E Na’o Tusiga Faaeletonika: Talavou Matutua
Ina ua Ou Manao e Faamuta Lo’u Ola, Sa Fesoasoani Iesu Keriso ia te A’u e Maua le Malamalama
I se taimi pogisa o lo’u olaga, sa ou lagonaina ai o le pule i le ola ua na o le pau lea o la’u filifiliga. Ae sa mafai ona ou maua le filemu e ala mai ia Iesu Keriso.
E Toe Afio Mai o Ia e Pule ma Nofotupu, saunia e Mary R. Sauer
Sa ou ola ae ma taalo lakapi i Aialani, ma sa mafai ona ou taalo faapolofesa i le lalolagi atoa a o avea ma se talavou matua. A o ou asiasi atu i Egelani e taalo lakapi, sa ou feiloai i faifeautalai ma papatisoina ai. Sa ou auauna mulimuli ane i se misiona ona ou siitia atu lea i Ausetalia, lea na ou feiloai ai i lo’u toalua ma avea ai ma se tamā.
Ina ua ou liliu i le talalelei a Iesu Keriso, sa suia lo’u olaga atoa i se taimi puupuu lava! Na faafuasei lava ona maua sa’u āva, se fale i se isi atunuu, ma se atalii. Ou te lei ola ae ma se aiga masani, o lea sa fou uma ai lenei mea ia te a’u. O le ola ai i le talalelei na aumaia ai ia te a’u faamanuiaga ou te lei mauaina muamua, ma sa ou matua faafetai lava mo na faamanuiaga.
Ae e ui lava sa faamanuiaina a’u i le tele o vaega o lo’u olaga, ae sa ou lagonaina pea le lofituina.
Lagonaina o le Tuua Toatasi i O’u Lagona
Mai fafo, sa lelei le olaga, ae sa ou iloaina sa i ai ni faigata i le lotolotoi o faamanuiaga. Ina ua ma finau ma lo’u toalua, sa ou tauivi e faasoa atu o’u lagona. Ou te lei aoaoina le auala e faailoa atu ai ma le mataalia. Ma ona sa ou ola ae ma se tina nofofua, sa ou lagona ai sina leiloa pe a oo i se mafutaga faalefaaipoipoga.
Na suia tulaga, ma sa le mafai ona ou toe taalo lakapi. Sa ou lagonaina e pei e le o a’u o se tamā lelei, o se tane lelei, po o se tagata o faia se tausiga lelei. Ma sa ou matuā manao lava e tausia lo’u aiga! Sa ou leiloa po o fea ou te liliu i ai.
O lo’u aafiaga o le lofituina na faasolosolo lava ina faateteleina le leaga. Sa amata ona leai so’u faamoemoe o le a lelei mea uma, ma sa atili ai ona ou faanoanoa. I le aluga o taimi, na oo mai ai manatu e pule i le ola. Ona o o’u mafaufauga o le pule i le ola ma le atuatuvale sa le’i togafitia, sa ou filifili ai e fai se taumafaiga e pule i lo’u ola.
E ala i se mea faavavega na tupu, na faasaoina ai a’u mai la’u taumafaiga. Sa ou iloaina le leaga tele o lo’u soifua maloloina faalemafaufau, ma sa amata ona ou feiloai ma se faufautua. Sa fesoasoani lenei faufautua ia te a’u ia maua se vaaiga maloloina ma aoao e iloa ma faasoa mai o’u lagona moni lava.
Valaauliaina O Le Malamalama o le Talalelei
Faatasi ai ma se taulaiga fou i le faamoemoe, ma le fesoasoani faapolofesa mo lo’u soifua maloloina faalemafaufau, sa ou naunau ai e amata o’u faamalologa. Sa amata ona ou malamalama e ui lava ou te le atoatoa, faatasi ai ma le fesoasoani a le Tama Faalelagi, e mafai ona ou faatumauina le malosi o la’u faaipoipoga, avea ma se tamā lelei, ma tausia lo’u aiga.
Sa lagolagoina foi a’u e la’u uarota a o ou auauna atu i le au epikopo. O le mafai ona auauna atu i isi na toe aumaia ai se isi lagona o le faamoemoega i lo’u olaga.
O le isi faamanuiaga faavavega na fesoasoani ia te a’u e iloa ai le malamalama o le suesueina lea o lo’u faamanuiaga faapeteriaka. O upu na faamanatu mai ai ia te a’u folafolaga na faia e le Tama Faalelagi ia te a’u ma fesoasoani ia te a’u ia ou iloa ai e mafai ona ou tausia lo’u aiga pe afai ou te faamuamua le Alii.
Ua amata ona ou tatalo ma le faamaoni e valaaulia le malamalama o le talalelei i lo’u olaga. Ou te faitau a’u tusitusiga paia i aso uma. Ou te taumafai lava e valaaulia le Agaga ina ia mafai ona ou maua ni manatu lelei ma faaleleia la’u sootaga ma lo’u toalua ma lo’u atalii.
Na aoao mai Elder Dieter F. Uchtdorf o le Korama a Aposetolo e Toasefululua:
“Ioe, mai lea taimi i lea taimi atonu e foliga mai e pa’i mai, pe fusia foi o tatou olaga i le pogisa. …
“… Ou te molimau atu o lo tatou faamoemoe ola o loo ia Keriso Iesu! O Ia o le faitotoa moni, mama, ma le mamana e oo atu ai i le malamalama faalelagi.
“Ou te molimau atu ona o Keriso, e le mafai ai ona manumalo le pogisa.”
I le taimi nei ou te talanoa i le Tama Faalelagi i aso uma. Pe a faigata ia te a’u, ou te tootuli ma faailoa atu ia te Ia o loo ou taumafai pea i le mea sili ou te mafaia. Ua ou malamalama nei e tusa lava po o le a le lofituina o a’u, e mafai lava ona ou liliu atu i lo’u Faaola mo se fesoasoani.
E le tuua lava na o a’u. O a’u o se atalii moni o le Atua.
Ma e faapena foi outou.
E Mafai Ona E Maua le Filemu ma le Faamoemoe
Na aoao mai Iesu e faapea “ua tele lava le taua o agaga i le silafaga a le Atua” (tagai i le Mataupu Faavae ma Feagaiga 18:10). Ma e alofa tele le Tama Faalelagi i Ana fanau taitoatasi ma e silafia a tatou tauiviga. E tusa lava pe faigata le olaga, e mafai lava ona tatou maua pea le faatuatua o le a Ia taitaiina i tatou i tagata sa’o ma punaoa sa’o.
Ou te toe taua le mea na aoao mai e Peresitene Jeffrey R. Holland, le Sui Peresitene o le Korama a Aposetolo e Toasefululua: “Po o a lava ou popolega po o faigata, o le oti i le pule i le ola e manino lava e le o le tali lea. … I se lalolagi ua matua manaomia le malamalama uma e mafai ona ia maua, faamolemole aua ne’i tuuitiitia le malamalama faavavau na tuuina e le Atua i lou agaga a o le’i i ai lenei lalolagi. Talanoa i se tasi. Fesili atu mo se fesoasoani. … E mafai ona e onosaia faigata o lenei olaga faitino aua o le a matou fesoasoani ia te oe e onosaia. E te malosi atu nai lo le mea o e manatu ai. O loo maua le fesoasoani, mai i isi aemaise lava mai le Atua. E alofagia ma taua ma manaomia oe. Matou te manaomia oe!”
I le taimi muamua, ou te lei iloaina sa ou tauivi ma lo’u soifua maloloina faalemafaufau, seia oo ina matua vaivai lava, sa faigata ona ou toe faatinoa se mea. O le aoao e talanoa e uiga i o’u lagona ma taulai atu i lo’u Faaola ma Lona mana faamalolo ua fesoasoani ia te a’u e toe lagona ai le filemu ma le faamoemoe i lo’u olaga.
Ou te iloa o le taulai atu ia te Ia o le a fesoasoani foi ia te oe e maua ai le faamalologa.