Sa I Ai Sa’u Vaa e Fau

Saunia e Elder Juan Pablo Villar

O le Fitugafulu

O le aafiaga o Nifae na fesoasoani ou te iloa ai le auala e taulima ai luitau i lo’u lava olaga.

Ina ua ou ta‘u atu i o’u matua sa ou manao e faia se misiona, sa le’i fiafia i laua. Sa na’o maua ma lo’u uso matua o Aiveni tagata o Le Ekalesia a Iesu Keriso o le Au Paia o Aso e Gata Ai i lo matou aiga. Sa ou auai ina ua 18 o’u tausaga, ae o lea, i le tasi o le tausaga mulimuli ane, sa ou filifili ai e auauna atu o se faifeautalai faamisiona. E ui lava ina sa iu ina malilie o’u matua e tuu atu ou te alu, ae sa lapatai mai lo’u Tama e faapea, a oo i le taimi ou te foi mai ai, e le mafai ona ia faamaonia o le a ia totogia pea lo’u pili aoga o le kolisi.

Ae peitai, sa ou iloaina afai ou te auauna atu, o le a fesoasoani mai le Alii ia te au.

I lau misiona atoa, sa ou olioli lava a o ou vaai i tagata o taliaina le talalelei a Iesu Keriso ma agai atu i le faaolataga. Ina ua ou foi i le fale, sa toe amata au aoaoga. Ae sa le’i umi ae fai mai lo’u Tama, e pei ona sa ia lapatai mai ai, “E le mafai ona ou toe totogia se mea.”

E faapefea ona mafai lenei mea? Sa ou mafaufau. Sa ou auauna atu i se misiona. Sa ou faia le mea na finagalo le Alii ou te faia. Aisea ua tupu ai lenei mea ia te a’u?

Aoga ma Faigaluega

Ona ou manatua lea i le faitauina o le Tusi a Mamona. O Nifae, o le sa tausia poloaiga uma, sa poloaiina e fau se vaa, o se mea na te le’i faia muamua lava (tagai i le 1 Nifae 17:8, 49–51). Sa ou lagonaina le pei, sa i ai sa’u “vaa” e fau. Sa avea o se faafitauli tele lava ou te le’i iloa pe faapefea ona foia, o lea sa ou tatalo ai mo se musumusuga.

Sa le’i umi ae talanoa mai Aiveni ia te au. “Juan Pablo, ua ou faalogo e le toe totogia e lo ta tama lou pili,” sa ia fai mai ai.

“E sa’o,” na ou tali atu ai. “Ou te manatu ua uma mea uma mo au!”

Sa faigofie lava le tali a Aiveni, ae na musuia ai au. “E te iloa e mafai ona e aoga ma faigaluega?” sa ia fai mai ai. “O le ala lena, o le a mafai ai ona e totogia lou pili aoga.” O le taimi muamua lea na ou iloaina ai e mafai ona faia ia mea e lua! E le’i leva ae ou mauaina se galuega faavaitaimi lea na mafai ai ona ou faaauaua au aoga.

Sa ou toe mafaufau ia Nifae ma le vaa: “O lenei, o au o Nifae, ou te lei … ati ae le vaa i ala a tagata; ae sa ou fauina i le ala na faaali mai e le Alii ia te au” (1 Nifae 18:2).

Ana ou faalogo ia te au lava, semanu ua ou fati i la’u aoga. Ae na musuia au e le Alii, e ala i upu a lo’u uso, ia faaauau pea. O nisi taimi pe a i ai ni o tatou luitau i o tatou olaga, tatou te manatu e le o faamanuiaina i tatou e le Alii. Ae ua mafai nei ona ou vaaia ma le manino le auala na Ia faamanuiaina ai au i se avanoa e atinae ma tuputupu ae ai.

Aua Le Fiu!

I le avea ai ma se tagata aoga, sa ou faaipoipo foi. Ma, ina ua toeitiiti lava uma lo’u faailoga, sa ou iloaina ai ou te lei fiafia tele i le mea sa ou aoaoina. Sa ou manao e togi le solo. Ae sa fai mai lo’u toalua, “E le mafai ona e fiu. E te le iloa le mea ua saunia e le Alii mo oe, o lea e tatau ai ona e faaumaina.”

Sa ou toe mafaufau foi ia Nifae. E ui ina sa agaleagaina e ona uso matutua, ae sa lei fiu ai o ia. Nai lo o lena, sa tepa atu Nifae i le Atua ma vivii atu ia te Ia. Fai mai o ia “Sa ou lē muimui e faasaga i le Alii ona o oʼu puapuaga.” Mulimuli ane na faasaolotoina o ia, ma “sa oo o aʼu, o Nifae, sa ou tautaia le vaa, sa oo ina matou toe folau atu agai i le laueleele na folafolaina.

“Ma sa oo ina ua mavae ona matou folau mo le va o aso e tele, sa matou taunuu i le laueleele na folafolaina” (1 Nifae 18:16, 22–23).

O le faalogo atu i le fautuaga a lo’u toalua, sa ou faamaeaina ai lo’u faailoga. Ae sa amata ona ou faigaluega i se matata e ese mai.

O le lua o tausaga mulimuli ane, sa ou maua ai se uunaiga malosi e tatau ona faaleleia atili au aoga, ma na ou lagona e tatau ona ou alu i le aoga iunivesite maualuga atu. Ina ua ou amataina le faagasologa o le talosaga, o se tasi o mea muamua sa fesiligia ai au o le, pe o i ai so’u faailoga o le tagata malaga. I lena taimi, na vave oo mai ia te a’u upu a lo’u toalua: “E te le iloa mea ua saunia e le Alii mo oe, o lea e tatau ai ona e faaumaina.” Ana ou le faaumaina lo’u faailoga o le tagata malaga, semanu e le mafai ona ou maua la’u faailoga o le matuaofaiva.

O Perofeta e Taialaina i Tatou

O taimi uma lava ou te faitauina ai le Tusi a Mamona, ou te fesili ifo ia te au lava, O le a se mea o manao lenei perofeta mai le faitau afe o tausaga ua mavae ia ou iloa ma faaaoga i lo’u olaga ma i le olaga o lo’u aiga? Mo se faataitaiga, na aoaoina au e Nifae e tatau ona tatou saunia pe a valaauina i tatou e le Alii, ia faatuatua ia te Ia, ma auauna atu ma le faamaoni ia te Ia.

Ua ou iloa e aunoa ma se masalosalo, a valaauina oe e le Alii, o le a Ia saunia le ala, e pei lava ona Ia faia mo Nifae (tagai i le 1 Nifae 3:7).