Faamanatuga o le Toefuataiga

O ni manatu mo gaoioiga faigofie mo aiga ma isi vaega

Ata pue o tamaiti o loo tusi ata ma tagata i le pati mai le Getty Images

O le 200 tausaga ua mavae, na alu atu ai se tamaitiiti e 14 tausaga i le togavao ma ni fesili. O tali na ia maua na tatalaina ai faitotoa mo le Toefuataiga o le Ekalesia a le Alii. Mo le faamanatuina, o manatu nei e mafai ona fetuunai mo le faaaogaina i aiga, vaega a le autalavou, uarota, po o paranesi.

Faaaliga Faamusika e Faamatala

Faailoa ni pese ma ni mau e mafai ona e faatulagaina e faamatala ai le tala o le Toefuataiga. O nei mea e mafai ona aumai mai le Iosefa Samita—Talafaasolopito, isi tusitusiga paia, ma viiga e uiga i le Toefuataiga mai le tusi o viiga ma le Tusipese a Tamaiti. Valaaulia tagata e fesoasoani e faitau vaega ma faatino le musika. Afai e mafai, mafaufau e faaaoga se tamaitiiti e 14 tausaga le matua e faitaua upu a Iosefa Samita.

Faaaliga o Faatufugaga

Valaaulia tagata e fatu ni galuega o faatufugaga e uiga i le Toefuataiga. O nei mea e mafai ona aofia ai atavali, ata tusi, faatagata, atapue, ma isi mea faapena. Fai atu ia i latou e filifili se mea na tupu po o se autu mai le Toefuataiga mo a latou faatufugaga. Faatulaga se taimi ma se nofoaga e faaali faatasi uma ai ma valaaulia isi e o mai ma vaai i ai.

Gaoioiga i le Vao Paia

Saili se nofoaga filemu e mamao mai i mea faalavefau, e pei ona sa faia e Iosefa. Mafaufau i se nofoaga i le natura pe afai e i ai se nofoaga e lata atu i lou fale. Faitau le tala a Iosefa Samita i lona alu atu i le Vao Paia e tatalo ai. Valaaulia tagata auai e faasoa mai pe na faapefea ona latou maua se molimau i le Toefuataiga o le talalelei po o aafiaga i se taimi na tali mai ai e le Tama Faalelagi a latou tatalo.

Faeasaite Faapitoa

Fai atu i se tasi e saunia se aoaoga e uiga i le Toefuataiga. O le failauga e mafai ona avea o se taitai o le Ekalesia, o se faiaoga talenia, po o se tasi e silafia lelei le talafaasolopito o le Ekalesia. Valaaulia ni uo po o ni tuaoi e aoao e uiga i le Toefuataiga ma le uiga ia i tatou i aso nei.

Mana o Tusitusiga Paia

Faapotopoto faatasi mai tagata uma ma a latou lava kopi o tusitusiga paia. Sa suesue Iosefa Samita i tusitusiga paia, ma le talitonu o le a ia maua ai tali. Faitau faatasi le Iakopo 1:5. Na fai mai Iosefa, na ulu atu nei upu “ma le malosi tele i lagona uma o [lona] loto” (Iosefa Samita—Talafaasolopito 1:12). Valaaulia tagata auai e faasoa mai ni fuaiupu o mau sa i ai se aafiaga malosi ia i latou pe na maua ai ni tali i a latou fesili.

Solo

Faatulaga se solo faigofie e i ai tagata po o vaega eseese e faatusa i mea eseese na tutupu, upumoni ua faaalia mai, po o faamanuiaga o le Toefuataiga. Pe a tusa ai ma tulaga, valaaulia tagata taitoatasi po o vaega e faasoa mai le taua o le mea na tupu, upumoni, po o faamanuiaga ua faatusa i ai. Atonu e mafai ona e maua se solo mo na’o tamaiti lava.

Taimi o le Tifaga

Tuufaatasi e matamata le vitio puupuu “Ole Atu i le Atua: O le Uluai Faaaliga a Iosefa Samita,” o loo maua i le ChurchofJesusChrist.org. Talanoa i mea e mafai ona e aoaoina e uiga i le tatalo mai le faataitaiga a Iosefa Samita. Faasoa atu pe faapeī ou lagona e uiga i le fesootai atu i le Tama Faalelagi.

Faamatalaina o tala

E mafai ona e faamatalaina le tala o le Uluai Faaaliga a Iosefa Samita? Oti ese faamatalaga e 10 o loo i lalo, faafefiloi, ona taumafai lea e faatulaga i le faasologa sao. Fai o se taaloga e ala i le faia o ni kopi se tele ma vaai po o ai e mafai ona uma muamua po o ai e aupito itiiti ana mea e sese. Siaki au tali i le faitauina o le Iosefa Samita—Talafaasolopito 1:7–20. Ona fai paga lea ma faamatala le tala pe faasoa atu lau molimau e uiga i ai i se uo. (Faasologa sao: 3, 9, 8, 5, 7, 1, 10, 6, 2, 4.)

1. Sa tatalo leotele Iosefa mo le taimi muamua o lona olaga.

2. Ua ta’u atu e Iesu Keriso ia Iosefa e aua nei auai i soo se tasi o lotu na i ai.

3. Na auai tagata o le aiga o Iosefa i se tasi o lotu Kerisiano.

4. Ua ta’u atu e Iosefa i lona tina ua ia iloa o lotu o loo auai ai tagata o lona aiga e le moni.

5. Ua filifili Iosefa e tatalo ma ole atu i le Atua mo le poto.

6. Ua faaali mai le Tama Faalelagi ma Iesu Keriso.

7. Ua alu Iosefa i le vao.

8. Ua faitauina e Iosefa le Iakopo 1:5 i le Tusi Paia.

9. Ua mafaufau Iosefa po o le fea le lotu moni.

10. E osofaia e Satani ia Iosefa ina ia le mafai ona ia tautala.

Ata o le tama o loo faitauina tusitusiga paia na saunia e Stacey Johnson

Ata o le tama ma le atalii o loo faaaoga le tamai komepiuta feaveai na saunia e Korene Knight