O Le Tusi a Mamona o le Matou Faifeautalai Lea
Ata na tusia e Eva Vasquez
Ina ua oo le ma tei i se faalavelave matuia, sa ma talanoa ma lo’u toalua, o Ana Maria, e uiga i lo ma fia iloa o le upumoni i le tele o tapuaiga ma talitonuga eseese. I se tasi o aoauli sa ou saofai ai i luga o lo’u moega ma tatalo, “le Alii e, faamolemole fesoasoani mai ia ou maua se auala e iloa ai po o le fea le lotu moni.”
E lima minute mulimuli ane, ae tatagi loa ma le telefoni. Na valaau mai se uo e valaaulia i ma’ua ma lo’u toalua i lona fale e aoao e uiga i nisi o oloa o meaai maloloina. Sa ma o, ma a o ma i ai iina, sa tuuina mai e le ma uo ia i ma’ua se Tusi a Mamona. I le itulau autu sa i ai se faamatalaga patino: “Ou te faamoemoe e fesoasoani lenei tusi ia te oe e latalata atili atu ai i lo tatou Alii o Iesu Keriso.”
O le aso na sosoo ai, sa ou tilotilo ai i le tusi ma toe tatalo foi, “le Alii e, tau mai ia te au pe moni lenei tusi. Ou te le fia faatiga ia te oe i le faitauina o se mea leaga.”
Sa amata ona ou faitau. A o ou faitau, sa ou lagonaina e pei na ou iloa tagata o le Tusi a Mamona. Ina ua ou tau i le faaiuga, sa matuai ou tiga lava i le faatafunaga o sa Nifae o lea na ou tagi ai. E faitau selau ni tusi na ou faitauina, ae e leai se tusi na ou ootia ai i le ala na faia e le Tusi a Mamona. Na ou iloaina ua moni.
I se tasi Aso Sa sa ou valaaulia ai Maria ma te o atu faatasi i se falesa e lata ane a le Ekalesia a Iesu Keriso o le Au Paia o Aso e Gata Ai. Sa ou faapea ai a le fia sau, ae na ia malie i ai. Sa ma fiafia i mea sa ma faalogo i ai. Ina ua maea, sa fesili mai tagata o le uarota pe mafai ona latou auina mai faifeautalai. “Ioe,” sa ma tali atu ai.
E le’i umi ae taunuu mai faifeautalai ma uu mai le Tusi a Mamona ma fai mai e i ai se la savali e faasoa mai ia i ma’ua. “E ese le manaia o lena tusi,” sa ou fai atu ai. “Ua uma ona ou faitau i ai.” Sa tete’i i laua i lenei mea. Ona faate’i lea o au e Ana Maria. “Ma o loo o’u faitaua i le taimi nei,” sa ia fai mai ai. “Ua ou oo ia Mosaea.”
Sa tau o ia i le tusi i luga o le laulau i le mea na ou tuua ai i aso uma ae ou te le’i alu e faigaluega ma amata ai ona ia faitauina. Mulimuli ane, sa ia toe faateia a’u ina ua fai mai, a o ou tatalo mo se taitaiga mai le Tama Faalelagi i ni nai vaiaso na muamua atu, sa ia faia foi lena lava tatalo i se isi itu o le ma fale.
Sa ou ta’u atu i faifeautalai ua ou sauni e papatiso. Sa la aoaoina i ma’ua i lesona, ma o le lua vaiaso mulimuli ane, sa papatisoina ma faamauina ai i ma’ua ma lo’u toalua. Ma te matua faafetai lava ona na auina mai e le Alii ia i ma’ua le Tusi a Mamona e fesoasoani ia ma iloa ai po o le fea o lotu e moni.