E Faapefea Ona Ou Talanoa i La’u Fanau e uiga i le Soifua Maloloina o le Mafaufau?
Ata na tusia e David Green
O Auala e 5 e Amata ai se Talanoaga
-
O lagona le mautonu o ni vaega o le olaga. E le afaina pe a lagona le ita, faanoanoa, po o le popole i nisi o taimi. O nei lagona e le o taimi uma e faapea ai, ua e faia se mea sese.
-
E te iloa le ala e fesoasoani ai fomai pe a gau lou vae? O loo i ai foi tagata e mafai ona fesoasoani i mafaufauga ma lagona le fiafia. E tatau ona tatou talosaga atu mo se fesoasoani pe a tatou manaomia.
-
O mea sese o se vaega o le auala tatou te aoao ai ma tuputupu ae ai i lenei lalolagi. E leai se tasi e atoatoa! E alofa le Tama Faalelagi ia i tatou, e tusa lava pe tatou te faaletonu. E finagalo o Ia ia tatou taumafai pea.
-
O nisi gaoioiga—e pei o le manava loloto i totonu, talanoa i se tagata, taaalo i taaloga, po o le tusi ata—e mafai ona fesoasoani e te maua ai se lagona lelei pe a e le fiafia. E le tatau ona tatou faia mea e afaina ai meaola, i tatou lava, ma isi tagata.
-
O nisi taimi e i ai lagona le fiafia o tagata po o mafaufauga le mautonu e le o ese. O nisi tagata e i ai isi faafitauli i le auala e galue ai o latou mafaufau. E le o so latou sese lena. E tatau ona tatou agalelei ma fesoasoani i tagata uma ma taulima i latou e pei ona finagalo ai Iesu Keriso.
Motugaafa e talanoa ai
-
E taua le fesili atu i lau fanau i ni fesili e uiga i o latou mafaufauga ma lagona, ona matuai faalogo lelei lea. O fesili e mafai ona aofia ai: O a ni mea na e mafaufau i ai talu ai nei? O a ni suiga o loo tutupu i lou olaga? Pe na e matauina ni lagona fou talu ai nei? E i ai ni au fesili sa e manao e fai atu i se tasi?
-
E taua fesili a lau fanau. E mafai ona latou fesoasoani ia te oe ia iloa mea ua saunia a outou fanau e aoao i ai. Nai lo o le saputu atu o mea uma e te iloa e uiga i se autu i luga o se tamaitiiti i se taimi e tasi, ia tali le fesili i faamatalaga autu. Ona valaaulia lea o i latou e tali mai. Afai e leai ni a latou fesili tulitatao, atonu sa le lava faamatalaga autu mo i latou i le taimi lenei. Afai e i ai nisi a latou fesili, atonu ua latou saunia mo ni faamatalaga auiliili faaopoopo.
-
Aloese mai le finau ma lau tama e uiga i lagona latou te faasoa mai, e tusa lava pe le fetaui na lagona ma lou manatu e uiga i lea tulaga.
-
O nisi taimi e faigofie atu le tusitusi nai lo le tautala. Afai e le o lelei le aluga o le talanoaga, taumafai e valaaulia lau tama e tusi le ata e uiga i o latou faalagona.
Manatu mo Gaoioiga
-
Mo tamaiti laiti, ia tusi foliga e fai ma faatusa o lagona eseese ma fesoasoani i lau fanau e faaigoa ia lagona.
-
Ia palepalealuga faatasi ma lau fanau se lisi o gaoioiga e faataitai pe a latou le fiafia.
-
Mafaufau i se tagata faanoanoa po o i ai se itu o faanoanoa ai. O le a se mea e mafai ona fai e lou aiga e faaali atu ai ia i latou le alofa?
-
Faitau ma talanoa e uiga i tala mai le Liahona lea na feagai ai tagata o le Ekalesia ma tofotofoga ma le faatuatua i le Atua.
Ou te Manaomia le Fesoasoani!
Afai e te lagona e pei ua le mafai ona pulea lagona ma amioga a lau tama, po ua lamatia foi lo latou soifua maloloina faalemafaufau, aapa atu i se polofesa o le soifua maloloina faalemafaufau. (O loo i ai se tusiga o loo i lalo ifo ma motugaafa e uiga i lena faagasologa.) E mafai ona fesoasoani atu lou epikopo e fesootai atu ai i le Tautua mo Aiga po o isi punaoa o fautuaga i le tou eria. Ma le isi, o le mentalhealth.ChurchofJesusChrist.org o loo i ai se lisi o telefoni mo faalavelave ma isi punaoa e vili fua. E alofagia oe, ma e le o tuulafoaiina oe!