Auauna Atu e ala i Talafaasolopito o Aiga

O le fesoasoani atu i se tasi i a latou talafaasolopito o aiga o se auala mamana lea e auauna atu ai. A o e faafesootaia isi ma o latou tuaa e ala i tala ma faamatalaga o le aiga, e iu ane i lou faatumuina o avanoa i o latou loto ia e i ai nisi o taimi latou te le’i iloaina o i ai (tagai i le Malaki 4:5-6).

Pe o se tagata ua avea ma tagata o le Ekaesia i le olaga atoa po o se tasi e le’i faalogo lava i le talalelei toefuataiina a Iesu Keriso, o fanau uma a le Atua e fia iloa pe o fea na latou o mai ai.

E masani ona le umi se taimi e tuua ai se uunaiga loloto tumau, e pei ona faaalia i tala nei.

Mauaina o le Aiga i le 30,000 Futu

Talu ai nei lava i se malaga i le fale, sa ou nofo ai i talaane o Sitivi, o lē na faasoa maia ia te au ni vaega o lana tala patino. Sa faauu o ia mai le aoga maualuga, ma ulufale atu i le Ami a le I.S. o se tagata faapitoa i fesootaiga i le 18 o ona tausaga, ma sa lei umi ae amata ona faigaluega i le Fale Paepae, i le tuuina atu o le lagolago faalefesootaiga i le Peresitene o le Iunaite Setete. Mai le 18 o ona tausaga i le 26, sa ia auauna atu i ni Peresitene se toalua o le I.S. Sa matagofie ana tala!

Sa ou faapea atu, “Sitivi, e tatau ona e tusia i lalo nei tala mo au fanau! E manaomia ona latou maua sa’o mai nei tala mai lau vaaiga.” Sa ioe i ai o ia.

Ona musuia lea o au e le Agaga e fesili atu ia te ia, po o a ni mea na ia iloa e uiga i ona tuaa. Sa tele mea na iloa e Sitivi e uiga i le itu o lona tina, e aofia ai se tala i se taimi e tasi na faia ai se taumafataga i le afiafi a lona aiga faatasi ma Aperaamo Linikone ao faia ana faatosina i nuu maotua i le taimi o le faigapalota a le I.S i le 1860.

Peitai, sa laitiiti se mea sa ia iloaina e uiga i le itu o lona tama. Sa matuai ona fia iloa atili. Sa ou aumaia i fafo la’u telefoni ma tatala le polokalama o le FamilySearch. “Sitivi, e mafai ona ta suea lou aiga i le taimi lava lenei!”

Sa sosoo loa la’u telefoni i le Wi-Fi a le vaalele. Sa ou faataatiaina la’u telefoni i luga o le laulau i o’u luma ina ia mafai ona ma iloa uma atu. Sa ma sailia le FamilyTree. I ni nai minute, sa ma tau fai pulato’a atu i le tusi faamaonia o le faaipoipoga a lona tamamatua i le tina o lona tinamatua.

“O la’ua na,” sa ia fai mai ai. “Ua ou manatua nei lona faaiu!”

Sa liligi mai i o ma’ua luga uma le agaga o le fiafia. Sa ma galulue i le faiga o talaaga otooto mo ona tuaa sa le tele ni mea na iloa e uiga i ai mo le isi 45 minute na sosoo ai. Sa ia talosaga mai ia ou tautino atu ia te ia, o le a faaauau ona ma sailia faatasi i Colorado. Sa faafesuiai a ma faamatalaga e faafesootai ai a o tulaueleele le vaalele.

Sa ma i ai iinei, felelei i le 30,000 futu (9,144 m) i le ea, faatasi ai ma se masini e pei o lo’u lima le laitiiti, ma sailia se alii ma se tamaitai na faaipoipo i le 100 tausaga ua mavae, o e na leiloloa ia te ia ma lona aiga. E ofoofogia! Ae sa ma mauaina i laua. Sa fesootai aiga. Sa manatuaina tala. Na lagonaina lagona o le lotofaafetai mo tekinolosi ma meafaigaluega. Sa o se matuai vavega lava.

Jonathan Petty, Colorado, ISA

Siosiomia e Aiga Fou

ata na tusia e Joshua Dennis; Ata o le pito i tua, telefoni feaveai mai le Getty Images

Na silia ma le 20 tausaga talu ona le toe toaga Maria [i le lotu]. I ni nai masina ua mavae, sa ma faaaluina ai ni itula se lua i lo matou fale, i le sailiga o ona aiga e ala i faamaumauga o tusigaigoa ma isi. I se tasi taimi na tagi ai o ia ma fai mai, “Ua tele atu mea ua ou aoaoina e uiga i lo’u aiga i totonu o le lua itula nai lo o mea na ou iloaina i lou olaga atoa!”

I le faaiuga o lo matou taimi faatasi ma ia, sa ma faailoa atu ai ia te ia le vaega o Tauaiga o loo Siomia A’u i le polokalama o le FamilyTree. Sa iloa ane ai, o i ma’ua ma lo’u toalua o ni tauaiga mamao o Maria. Sa toe tagi foi, ma fai mai, sa faapea lava o ia, sa na’o ia. Na te lei iloaina lava na i ai ni ona aiga i le eria. I ni nai vaiaso mulimuli ane, sa feiloai ai Maria ma lo matou epikopo. Ua galue nei o ia ia agavaa mo le malumalu, ma ua feiloai atu o ia i le toatele o ona tausoga “fou” i totonu o la matou uarota!

Carol A. Bowes, Karolina i Matu, ISA

O le Fua mo Auaunaga

E tofu ma’ua ma Asalei, o se uso ou te auauna atu i ai, ma ni tusikuka mai o ma’ua tinamatutua. O lana tusikuka e mai le tina o lona tinamatua, ae o au o se tusi na ou tuufaatasia ina ua ou mauaina le pusa fua o kuka a lo’u Tinamatua Greenwood ina ua maliu o ia.

Sa ma tau fai filifilia ma Asalei se fua mai a ma’ua tusikuka, ma sa ma faatasitasi ina ua manava galuega i se tasi o po e faataitai ona fai. Sa ia filifilia se fua o se poloka keke suamalie, o lea na ma faia ai muamua ma tuu i le ogaumu. Sa ou filifilia le [pink chip dip] “loi piniki”—o se mea masani i pati uma a le aiga o Greenwood. Sa fesoasoani Alesi le tama teine a Asalei ia i ma’ua i le tofoga o meaai. Ma, talu ai sa lei manao Asalei e ai uma e lana fanau ia poloka keke, o lea na ia tipitipia ai ma kiliva atu i uso o loo ia auauna i ai.

O le mea e sili ona ou fiafia ai i le po o fua o a ma’ua kuka, o le, a o ma kukaina ma taoina, ma te talanoa ai i autu uma lava o auaunaga masani—o ona tauiviga ma o’u tauiviga. Ae sa ma talanoa foi e uiga i o ma’ua tinamatutua ma tina, lea sa pele ia i ma’ua uma.

Jenifer Greenwood, Iuta, ISA

Auala Fitoitonu e Fesoasoani Atu Ai

E mafai e talafaasolopito o aiga ona tatala faitotoa mo avanoa e auauna atu ai pe a foliga mai e leai se isi mea o le a mafaia. O ni nai manatu nei tou te ono faataitaia.

Fesoasoani ia i latou e tuu i luga ia ata o le aiga i le FamilySearch.
Fesoasoani ia i latou e pu’e ma tuu i luga ia faamatalaga tapue o tala o talafaasolopito o aiga, aemaise lava i tala e tutusa ma ata.
Fatu se siata ili po o isi pepa o faamatalaga e lolomiina i le talafaasolopito o aiga e mafai ona e tuuina atu o se meaalofa.
Aoao atu ni auala e puepuemaua ai a latou lava talafaasolopito e ala i le tausia o se api talaaga i se auala latou te fiafia ai. Apitalaaga i le leo? Apitalaaga i ata? Lisi o vitio? E tele ni filifiliga mo i latou e le mananao i mamanu masani o apitalaaga.
O atu faatasi i le malumalu e fai sauniga mo tuaa. Pe ofo atu e fai sauniga mo igoa o o latou aiga pe afai e tele atu a latou igoa nai lo o mea e mafai ona taulimaina.
Faatasitasi e faasoa atu tu ma aga masani faaleaiga.
Ia faia faatasi se vasega o talafaasolopito o aiga.