Feiloai i Iosefa e To’a Fa o le 2 Nifae 3

Na e iloaina na saunoa se perofeta e igoa ia Iosefa e uiga ia Iosefa Samita i le toeitiiti 4,000 tausaga talu ai?

Vaai pe mafai ona e maitauina ia Iosefa uma o loo ta’ua i le 2 Nifae 3: Ua ta’u atu e Liae i lona atalii o Iosefa e uiga i nisi o valoaga na faia e Iosefa o Aikupito e uiga ia Iosefa Samita, o lē na faaigoa i le igoa o lona tamā, o Iosefa.

Vaai i le taimi o le faasologa o loo i lalo e malamalama lelei ai po o ai na Iosefa ma pe o anafea na latou soifua ai.

E tusa o le 1700 TLM

Sa nofo ai i Aikupito ia Iosefa, le atalii o Iakopo (o lē sa toe faaigoa ia Isaraelu). E toalua ona atalii, sa faaigoa ia Efaraima ma Manase.

E tusa o le 600 TLM

Sa tuua ai e Liae, o se suli o Manase, ia Ierusalema ma malaga atu i le vao mo ni nai tausaga. O iina, sa la fanaua ai ma lona toalua o Sarai se atalii na faaigoa ia Iosefa.

1771 TA

Na fanau ai Iosefa Samita le Matua i Massachusetts.

1805 TA

Na fanau ai Iosefa Samita le Itiiti i le aso 23 o Tesema, 1805, i Vermont. I le Uluai Faaaliga i le 1820, na vaai ai o ia i le Tama Faalelagi ma Iesu Keriso. Sa ia faaliliuina ma lolomiina le Tusi a Mamona i ni nai tausaga mulimuli ane, e pei lava ona sa fai mai ai Iosefa o Aikupito o le a ia faia (tagai i le 2 Nifae 3:11).

O A ni Mea na Ta’u Mai e Iosefa o Aikupito e uiga ia Iosefa Samita?

Na musuia e le Alii ia Iosefa i Aikupito e vaai i le tele o seneturi i le lumanai. Sa ia faasoa mai upumoni nei e uiga ia Iosefa Samita:

“E faatuina e le Alii lo’u Atua le tagata vaai e fai ma tagata vaai filifilia i le fua o o’u sulugatiti” (fuiaiupu e 6).
“Ma o le a silisili o ia e pei o Mose, o lē sa Ou fai atu o le a Ou faatu mai mo outou, e laveai loʼu nuu” (fuaiupu e 9).
“Ma o ia o le a Ou tuu atu i ai le mana e aumai ai laʼu upu i le fanau a ou sulugatiti—ma e lē nao mo le aumaia o laʼu upu, ua fetalai mai ai le Alii, ae mo le faatalitonuina foi o i latou i laʼu upu, lea o le a tatau ona uma ona alu atu muamua i totonu o i latou [e pei o le Tusi Paia]” (fuaiupu e 11).
“Ma o le a faamalosia o ia mai le vaivai, i lena aso pe a amata laʼu galuega i totonu o oʼu tagata uma, i le toefuataiga o oe, le aiga e o Isaraelu, ua fetalai mai ai le Alii” (fuaiupu e 13).
“O lena tagatavaai o le a faamanuiaina e le Alii; ma o i latou o e e saili e faaumatia o ia o le a faatoilaloina” (fuaiupu e 14).
“E igoa foi o ia i lo’u igoa; ma o le igoa foi lea o lona tamā” (fuaiupu e 15).

Na Faapefea Ona Faapei Iosefa Samita o Iosefa o Aikupito?

O Iosefa o Aikupito na tofia e Farao e vaaia le faaputuputuga o meaai e saunia ai mo se oge. Ina ua oo mai le oge, sa o mai tagata i Aikupito ma isi nuu uma ia Iosefa e faatau meaai. E oo lava i ona uso na o mai i Aikupito mai le Nuu Paia mo ni meaai. Sa faatagaina lea e Farao ia uso o Iosefa ma lona tamā ina ia maua ni meaai ma nonofo ai pea i Aikupito. O lenei mea na laveaiina ai i latou mai le matelaina.

I ona po o Iosefa Samita, sa feagai ai tagata ma se “oge” i le afioga a le Atua; sa latou matelaina mo le talalelei moni a Iesu Keriso. O Iosefa Samita o le perofeta lea na valaauina e le Alii e laveai i tatou mai lena oge—e ala i le toefuataiina o Lana talalelei ma le perisitua ina ia mafai ai ona tatou maua sauniga e manaomia mo lo tatou faaolataga faaleagaga.