Na o le Faatekinolosi: Autalavou Matutua ma le Faifai Pea o le Toefuataiga
O Upumoni e 4 ua Ou Aoaoina mai le Suesueina o Iosefa Samita o se Tusitalafaasolopito o le Ekalesia
E le tatau ona fefefe le autalavou matutua i le talafaasolopito o le Ekalesia. O le mea moni, e tatau ona e sailia.
A o ou laitiiti, sa ou fiafia e faalogologo i tala e faamatala mai e lo’u tina ia te a’u e uiga ia Iosefa Samita ma le talafaasolopito o Le Ekalesia a Iesu Keriso o le Au Paia o Aso e Gata Ai. Sa ou ola ae i Oregon i sisifo, ISA, o se eria na siomia e nati oketi ma faatoaga. Faatasi ai ma le fetagisi lemu o alisi i tua atu, sa faapotopoto lo matou aiga i lo matou poletito i tua i le taumafanafana ma faalogologo i lou tina o faamatalaina nei tala.
Masalo ona sa ou talavou foi, ae sa faapitoa lava le faagaeetia o au i tala mai le taimi o talavou le Perofeta o Iosefa Samita, e pei o le taotoga o lona vae lea sa faia e aveese ai se siama mai le ponaivi i le na o le fitu o ona tausaga. Po o le taimi na siitia atu ai le aiga o Samita i Niu Ioka i le taimi ao faaaoga lava e le taulealea o Iosefa ni tootoo i le tolu tausaga mulimuli ane. Sa ou aoaoina ni mea se tele e uiga ia Iosefa Samita lea sa sili atu ona ou iloa ni mea moni o le talafaasolopito nai lo o’u faiaoga o le Aoga Sa ma le Peraimeri!
Malamalama i Mataupu Faavae o le Talalelei e ala i le Talafaasolopito
A o faaauau la’u aoga, sa amata ona ou suesue ma le faamaoni i le talafaasolopito o Amerika ma le Ekalesia. Ua ou aoaoina ni mea se tele e uiga i le aganuu lea na soifua ai Iosefa Samita ma le talaaga lea na faavaeina ai le Ekalesia. O lenei faamatalaga na faaleleia ai le uiga o tala na ou aoaoina a o ou laitiiti. O lau aoga na fesoasoani ia te au ia iloa ai o le suesueina o le talafaasolopito o le talalelei toefuataiina e mafai ona taitaiina atu ai i se malamalama loloto o mataupu faavae taua o le talalelei. Sa ou aoaoina o lenei faagasologa e tatau ona taliaina nai lo le fefe i ai.
Ia Iulai 2018, sa mafai ai ona ou tuufaatasia lo’u naunau mo le talafaasolopito o le Ekalesia i au aoaoga faaletalafaasolopito ina ua ou auai i le Galuega Faatino o Pepa a Iosefa Samita i le Matagaluega o Talafaasolopito o le Ekalesia o se faatonu o lomiga. I lo’u tofiga, ou te faamaonia ai tusiga o pepa o faamatalaga o talafaasolopito ma tuuina atu i le au faitau ia faamatalaga e malamalama lelei ai i le tusiga.
I se isi faaupuga: o lau galuega le mafaufau i le soifuaga o Iosefa Samita i aso uma.
Suesueina o le Talafaasolopito ma se Mata o le Faatuatua
O Iosefa Samita lea e sili ona ou masani i ai i le avea ai ma se tusitalafaasolopito o se tagata Amerika tulaga ese ma faigata o le sa saili e faatu se nuu o Siona i le mea sa i ai i le tuaoi i sisifo o le Iunaite Setete. O loo i ai nisi o vaega o le soifuaga o Iosefa Samita e le o tele ai se malamalamaaga o le au tusitalafaasolopito ona na te faamaumauina ona aafiaga po o ni lauga.
Ae e tusa lava po o le a le mea tatou te faia pe le iloa, o le faatuatua e tatau ona faia se matafaioi i le suesueina o talafaasolopito o se tagata o le Au Paia o Aso e Gata Ai. O le talitonu i le Atua ma i le mataupu faavae o faaaliga faifai pea—lea e faapea e le muta ona fetalai mai o le Atua ma taitai Lana fanau—o loo tumau pea le avea ma se faavae o lo’u faatuatua ma faatumauina a’u i le talalelei lea ou te matua alofa i ai.
O ou aafiaga i aso taitasi i le suesueina o le soifuaga o Iosefa Samita ma le talafaasolopito o le Ekalesia i se tulaga lautele ua aoao mai ai ia te au ni mea se tele:
-
Na valaauina le Perofeta o Iosefa Samita e le Atua. Sa avea moni lava o ia ma se meafaigaluega i aao o le Alii e toefuatai mai ai Lana talalelei i le lalolagi. Ma e tatau ia i tatou ona faifai ai pea lena Toefuataiga.
-
E faaaoga e le Atua tagata le atoatoa—e pei o Iosefa Samita—e ausia ai le galuega maoae. O le a tofu faia e i tatou ni mea sese, ma o le mea moni e le o tuua na o i tatou; e oo lava i perofeta e faaaogaina le Togiola a Iesu Keriso e salamo ai, e pei foi o i tatou.
-
O loo silafia e lo tatou Tama Faalelagi i tatou taitoatasi—faatasi ma a tatou tauiviga ma fesili uma lava. O le aoaoga faavae na toefuatai mai e le Atua e ala mai ia Iosefa Samita na aoao mai ia i tatou o tagata taitoatasi o e ua fananau mai, ua i ai le taua faaletagata lava ia ma le gafatia e faavavau e avea ai e faapei o o latou Matua Faalelagi.
-
O le tuputupu ae patino ma faaaliga e mafai ona atiina ae i le gasologa o le olaga atoa. Na foliga mai na sili atu le malamalama o Iosefa Samita i lana Uluai Faaaliga a o faasolo ina matua o ia ona o aafiaga faafaaaliga na ia maua i lona soifuaga atoa. E faapena foi, e mafai ona tatou vaai atu i aafiaga ua tatou maua i o tatou olaga ma le iloaina e mafai ona faaauau pea ona tatou sailia faaaliga a o tatou atiina ae i luga o le upumoni ua tatou aoaoina.
I le avea ai ma talavou matutua, o le mauaina o tali i fesili e uiga i le talafaasolopito o le Ekalesia e mafai ona foliga taufaafefe i nisi o taimi, ae o se faagasologa e taua le faia. O le a faamalosia ai lo outou faatuatua a o outou aoao i tala e uiga ia i latou o e na fesoasoani i le Ekalesia e tuputupu ae i le lalolagi atoa. Ou te iloa na faapena a’u.