Autalavou Matutua
Pē le Tino ae e Lē Faanoanoa
E alala le tusitala i Cordoba, Atenitina.
Ina ua mavae le fanaina o a’u ma pē [ai lo’u tino], sa mafai ona faia e lo’u faatuatua ia Iesu Keriso le mea sa le mafai ona faia.
Mai lava i lo’u laitiiti, sa ou fiafia lava i taaloga, aemaise lava o le soka. Sa ou taalo i soo se taimi e mafai ai, ma sa ou moemiti e i ai se aso ou te tauva ai i le Olimipeka po o Taaloga a le Lalolagi mo Atenitina.
Sa nutililii a’u miti i se tasi o aso i le 15 o ou tausaga. Na faatoa uma lava ona ou asiasi i lo’u faiaoga seminare na gasegase, ma sa ou tietie atu i la’u uila i le fale, ae amata loa se taugafana a ni kegi se toalua totonu o lo matou pitonuu. Sa tau se pulufana na se mai i lo’u papatua.
Ina ua ou ala ae i le falemai i le aso na sosoo ai, sa ou iloa ai ua pē lo’u tino mai lo’u puimanava e oo i lalo.
O le Fesili e Fesiligia Pe a Tutupu Mea Leaga
A o o’u [faasolo] ina faamaloloina e fesili mai lo’u aiga ma uo pe o faapefea mai au. Sa ou iloa sa latou lagonaina uma le lagona popole alofa mo a’u, o lea ou te faaoleolea ai i latou i le faapea atu sa ou manuia. O le faamafanafana atu i isi sa fesoasoani ia te a’u, ae sa ou iloaina o le a le mafai ona ou toe savali ma e tatau ona ou aoao i auala e ola ai ma [lo’u] tino ua pe.
O le taimi lea, ua amata ona ou alu i le seminare ma toe toaga i le Lotu. O le seminare o le poutu lea na lagolagoina au i le toe foi mai, ma ia ou le ita i le Tama Faalelagi i le mea na tupu ia te au.
I le seminare sa aoao ai i matou e lo matou faiaoga e faapea, a tutupu mea leaga, e le tatau ona tatou fesili, “Aisea na tupu ai lenei mea ia te au?” Sa fai mai o ia, o le fesili e tatau ona tatou fesili ai o le, “O le a se mea e mafai ona ou aoaoina mai i lenei mea?”
Sa faigata ona faamalosi pea ma ia maua lagona mautinoa i taimi uma, ae ae o le fesili a lo’u faiaoga seminare na ou maua ai le tele o le malosi. Pe a leai so’u faamoemoe, ma pe a faatumulia lo’u mafaufau i le masalosalo, ou te toe foi lava i taimi uma i lena fesili: “O le a se mea e mafai ona ou aoaoina?” Sa fesoasoani lena mea ou te nofo ai i luga i aso uma, ma sa talitalia a’u i taimi ou te lagonaina ai le fiu.
Ae o le alii na fanaina au, sa faamanuiaina au e le Tama Faalelagi ia ou le lagonaina le lototiga ia te ia. Na iu lava ina alu o ia i le faamasinoga ma sa faasalaina ai i le falepuipui. A o i ai iina, sa ia tusi mai ia te au se tusi, ma talosagaina lau faamagaloga ma tau mai ia te au ua suia ona ala. Sa ou fai atu i ai ou te lei lagonaina se lototiga ia te ia ma sa ou fiafia ua suia o ia.
Mauaina o se Faamemeloga Fou
Mo ni nai tausaga talu ona uma le fanaina o au, sa ou le lagonaina le fia faia o se mea. Sa ou misia le taalo i taaloga, ma ou te le’i iloaina i lena taimi, e tele ni taaloga ua fetuunaia mo tagata e i ai manaoga faapitoa. Ina ua ou iloa lena mea, sa toe foi mai lo’u naunau i taaloga. Afai e fou se taaloga ia te au, ou te taumafai e aoao ai. Ma sa ou tuuina i ai le faamemelo lava e tasi lea sa ou faia i le soka ae e le’i pe lo’u tino.
E lei leva ae ou mauaina se taaloga e sili ona ou fiafia i ai e pei o le soka—o le pasiketipolo i le nofoa faataavalevale. Mulimuli ane, i le mavae ai o le tele o le taalo ma faataitaiga, sa filifilia ai au e avea ma sui faavaomalo o Atenitina. Ou te fiafia i le tulaga maualuga o le tauvaga i le va o au faatautava faavaomalo.
Sa ou taalo i le au pasiketipolo nofoa faataavalevale a tamaitai o le matou atunuu i Taaloga a Tagata e i ai Manaoga Faapitoa a Amerika i Saute i Chile i le 2014, o le taimi lena na matou manumalo ai i se pine auro. Ona matou tauva lea i le suega Siamupini a Amerika i Saute i Kolomupia, ma manumalo ai i se pine siliva i le 2015. Sa ou tauva foi i Taaloga Parapan a Amerika i Kanata i le 2015, lea sa matou agavaa ai mo Taaloga Paralympic 2016 [Olimipeka a Tagata e i ai Manaoga Faapitoa] i Rio de Janeiro, Pasila. Mulimuli ane, i le agavaa ai mo le Ipu o le Lalolagi, sa matou taaalo ai i Hamburg, Siamani, i le 2018. Ma ia Aokuso 2019, sa matou taaalo ai i Taaloga Parapan a Amerika i Lima, Peru.
O Faamanuiaga na Fesoasoani Ou Te Onosai Ai Pea
O nisi taimi ou te lotovaivai ai lava, ma o aso uma lava e i ai ona luitau e tatau ona ou faatoilaloina. Ae ou te faafetai i lo’u Tama Faalelagi mo le aiga ma uo lelei ua Ia tuuina mai ia te au. Ua Ia aumaia ni tagata taua se toatele i lo’u olaga, o e ua fesoasoani ia te a’u i le feagai ai ma lenei tofotofoga faigata. O le lagolago a le aiga e taua tele i le foiaina o luitau—e le na’o o tatou luitau faaletino, ae o o tatou luitau faalemafaufau, faalelagona, ma faaleagaga foi.
Ona o le talalelei i lo’u olaga, ou te talisapaia ai le tele o faamanuiaga ua tuuina mai e lo’u Tama ia te au ma faaauau pea ona tuuina mai ia te au. Ou te iloa e alofa o Ia ia te a’u. A na leai le faatuatua ia te Ia ma Iesu Keriso, e le mafai ona ou onosaia lenei luitau.
Ioe, e tatau ona ou fealuai i le olaga i se nofoa faataavalevale, peitai e ui lava i la’u nofoa faataavalevale, ua mafai lava ona ou ausia le tele o a’u miti a’o ou laitiiti. Ou te ta’u atu i tagata, “Talitonu i lo tatou Tama. O loo faatasi o Ia ma i tatou. Faatasi ai ma Lana fesoasoani, e mafai ai ona tatou faatoilaloina o tatou luitau. Aua ne’i aluese lou faatuatua. Tumau mausali i le talalelei. Ia faatutu ni sini, ma o le a outou ausia. O le a fesoasoani lo tatou Tama Faalelagi ia te oe.”
Faatasi ai ma le lagolagoina o au i ou luitau ma sini, e fesoasoani foi lo’u faatuatua ou te ola ai i mataupu faavae o le talalelei a Iesu Keriso. O le auai i faagatama e mafai ona aumaia ai faaosoosoga, ae o le tausia o mataupu faavae o le talalelei ma lo’u manatuaina o o’u tulaga faatonuina, e fesoasoani ou te faia ai filifiliga lelei.
Ou te taumafai e fesoasoani i isi e ala i au faataitaiga. Ou te le inu avamalosi. Ou te le ulaula. Ou te le faia isi mea e fai e nisi o tagata taaalo. E fai si faigata ona faasoa atu la’u molimau po o tusitusiga paia, ae ou te taumafai e aoao isi e ala i mea ou te faia ma mea ou te le faia.
O Loo i Ai i le Tama Faalelagi Tali Uma
O nisi taimi tatou te feita ai i le Tama Faalelagi ona o mea faigata e tutupu ia i tatou po o tagata tatou te alolofa i ai, ae tusa lava pe le o taimi uma tatou te iloa uma tali i o tatou tofotofoga, ae ua silafia e Ia.
E le tuuina mai e le Tama Faalelagi ia i tatou ni luitau e le mafai ona tatou faatoilaloina. E pei ona fai mai lo’u faiaoga seminare, o nisi taimi e tutupu ai mea leaga mo se mafuaaga. Ma o nisi taimi o na mea faigata e mafai ona iu ina faamanuiaina ai i tatou ma isi. Afai tatou te taofimau i lo tatou faatuatua i le lotolotoi o o tatou tofotofoga, o le a mafai ona faamalolosia e a tatou faataitaiga o le faatuatua isi o e manaomia le fesoasoani e feagai ai ma o latou tofotofoga ma agai ai i luma.