Autalavou Matutua
Aapa Atu mo se Fesoasoani ina ua mavae ona Pule La’u Uo i le Ola
Sa ou manatu e mafai lava e a’u ia ona faatoilaloina lo’u atuatuvale, ae o le talosagaina mulimuli ane mo se fesoasoani na faapea ona suia ai mea uma.
Ata na tusia e Mitchell McAlevey
A o o’u faigaluega i se tasi o aso i ni nai taumafanafana ua mavae, sa ou maua ai le tala ua maliu sa’u uo lelei lava ona o le pule i le ola. Sa ou te’i—o le mea moni sa ou le iloa po o le a sa’u taga e fai. Ou te manatua lou nofo ai i lau kesi ma le le leoa, sa le mafai ona ou mafaufau pe faia se mea.
Sa lolofi mai soo se ituaiga mafaufauga ma lagona, lea na tuua ai ma le le mautonu. Ae sa ou faapea ifo lava ia te a’u, sa ou le afaina, ma o le a galo ia te a’u. Peitai, o masina na sosoo ai, na aumaia ai se galu lofituina o le atuatuvale ma le faanoanoa i ou luga. Sa i ai le tele o loimata ma po lemamoe. I ni isi o taeao, sa le mafai lava ona ou alu ese mai le moega. Ou te lei manatu na taliina mai pe faafofogaina foi a’u tatalo. O le faitauina o tusitusiga paia, na leai ma se uiga ma se musuiaina. Sa ou lagona le leai o se faamoemoe, ma sa ou le manatu o le a faasolo lelei mea uma.
Mo se taimi sili ona umi, sa ou fefe ai e talanoa i soo se tasi e uiga i le mea sa ou lagonaina. Na iloa e tagata lo’u faavauvau ma ofo mai e talanoa pe tuuina mai le lagolago, ae o taimi uma lava ou te teenaina ai. Ou te mafaufau faapea, “Ou te le manao e faalavelave ia i latou.” “Ma le isi, e i ai foi o latou lava faafitauli e popole i ai. Aisea o le a latou popole ai i o’u faafitauli?”
Sa i ai se tasi o Aso Sa lea sa foliga mai sa ou le gafatia ai lo’u faavauvau. Sa le mafai ona ou nofo lelei i le taimi o le sauniga faamanatuga. Ina ua uma le sauniga, sa ou tatope atu i le auala savali e aluese ai mai le falesa. E fetaui lava lo’u oo atu i le faitotoa, ae ma fetaui ai ma se tamaitai o la’u uarota o le na maliu lana tama tama i le pule i le ola i tausaga na muamua atu. Ina ua ma fevaaia’i, sa ta’u mai e le Agaga ia te a’u, ua oo i le taimi e fai atu ai sa’u tala e uiga i mea sa ou lagonaina.
Sa taufaafefe, ae faatasi ai ma se leo gatete sa ou taofia o ia ma ou faapea atu, “E mafai ona ou talanoa atu ia te oe mo sina taimi? Ou te manaomia se fesoasoani.”
Sa faalogo mai o ia a o o’u faamatala atu le mea na tupu ma ou lagona sa i ai. Ma, e aunoa ma se faatali, sa ia uuina lou lima ma tilotilo mai ia te au ma le maligi o ona loimata. “Ou te manao ia e iloa o lenei mea, e le o sou sese ma e matuai alofaina lava oe,” o lana tala lea.
Sa leai se mea na ma mafaia, ae na’o le fetagisi a o ma talanoa pea. Mo a’u, sa pei lava na vavala ia ao. Sa iu ina i ai se ituaiga o malamalama ua susulu mai i lo’u olaga. O mea uma sa ia fai mai ai ia te au i le auala savali i lena aso, sa o se tali lea i au tatalo.
O le mea na sili ona ou aoaoina mai i lena taimi, o le faasoa atu o ou lagona na iu lava ina mafai ona amata ai lo’u faamalologa. E le mailoa tonu le mafuaaga, ae na ou faatalitonuina a’u lava, e mafai ona ou feagai ma mea uma na’o a’u ma ou te le’i manaomia se fesoasoani. E ui ina sa le mafai ona ou iloaina, ae sa siomia au e tagata o e sa alolofa ia te au ma sa mananao e fesoasoani mai ia te au.
Ua ou aoaoina e faapea, a tatou fai mai e tatau ona “tasi o tatou loto ma tasi le mafaufau” (Mose 7:18), o lona uiga o ou lototiga o o’u lototiga ia ma o o’u tiga o ou tiga foi ia. O lona uiga e le gata ina tuuina atu le fesoasoani pe a manaomia mai, ae o le naunau foi e maua mai le fesoasoani pe a tatou manaomiaina foi. O le tau lava o le faataga o isi e fesoasoani ia te au, o le mea lea na faia le eseesega ma mulimuli ane, o le mea lea na taitai atu ai au i le mauaina o se manuia atoa o le mafaufau.
I le taimi nei, i ni nai tausaga talu ona mavae lenei aafiaga, e mafai ona ou faapea atu ma le faamaoni, ua matuai o’u fiafia lava nai lo o se isi lava taimi o lo’u olaga. Faatasi ai ma le tele o le galue malosi, ma mulimuli ane e ala i le alofa tunoa o le Atua, ua avea ai a’u ma se tagata ua malosi atu nai lo o le mea sa ou i ai muamua a’o le’i tupu lenei mea atoa. O le tatalo, auauna atu, tigaina, lotomaualalo, fofo faalelagona, faamanuiaga e lemafaitaulia, ma le anoanoai o mea, na fesoasoani ou te oo atu ai i le tulaga ua ou i ai nei. E anoanoai mea ua ou nofo aitalafu ai i le Tama Faalelagi, lo’u aiga, ma au uo mamae mo le fesoasoani mai ia te au i nei mea uma. Ou te matua faafetai lava ona sa ou aapa atu mo se fesoasoani—o se ki lea i le faamalologa.