Sa I Ai Isi Fuafuaga a le Alii mo i Matou
Ata mai le Getty Images
Sa masani ona ou tuua le fale i le 8:00 i le taeao ma toe foi atu i le vaeluaga i le uma ai ona faigaluega i le aso atoa ma alu i le vasega i le po. I taimi puupuu na ma faatasi ai ma lo’u toalua o Tanielu, ma te feupuai ai lava. Na faaletonu mea uma. Sa toetoe lava a ma tete’a.
I se afiafi o se tasi Aso Sa ina ua uma se finauga, sa faapea mai Tanielu, “Atonu e tatau ona ta faalatalata atili atu i le Atua.” O le aso na sosoo ai, a o i le fale Tanielu e vaai le ma atalii, sa tu’itu’i mai faifeautalai i lo matou faitotoa.
Ina ua amata ona asiasi mai faifeautalai ia i matou, sa ou le ioeina mea uma sa la aoaoina mai. Ae ina ua mavae ni nai lesona, sa i ai se mea na amata ona matou lagonaina. Matou te lei iloa po o le a, ae sa matou faamatalaina o se faalogona “ofoofogia,” o le toafilemu ma le lotogatasi. Sa tumau ai lava e ui ina sa malaga ese atu faifeautalai. Na matou iloaina sa matou manaomia soo lena lagona i totonu o le matou aiga.
O le musuia ai e le savali a faifeautalai e uiga i le taua o le aiga, sa ma vavalalata ai ma Tanielu i le ma faaipoipoga. Sa ou faamoemoe o le alu i le aoga o le a oo atu ai i se tulaga e sili atu ona lelei i la’u galuega. Ae sa ma filifili e taulai atu i lo matou aiga, faaalu faatasi ni taimi se tele, ma ia maua nisi fanau se toatele. Sa ou faamavae ma le aoga, faamavae ma la’u galuega, ae ou faigaluega o se failautusi ia Tanielu i lana pisinisi o le taulimaina o iniseti faalafuā.
E itiiti ifo ma le tolu masina talu ona mavae le asiasiga muamua a faifeautalai, ae papatisoina ma faamauina i ma’ua. Na telē se suiga o o matou olaga. Sa amata ona ma ola i le tulafono o le sefuluai. Sa amata ona matou tatalo i le fale ma i le galuega faatasi ma le aufaigaluega a Tanielu. Sa amata ona matou auauna atu i le Ekalesia. Sa ola le pisinisi a Tanielu, ma sa manaomia lona faafaigaluegaina o nisi tagata faigaluega.
Ina ua mavae le tausaga talu ona ma papatiso, sa ma o atu loa i le malumalu ina ia faamauina. I ni nai aso talu ona mae’a le faamauga, na ou iloa ai ua ou maitaga.
O Aso Sa e le faigofie ia i matou. E vave alu Tanielu mo fonotaga a fautua maualuga. E tatau ona ou tapenaina na’o au la maua fanau e toatolu mo le lotu. Ae ua mafai ona matou fefaasoaai faatasi le tele o le taimi i le aluga o le vaiaso. E tusa la pe i ai taimi matou te valavala ai i Aso Sa a o matou auauna atu i le Alii, matou te iloa ua faamanuiaina i matou.
Ua matou maua se molimau, a tatou faia la tatou vaega, e mafai ona fesoasoani le Alii ia i tatou, ma e oo mai faamanuiaga. Ua tele atu mea ua matou maua nai lo le mea na matou faamoemoe i ai mai a matou lava fuafuaga. E lelei atu mea sa i ai i le finagalo o le Alii mo i matou.