O Se Malumalu mo Ítalo
E alala le tusitala i Iuta, ISA.
E le mafai ona ia faatali e alu i ai i totonu i se aso!
“Ou te fia vaai i le malumalu. “Ou te ulu i ai i se aso” (Tusipese a Tamaiti, 99).
Sa fiafia Ítalo i le malaga a le uarota mo le malumalu. Sa latou o atu i le Malumalu o Recife Pasila. E 15 itula le mamao!
Sa malaga i le taeaopo lava ia Ítalo, o lona uso matua o Henrique, ma o laua matua. A o latou tietie atu, sa mafaufau lava Ítalo i se mea na ta’u atu e Tina ia te ia. “O le tausaga lenei, e mafai ai ona e vaai mai fafo i le matagofie o le malumalu,” o lana tala lea. “O le tausaga a sau, o le a lava ai lou matua e vaai ai i le matagofie o totonu.”
E lei alu muamua lava Ítalo i se malumalu. Ae sa matamata o ia i le fausiaina o le malumalu fou i Fortaleza, lea sa nonofo ai lona aiga. Sa ofoofogia lava!
Sa latou malolo mo le taumafataga o le aoauli. O Ítalo sa ai lana meaai e sili ona fiafia i ai, o le feijoada, o le sitiū o pi uli e ai i le araisa ma moli. A o ai o ia, sa mafaufau pea e uiga i le malumalu. Ina ua iu ina faapaiaina le malumalu i Fortaleza, o le a avea o se malumalu e mafai ona asiasi soo atu i ai lona aiga. O le a latou le toe tietie mamao ai.
E taunuu atu Ítalo ma lona aiga i le malumalu i Recife ua faasolo ina goto le la. “Que bonito!” Na fai mai ai Ítalo. “Ta’i manaia!” Sa le mafai ona ia taofi lona ataata.
O le taeao na sosoo ai, na avea atu ai e TIna ia Ítalo i le eria e faatalitali ai tamaiti. “E ui ina e le alu i le taimi lenei i totonu o le malumalu,” sa ia fai mai ai, “ae vaai pe e te lagonaina se agaga faapitoa a o e i ai i lotoa o le malumalu.” Ona o atu uma lea o isi o le aiga o Ítalo i totonu o le malumalu.
Sa vaavaai e le aufaigaluega lelei o le malumalu ia Ítalo ma isi tamaiti a o latou faatalitali i le malumalu. Sa latou faitau i tala mai le Livro de Mormon (Tusi a Mamona). “O le faitauina o tusitusiga paia o se auala lelei lea e sauniuni ai mo le malumalu,” o mafaufauga ia o Ítalo. Sa ia lagonaina le toafimalie ma le saogalemu. Sa ia mafaufau faapea, e sa’o Tina. E toafilemu lava iinei.
Ona ave lea e le aufaigaluega o le malumalu ia Ítalo ma isi tamaiti mo se savaliga faataamilo i lotoa o le malumalu. O le taimi lena na matauina ai e Ítalo ia upu i luga o le faitotoa i le malumalu, fai mai “Santidade ao Senhor. A casa do Casa le Senhor,” “E paia i le Alii: o le maota o le Alii.”
E leitioa a ou lagonaina le toafilemu iinei, o ona mafuafauga ia. O Le Fale Lenei o le Atua.
Ina ua uma le malaga i le malumalu, sa toe foi atu Ítalo ma lona aiga i le fale. Sa manao o ia e manatua ona faalogona sa i ai i le malumalu. O le a se mea e mafai ona ia faia?
O nisi taimi sa manatu ai Ítalo e lelei atu pe a mafai ona ia tusia se ata o ona faalogona nai lo le tusitusi e uiga i ai. O lea sa ia tusia ai se ata o le malumalu. Ona ia faaali atu lea ia Tina ma Tama.
“O le a faamanatu mai e lenei mea ia te a’u le mea ou te fia alu i ai,” o lana tala lea. Sa ia tuuina le ata i totonu o lona potu i le mea e mafai ona ia vaai atu i ai i aso taitasi.
“Ou te fia saunia!” o lana tala lea. “Ona ou te fia alu i totonu i se aso!”
Ata na tusia e Mitch Miller