“O Le Ala na Fesoasoani ai le Nutimomoia ia te A’u e Toe Fausia ai Lo’u Faavae o le Faatuatua,” Liahona, Sete. 2024.
Autalavou Matutua
O Le Ala na Fesoasoani ai le Nutimomoia ia te A’u e Toe Fausia ai Lo’u Faavae o le Faatuatua
Ina ua mavae ni luitau ogaoga faalemafaufau, faaletino, ma faaleagaga, sa ou iloa ai le uiga o le mauaina o le faamalologa e ala i lo tatou Faaola, o Iesu Keriso.
Sa ou auauna atu o se faifeautalai i Farani ina ua solofa le lalolagi ma tuuina e le KOVITI-19 le atunuu atoa i se tapunia ogaoga. Sa ou tauivi ma le atuatuvale i lo’u olaga atoa, o lea sa ou popole ai faapea o tulaga tapunia o le a mafua ai ona ou se’e atu i se vaega o le faanoanoa. Ae o le vaiaso muamua o le faanofoesea—o le vaiaso e tau atu i le konafesi aoao ia Aperila 2020—o se tasi o vaiaso aupito sili ona faaleagaga o lo’u olaga.
O le toe tepa i tua, o aafiaga na ou maua i lena vaiaso na pei na faamalosia au e le Alii mo se afā.
Na tuuina mai e Elder Gary E. Stevenson o le Korama a Aposetolo e Toasefululua se lauga o le konafesi e uiga i lipea o le a faia i faavae o le Malumalu o Sate Leki. Sa ia faatusaina le toe faafouina i o tatou lava olaga ma fai mai ia i tatou e mafaufau i le fesili lenei:
“O a elemene faalefaavae o lo’u tagata faaleagaga ma faalelagona o le a faatagaina au ma lo’u aiga ia tumau mausali ma le lē maluelue, e oo lava i le tatalia o le galulu o le lalolagi ma gaoioiga ogaoga o galu o le a oo moni mai i o tatou olaga?”
A o ou faalogologo i lana lauga, sa faagaeetia au e le Agaga e faapea, e pei o le malumalu, o le a nutimomoia au i ni auala patino i le isi vaitau o lo’u olaga. Ae sa ou lagonaina foi afai ou te liliu atu i le Alii i le taimi o nei luitau, o le a Ia fesoasoani mai ia te au e faamalosia lo’u faavae o le faatuatua.
Lagonaina o le Nutimomoia
E pei ona faamoemoeina, sa vave ona ou atuatuvale, ma e lei leva ae ou lagonaina le maileia i se taamilosaga e le gata o le pule i le ola. Sa ou lagona le faavaivaia faalemafaufau, faalelagona, ma le faaleagaga.
Ina ua mavae le lua masina o le faanofo esea, sa faasolo ina lelei teisi atu mea uma. Faafetai i suiga i o’u tulaga, e pei o vailaau e le atuatuvale ai ma le faaiuga o le tapu, sa amata ona ou maua se lagona lelei atu faalemafaufau. Ae e lei leva, ae amata ona ou lagonaina le ma’i ma matauina ni patu lapopoa se tolu i le pito i lalo o lo’u fa’a’i.
I le taimi muamua sa ou le amanaiaina patupatu, ae ina ua faasolo ina faaletonu ou auga, sa oo ina manino mai ua le mafai ona ou toe nofo i le galuega faamisiona. Sa ou toe foi i le fale, lea na vave iloa ai ua ou maua i le kanesa o le toto—o le Hodgkin‘s lymphoma.
Ona o au vailaau e taofiofi ai le atuatuvale sa i ai sina aafiaga faamomoiloto faalelagona, o lea sa ou lagona ai le le popole a o ou amataina le ono masina o togafitiga.
Ae e ui lava i lea, sa amata ona ou vaivai faaletino.
Toefausia Lo’u Faavae Faaleagaga
E tasi le tausaga talu ona uma o’u togafitiga o le kanesa, sa amata ona ou faasolo manuia faaletino. Sa ou toe foi i le kolisi ma faia ni fuafuaga. Ae o le tiga faaleagaga ma le gagase na ou lagonaina i la’u misiona ma i le taimi o togafitiga o vailaau ua avea nei ma se lagona lautele o le le popole e uiga i le Tama Faalelagi ma Iesu Keriso.
Sa ou tauivi ma ou lagona e uiga i mea sa ou oo i ai ma lagonaina e peiseai na La tuulafoaiina au a o ou i ai i lo’u tulaga e sili ona maualalo.
Ae sa silafia e le Tama Faalelagi auala ou te manaomia e uia ina ia mafai ona ou faamalolo.
Sa ou lagonaina e pei sa ou tauivi ma mea ua faaleagaina ma toega o lo’u faatuatua malosi sa i ai muamua ma o’u uiga faaletagata sa i ai muamua. Sa ou lagonaina le le toe fesootai ia te au lava ia. Sa faamaluluina lou loto i taumafaiga a le Alii e aapa mai ia te au, ae o le faaleagaga sa ou lagonaina le tausalaina, popole, ma le le agavaa ona o lo’u le popole i le talalelei.
Ina ua uma ona [ou] mafaufau loloto i lo’u ola maloloina faaleagaga mo ni nai masina, sa uunaia a’u e faia ni suiga laiti faaleagaga i lo’u olaga. Sa ou le amanaiaina le tiga mo sina taimi, ae sa ou manao e talanoa atu i le tiga sa ou lagonaina i lo’u agaga ona o luitau sa ou oo i ai.
E lei umi ae ou vaaia le aao o le Tama Faalelagi i lo’u olaga. E aunoa ma le iloaina o le tele o le gase faaleagaga na ou lagonaina, sa aumaia e uo ma e pele ia te a’u le autu o le faamalologa. Sa faasoa mai foi e se tasi o i latou se saunoaga i le faigalotu a Elaine S. Marshall.
Sa ou faitaua, ma le musuā.
I le avea ai ma se tausiasoifua, sa tusia e Elaine le faaogatusa i le va o le faamalologa faaletino ma le faamalologa faaleagaga, ma fai mai: “O le faamalologa e le o se vaifofo. O le fofō e mamā, vave, ma faia—soo i lalo o le vai faagase. … O le faamalologa … e masani lava o se faagasologa i le olaga atoa o le toe faaleleia ma le tuputupu ae e ui i lea, atonu ona o le onosaia o sauaga faaletino, faalelagona, po o le faaleagaga. E manaomia ai le taimi.”
Ou te le manatu o se mea na tupu faafuasei le manaomia o togafitiga mo lo’u kanesa i le ono masina o togafitiga. O aafiaga o togafitiga e ogaoga, matautia, ma faigata. O le mea e mataina, o le aoao e faamalolo faaletino lo’u tino na aoaoina ai a’u i se mataupu faavae autu o le faamalologa faaleagaga—le auala e utuvai mai ai i le alofa tunoa o Iesu Keriso ma tuu atu ai ia te a’u lava le taimi ma le avanoa e faamalolo ai la’u sootaga ma Ia ma le Tama Faalelagi.
Mauaina o le Alofa Tunoa o le Faaola
O le alofa tunoa o le fesoasoani faalelagi, mana gafatia ma faamalosiau, ma le faamalologa faaleagaga. O se meaalofa mai lo tatou Tama Faalelagi, “ua tuuina mai ia i tatou e ala i le Togiola a le Alii o Iesu Keriso.”
O la’u faataitaiga e sili ona ou fiafia i ai o se tasi o loo mauaina le mana faamalolo o Iesu Keriso e ala i Lana Togiola o Alema le Itiiti. A o taoto o ia i se tulaga koma mo aso e tolu, sa tigaina i “tiga o se agaga ua malaia,” sa ia manatuaina aoaoga a lona tama e uiga ia Iesu Keriso (tagai Alema 36:16–17). Sa muamua ona ia manaomia le fesoasoani ona liliu atu lea ia Keriso, lea na suia ai lona olaga ma faatagaina ai o ia ia faamaloloina faaleagaga (tagai Alema 36:18–22).
O le laasaga muamua sa ou faia i le faamalologa faaleagaga o le mauaina lea o se manao e fesootai ma le Atua. Na aoao au e Alema i le ala e amata ai ina ua fai mai “Faaaoga sina vaega itiiti o le faatuatua, ioe, e tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe, seia oo lava ina ia e talitonu ai i se ala e mafai ai ona e tuu ane o se avanoa mo se vaega o a’u upu” (Alema 32:27).
Ou te molimau atu mai ou lava aafiaga e moni lenei mea.
E mafai ona tatou atiina ae se manao, totō se fatu (o le afioga a le Atua), ma faafailele lena fatu seia oo ina avea ma se mea moni ma mausali. Mulimuli ane, o fua o lo tatou faatuatua ia Iesu Keriso e fua mai pe a tatou vaai i suiga i a tatou amioga, o tatou manatu, o tatou talitonuga, o o tatou loto, o o tatou mafaufau, ma o tatou agaga. O le a fausia lo tatou faavae i Ona luga (tagai i le Helamana 5:12).
E talitutusa ma le aafiaga o Alema, o lou manao ia lagona le Agaga ma le olioli o le talalelei ua toe faataatia ese ai se suiga atoa o le faanoanoa lea na ou oo ai i le faagasologa o le faamalologa. Talu mai lena taimi, ua fesoasoani mai le Faaola ia te au e faalelei o’u lagona ua tuanai a o ou aoao e laa ese mai lo’u inoino i le Atua, o Ia, ma o’u lava vaivaiga.
Ona o Ia, o vaega o a’u lava ia sa ou manatu ua leiloa ia te au i puao o o’u tofotofoga—e pei o o’u uiga, o’u manaoga, ma lo’u alofa mo le talalelei—ua toe faafoi mai ia te a’u ma ua ou lagona ai le atoatoa, faafouina, ma le toefuataiina.
O Se Faavae e Malosi Atu
O tiga ma luitau na suia ai au, ae ina ua ou mauaina le faamalologa e ala ia Iesu Keriso, sa ou toe fausia moni lava lo’u faavae o le faatuatua ia te Ia. A o mavae atu le taimi ma ou malolo, ua ou iloa ai ona o Iesu Keriso, ua mafai ai ona ou aoao ia maua le olioli e ui lava i o’u tauiviga. Ua ou malamalama nei o le vaega sili ona taua o le feagai ai ma se tofotofoga e le o le mea lea e gauia ai i tatou i lalo po o le tiga tatou te lagonaina—o le mea lea e sosoo ai a o tatou oo i le faamalologa ma le toefauina e ala i le alofa tunoa o le Faaola.
Na aoao mai Elder Patrick Kearon o le Korama a Aposetolo e Toasefululua: “O uo pele ua … tauaveina amioletonu o le olaga—e mafai ona e maua se amataga fou ma se toe faafouga. I Ketesemane ma luga o Kalevaria, na ‘tauave ai e Iesu i Ona lava luga … o mafatiaga uma ma puapuaga na oo i ai oe ma a’u’ [Russell M. Nelson, “O Le Igoa Sa’o o le Ekalesia,” Liahona, Nov. 2018, 88], ma ua Ia faatoilaloina mea uma!”
O lea la, ia i latou o e lagona le nutimomoia, ou te aioi atu ia te outou ia lototele, ia pipiimau, ma ia faalagolago i le Alii ma Lona mana faamalolo. I le aluga o le taimi, onosai, ma e oo lava i sina manaoga faatauvaa, e mafai e Lona alofa tunoa ona suia oe, toe fausia lou faavae, ma fesoasoani ia te oe ia toe lagona le atoatoa.
O le meaalofa lena Na te ofoina mai ia i tatou uma taitoatasi.
E alala le tusitala i Karolaina i Matu, ISA.