O Upumoni e Valu mai le Uluai Faaaliga

I se taeao manino o le tautotogo i le 200 tausaga ua mavae, i le setete maotua o Niu Ioka i se togalaau filemu, na faaali mai ai le Atua le Tama ma Lona Alo o Iesu Keriso i le taulealea o Iosefa Samita. O lenei mea faavavega na tupu ua faamutaina ai seneturi o le le mautonu ma le taumatemate e uiga i le natura o le Atua, o le manaomia o faaaliga faifaipea, ma isi upumoni e faavavau ua leva ona galo pe puaoa e ala i le pogisa faaleagaga.

O Peresitene James E. Faust (1920–2007), Fesoasoani Lua i le Au Peresitene Sili, o le na faatatau i le Uluai Faaaliga e faapea “atonu o le mea aupito sili e tasi na tupu i le lalolagi talu mai le Toetu,” na faataatitia mai ai ni upumoni toefuataiina se valu i le lalolagi e ala i lenei mea ofoofogia na tupu.¹ A o tatou faamanatuina le 200 tausaga o le Uluai Faaaliga, mafaufau i upumoni nei ma le tele o molimau a perofeta o aso nei o e ua tuuina mai le molimau e le gata i le moni o le Uluai Faaaliga ae faapea foi i upumoni ua faaalia mai ai.

1. O le Atua lo tatou Tama o se tagata patino, ma o alii ma tamaitai sa faia i Lona faatusa.

“Sa aoaoina e Iosefa Samita i na minute [o le Uluai Faaaliga], po o le a lava le umi po o le puupuu, e tele atu mea e uiga i le natura o le Atua nai lo o mea faalelagi uma o taimi uma ua aoaoina.” —Peresitene Gordon B. Hinckley (1910–2008)²

“O loo i ai ni fofoga [taliga] o le Atua lo tatou Tama e faafofoga ai i a tatou talosaga. E i ai ni Ona fofoga [mata] e silasila mai ai i a tatou amioga. E i ai Sona fofoga [gutu] e fetalai mai ai ia i tatou. E i ai Sona fatu e lagona ai le agalelei ma le alofa. E moni o Ia. O loo soifua o Ia. O i tatou o ana fanau na faia i lona faatusa.” —Peresitene Thomas S. Monson (1927–2018)³

2. O Iesu o se peresona, e mavaevae ma e ese mai le Tama.

“I lana Uluai Faaaliga, na vaai ai Iosefa Samita i ni peresona eseese se toalua, ni tagata se toalua, ua faapea ona faamanino mai ai o talitonuga na taatele i na vaitaimi e faatatau i le Atua ma le Aigaatua e le moni.

“E ese mai i le talitonuga e faapea, o le Atua o se mealilo e le malamalama ma e le mafai ona iloa ia le upumoni e faapea, o le natura o le Atua ma lo tatou sootaga ma Ia e mafai ona iloa ma o le ki lea i isi mea uma i la tatou aoaoga faavaae.” —Peresitene Dallin H. Oaks, First Counselor in the First Presidency⁴

3. Ua tautino mai e le Tama o Iesu Keriso o Lona Alo.

“Matou te molimau atu, i le avea ai ma Ana Aposetolo ua faauuina i le ala e tatau ai—o Iesu o le Keriso Soifua, o le Alo tino ola pea o le Atua. O Ia o le Tupu silisili o Emanuelu, o loo tu i le taimi nei i le itu taumatau o Lona Tama. O Ia o le malamalama, o le ola, ma le faamoemoe o le lalolagi. O Lana ala o le ala lea e tau atu i le fiafia i lenei olaga ma le ola e faavavau i le lalolagi a sau.” —“O Le Keriso Soifua: O Le Molimau a le Au Aposetolo”⁵

4. O Iesu o le taumolimoli o le faaaliga e pei ona aoaoina mai i le Tusi Paia.

“O faaaliga uma talu mai le pau ua oo mai e ala ia Iesu Keriso, o le Ieova o le Feagaiga Tuai. … E le’i fesootai tuusa’o ma patino mai lava le Tama [Elohima] i le tagata talu mai le pau, ma e le’i faaali mai lava o ia vagana ai le faalauiloa mai ma molimau mai e uiga i le Alo.” —Peresitene Iosefa Filitia Samita (1876–1972)⁶

5. Sa faataunuuina le folafolaga a Iakopo ia ole atu i le Atua mo le poto.

“Ua faatulagaina e Iosefa Samita se mamanu mo i tatou e mulimuli ai i le foiaina o a tatou fesili. O le lilifa atu i le folafolaga a Iakopo e faapea, pe afai ua leai se poto ia i tatou ia tatou ole atu i le Atua, sa avatu sa’o ai e le taulealea o Iosefa lana fesili i le Tama Faalelagi. …

“I se tulaga faapena, o le a se mea e tatala mai e lau sailiga mo oe? O le a le poto e le o ia te oe? O le a se mea e te lagonaina ua manaomia vave ona iloa pe malamalama i ai? Mulimuli i le faataitaiga a le Perofeta o Iosefa. Saili se nofoaga filemu e mafai ona e alu soo i ai. Ia faamaualaloina oe lava ia i luma o le Atua. Liligi atu lou loto i lou Tama Faalelagi. Liliu atu ia te Ia mo ni tali ma mo le faamafanafanaga.” —Peresitene Russell M. Nelson⁷

6. Na iloa e Iosefa le moni a’ia’i o se tagata moni mai se lalolagi e le vaaia, o le na taumafai e faaumatia o ia.

“O Satani, po o Lusifelo, po o le tama o pepelo—pule a oe i se igoa e valaau ai—e moni, o foliga moni lava o mea leaga. O ona faamoemoega e faataumaoi i mea uma lava, ma e gatete o ia i le faaali mai o le malamalama togiola, i le mafaufau atu i le upumoni. … E faavavau lava lona tetee i le alofa o le Atua, le Togiola a Iesu Keriso, ma le galuega o le filemu ma le faaolataga. O le a tau o ia e faasaga i nei mea i soo se taimi ma soo se mea e mafai ona ia faia.” —Elder Jeffrey R. Holland o le Korama a Aposetolo e Toasefululua⁸

7. Sa i ai se liliuese mai le Ekalesia na faavaeina e Iesu Keriso—sa faatonuina Iosefa e aua nei auai i soo se lotu, aua sa la aoao atu aoaoga faavae a tagata.

“O le Liliuese, po o le pauu ese mai le uluai Ekalesia na faatulagaina e le Alii, … sa valoia e i latou sa fesoasoani e faatu le Ekalesia i le taimi muamua. Sa tusi atu Paulo i le au Kerisiano i Tesalonia o e sa faatalitali ma le naunautai i le Afio Mai Faalua o le Faaola e faapea, ‘e le oo mai lena aso, vagana ua oo mai muamua le liliu ese’ (2 Tesa. 2:3).” —Peresitene M. Russell Ballard, Sui Peresitene o le Korama a o Aposetolo e Toasefululua⁹

8. Na avea Iosefa Samita o se molimau mo le Atua ma Lona Alo, o Iesu Keriso.

“O le molimau a Iosefa Samita e uiga ia Iesu Keriso o loo soifua o Ia, ‘aua sa [ia] vaai ia te ia, i le lima taumatau lava o le Atua; ma sa [ia] faalogo i le leo o molimau mai o ia o le Toatasi na Fanaua e le Tama” (MF&F 76:23; tagai foi i le fuaiupu e 22). Ou te talosaga atu i tagata uma e lagona ma faitauina lenei savali, ia saili e ala i le tatalo ma le suesue i tusitusiga paia lena lava molimau o le uiga paia, le Togiola, ma le Toetu o Iesu Keriso.” —Elder D. Todd Christofferson¹⁰