Konafesi Aoao ia Oketopa 2019

O numera uma o itulau e maua mai le Liahona o Novema 2019.

Tofu Loloto

O Le A Le Uiga o le Avea Ma Se Soo?

“O le avea ma soo e le o le faia o mea ia atoatoa,” sa saunoa ai Elder Dieter F. Uchtdorf, “o le faia o mea ma le loto i ai” (“O Lau Malaga Sili,” 87). O a matou filifiliga, sa saunoa mai ai o ia ma isi failauga o le konafesi aoao, nai lo o matou tomai e faaalia ai po o ai moni lava i tatou.

O i tatou ea o ni soo moni o Ia o lē na foai maia Ana mea uma mo i tatou? … Ou te augani atu i tagata uma e faalogo ma faitau i nei upu: Faamolemole, faamolemole aua ne’i aveesea lo outou tuuto atoa seia oo ina e tau atu i ai i se taimi e le tupu i le lumanai” (Elder Terence M. Vinson, “O Soo Moni o le Faaola,” 11).
“O le Au Paia o i latou ia ua ulu atu i le feagaiga o le talalelei e ala i le papatisoga ma o loo taumafai ia mulimuli ia Keriso o ni Ona soo. O lea, ‘o le olioli o le au paia’ ua faailoa ai le olioli o le avea e faapei o Keriso” (Elder D. Todd Christofferson, “O Le Olioli o le Au Paia,” 15).
“Ou te valaaulia outou ia tuuto atu i se faagasologa i le olaga atoa o le avea ma soo. Osia ma tausia feagaiga. Tau’ai a outou auala tuai i afu loloto ma tatafe. Ia tatanu atoa tou auupega o le fouvale e aunoa ma le lala mai i luga o ‘au” (Elder Dale G. Renlund, “Tautinoga Mausali ia Iesu Keriso,” 25).
“O la tatou folafolaga ia manatua pea le Faaola tatou te maua ai le malosi e tu atu ai mo le upumoni ma le amiotonu—pe o tatou i ai i se faapotopotoga toatele o tagata po o ō tatou nofoaga tuufua, lea e leai se tasi e iloaina a tatou amioga vagana ai le Atua” (Lisa L. Harkness, “Faamamaluina o Lona Suafa,” 61).
“O soo moni o Iesu Keriso e alolofa i le Atua ma Ana fanau e aunoa ma le faamoemoe i se mea e taui mai ai. Tatou te alolofa ia i latou e faaitaina i tatou, o e e le fiafia ia i tatou. E oo lava ia i latou o e faifai mai, saua mai, ma saili e faatiga ia i tatou” (Elder Dieter F. Uchtdorf, 88).

Ata o le tagata i le ala na pueina e Judith Beck, suesueina e Catherine Frost