Atatusi o le Faatuatua
Esther Cox
Luisiana, ISA
Sa o se isi lava aso o lologa ina ua uma timuga mamafa lea na taia ai Luisiana i saute. Ae peitai ina ua pa’ū le tama tama a Esther Cox e lua tausaga, o Mataio, i se alavai loloto ma tatafe e latalata ane, sa oo ina avea ma aso sili ona leaga o lona olaga. E oo ane i le taimi na maua ai e Siaosi, le toalua o Esther ia Mataio, ua 15 minute talu ona i ai o ia i totonu o le vai.
Leslie Nilsson, Tagata pueata
Sa faatumulia le potu faatalitali i le falemai e tagata o le Ekalesia na lagolagoina i matou. Ina ua sau lo matou epikopo i le falemai e fai le faamanuiaga o Mataio, na pau lava le mea na ou manatua o upu e faapea, o Mataio “o le a manuia”—ae e le o lo’u taimi, ae i le taimi a le Atua. Sa ou lagona le faamafanafanaina. Sa matou tatalo ma na matou iloa o le a lelei mea uma. E tusa lava po o a faafitauli o le a i ai ia Mataio, sa matou faatuatua o le a manuia.
Sa latou ta’uina le tulaga o Mataio o le “toetoe a malemo ona o le le lava o le okesene,” o lona uiga o le a faaleagaina le faiai mai le leai o se okesene. O le aso sili lea ona leaga o lo’u olaga, ae na toe aumai o ia e le Tama Faalelagi ia te au. O loo avea pea o ia ma a’u pepe. Ua 20 nei tausaga o o’u tausia o ia. E i ai a matou taimi fiafia ma taimi faanoanoa ae o ia o se faamanuiaga. E maoae tele o ia. Ma ua fesoasoani mai le Tama Faalelagi ia te au i nei mea uma.
Sa maliu lo’u toalua, o Siaosi, i le lima tausaga talu ai i le kanesa o le ate. Ou te lagona na saunia au e le Tama Faalelagi mo lona maliu. Ou te le’i toe manao i ni isi fanau ina ua uma Mataio ona sa ou faapea, o le a ia manaomia lo’u gauai atoa atu, ae sa le o le finagalo lea o le Tama Faalelagi, ma sa Ia tuuina mai ia Lilieni ia te au. Ou te matua faafetai lava mo ia. E fesoasoani mai o ia ia te au ia Mataio.
E le mafai e Mataio ona tautala, ae ou te manatu e malamalama o ia i mea uma. E fiafia o ia i le i ai i fafo. Sa ou tuua o ia e fetolofa’i solo. O le mea lena e fiafia o ia e fai. Ou te lagona o se nofoa faataavalevale o le a taofiofia ai o ia. Ou te manao ia saoloto o ia.
E leai se alofa e tutusa ma le alofa mai i se tagata e i ai manaoga faapitoa. Ma te alolofa tele i le tasi ma le isi. E i ai sa ma sootaga faapitoa tele. Ua faamanuia a’u e le Atua. Ua Ia faamanuiaina moni lava.
“Ou te le’i toe manao i ni isi fanau ina ua uma Mataio ona sa ou faapea, o le a ia manaomia lo’u gauai atoa atu, ae sa le o le finagalo lea o le Tama Faalelagi, ma sa Ia tuuina mai ia Lillieni ia te au. Ou te matua faafetai lava mo ia. E fesoasoani mai o ia ia te au ia Mataio.”
“O ia lava o la’u pepe,” o le tala lea a Esther e uiga ia Mataio. Ua 20 tausaga o o’u tausia o ia.”
“E tusa lava po o a faafitauli o le a i ai o Mataio, sa matou faatuatua o le a manuia. Ma o le mea lena sa i ai, “o le tala lea a Esther. “Ua fesoasoani mai le Tama Faalelagi ia te au i mea uma lava.”
E faaaoga e Mataio se nofoa faataavalevale faapitoa pe a i ai i le aoga, lea o le a ia auai seia oo i le 22 o ona tausaga.