O le A le Mea o loo i totonu o le Atigipusa?
Na feminoia’i solo Ava i lona nofoa. Sa ia faalogoina o loo tautala lona faiaoga o le Peraimeri. Ae sa le mafai ona gauai atu i ai Ava. Na pau lava le mea sa mafaufau i ai o ia, o le atigipusa lea sa i lalo o le nofoa o Sister Obi.
Sa afifiina i se pepa iila lanu moana. Sa i ai i le pito i luga se lipine auro. Faamata o le a lea mea? Sa matuai faalagolago ifo e Ava lona ulu i lalo. Sa ia sioa atu i le atigipusa. Sa moomoo maimau pe ana mafai ona āti atu lana vaai i le pepa iila. E tau le mafai ona faatali o ia i le fia iloa po o le a le mea sa i ai i totonu.
Mulimuli ane na toso mai loa lea i fafo e Sister Obi le atigipusa. Sa ia tuuina i luga o ona vae.
“O loo i totonu o le atigipusa lenei se tasi o foafoaga aupito maoae a le Tama Faalelagi,” o le tala lea a Sister Obi. “Autilo i totonu. Ona pasi lea i le isi e aunoa ma le faia o se tala.” Sa ia pasi atu le atigipusa ia Noa.
Na siia’e lemu e Noa le tapuni. Sa ia sioa atu i totonu o le atigipusa. Sa ataata o ia. Ona ia pasi atu lea o le atigipusa ia Iuni.
Na tilotilo atu Ava a o faasolo i ai tagata uma. Sa taitoatasi ana uo ma tatala le atigipusa. Sa latou autilo i totonu. Na latou ataata.
O le a se mea ua sili ona taua i le Tama Faalelagi? Ma e faapefea ona ofi se mea e sili ona faapitoa i totonu o se atigipusa laitiiti?
Mulimuli ane, ona oo mai lea ia Ava. Sa ia aveesea tapuni iila ma tilotilo atu i totonu. Sa o se fā’ata! Na tilotilo Ava i le fā’ata i totonu o le atigipusa. Sa ia vaaia le toe autilo mai o ona lava foliga.
Sa vaaia e Ava le lapopoa o ona mata. Pe o ia ea se tasi o foafoaga silisili a le Tama Faalelagi? Pe na alofa tele faapena le Tama Faalelagi ia te ia?
Sa ataata Ava. Sa ia lagonaina le mafanafana ma le fiafia i lona loto. Sa pei o se opo lapoa. O se opo lapoa mai le Tama Faalelagi. Sa alofa o Ia ia te ia! O ia o se tasi o Ana foafoaga sili ona maoae.
Ata na tusia e Patricia Geis