E Finagalo o Ia ia Ou Fiafia
Ata mai le Getty Images
Ina ua faanatinati atu a’u i le potu mo faalavelave faafuasei ua le mafai ona gaoioi o’u māmā uma e lua, sa ou faapea ua uma ai lo’u ola. Ou te lei saunia faalelagona pe faaleagaga i le taimi lea mo le mutaaga, ae na fati lo’u tino ia te au. Sa faigata i lo’u aiga ona vaai mai ia te au i lea tulaga, ae sa tumau lo latou malolosi, ma sa faamanuiaina au i le toe manuia mai.
E lei uma ai iina au tauiviga. Talu mai lena taimi, e tatau ona ou ola i lou olaga ma na’o le tasi le māmā o loo galue pea ma se tuasivi pi’o. O aso uma lava e tiga ma faigata. Sa i ai se taimi na ou mafaufau ai, e sili atu pe a ou oti nai lo o le faaauau pea ona mafatia. Sa ou lagona le vaivai, e le na’o le faaletino, ae o le faalemafaufau ma le faaleagaga foi. Sa leai so’u faamoemoe ma se talitonuga mautinoa. Sa amata ona ou tuleia ese tagata i lo’u olaga o e na faamalosiauina au. “Ae latou te lei fiu ia te au. Sa latou alolofa ma tausia au, ma sa faaauau pea ona lagolagoina au e au uo. Ae ui i lea, sa ou lagonaina lava o le a le manuia lo’u lumanai e pei ona sa ou vaai faalemafaufau i ai.
I se tasi po sa oo ai ina ou lagonaina le faanoanoa tele. Sa tonu ia te au e tatau ona ou faitauina lo’u faamanuiaga faapeteriaka. Na maligi o’u loimata i le taimi na ou faitauina ai nai laina muamua, “E popole ma e alofa lo tatou Tama o i le Lagi ia te oe. “E finagalo o Ia ia e fiafia i lenei olaga.”
I lena taimi, sa ou iloaina ai o loo i ai moni i le Tama Faalelagi se lumanai matua faamanuiaina ua teuina mo a’u ma ni faamanuiaga matagofie ou te faamoemoe i ai pe afai ou te mulimuli i le ala e finagalo o Ia ou te ui ai.
Na silafia e lo tatou Tama oi le Lagi o le a tatou tauivi uma, o lea na Ia auina mai ai lona Alo, o Iesu Keriso, e puapuagatia mo i tatou ma ia faamafanafanaina i tatou. O le telē lena o lo laua alolofa ia te i tatou. Atonu ou te tauivi pea i aso uma o lo’u olaga iinei i le lalolagi, ae ou te iloa o loo i ai pea lo Laua alofa iina mo a’u ma o le a faataunuuina uma a Laua folafolaga pe afai ou te pipiimau pea ma mulimuli ia i Laua.