Peresitene James E. Faust le lotofaafetai ‘o se faailoaga o le faatuatua’ ma ‘o se mataupu faavae faaola’ (konafesi aoao, Ape. 1990).
“Ou te fiafia i le fuaiupu lenei i le Mataupu Faavae ma Feagaiga 78:19: ‘Ma o ia o lē e taliaina mea uma ma le faafetai o le a faamamaluina; ma o mea o le lalolagi lenei o le a faaopoopoina ia te ia, i le sautuaselau lava, ioe, e sili atu’
“‘O mea uma’ e aofia ai e oo lava i mea faigata.
“Ia tatou iloa le puna lea e tafe mai ai o tatou faamanuiaga uma. Sei o tatou atiina ae se ‘uiga faaalia o le lotofaafetai,’ e pei ona saunoa ai Peresitene Thomas S. Monson. O se mea e suia-olaga moni lava!”
Sister J. Anette Dennis, Facebook, 23 Nov., 2023, facebook.com/RS1stCounselor
O Se Upumoni Faamalolo: O i Tatou o Fanau a le Atua
“Na faapefea ona laveaiina oe i le iloaina o oe o se atalii/afafine o le Atua?
“Talu ai nei lava, na matou maua ai (Peresitene Camille N. Johnson, Sister Tracy Y. Browning, ma Sister Andrea Veronica Muñoz Spannaus) le avanoa e asiasi ai i Nashville, Tennessee. A o matou i ai iina, sa matou maua le avanoa e asiasi ai i le Thistle Farms, o se nofoaga e maua ai se malutaga o le faamalologa ma le togiolaina. O le misiona a Thistle Farms ua atagia mai ai le malamalama loloto faapea o la tatou upumoni e faavavau e sili atu nai lo tulaga atonu na faauigaina ai i tatou.
“Na oo mai i o matou mafaufau upu a Peresitene Russell M. Nelson i le taimi o la matou asiasiga: ‘Au uo pele, o outou moni lava o fanau agaga a le Atua. Sa outou pepese lava i lenei upumoni talu ina outou iloa upu o le ‘O A’u o se Atalii/Afafine o le Atua.’ Ae pe ua tusia ea lena upumoni e faavavau i lou loto? Pe na laveaiina ea oe e lenei upumoni ina ua oulua fetaiai ma se faaosoosoga?’ (“Choices for Eternity” [faigalotu i le lalolagi atoa mo talavou matutua, 15 Me, 2022], Potutusi o le Talalelei).
“I faatoaga a Thistle, o tagata taitoatasi e le na o ni tagata e faasaoina ae ua taliaina o ni tagata e agavaa ma faatauaina i se nuu e malamalama, e pei ona fai mai ai la latou manatu ta’ua, ‘o le alofa e faamaloloina ai.’ O lenei alofa, ua maua’a i le malamalama e alofagia i tatou e le Atua, ua avea ma mea e faaosofia ai le toefuataiga loloto o le tagata lava ia.”
Sister Tracy Y. Browning, Facebook, 3 Tes., 2023, facebook.com/Primary2ndCounselor.