Sa Ou Vaai i se Faaaliga Vaaia

Saunia e le Perofeta o Iosefa Samita (1805–44)

Peresitene Muamua o le Ekalesia

Mai le Iosefa Samita—Talafaasolopito 1:13–17, 25.

I le tautotogo o le 1820, sa taumanatunatu ai Iosefa Samita e 14 tausaga le matua po o le fea o lotu e tatau ona auai. Sa liliu atu o ia i tusitusiga paia mo ni tali. I le Iakopo 1:5 na ia faitau ai afai e leai se poto ia i tatou, e mafai ai ona tatou ole atu i le Atua.

Ina ua mavae se taimi, sa oo ina ou taunuu i le faaiuga o loʼu tumau pea i le pogisa ma le fenumiai, pe ou te faia e pei ona faatonu mai e Iakopo, o lona uiga, ia ole atu i le Atua. …

O lea, e tusa ai ma lenei faamoemoe … sa ou alu atu ai i le togavao e faia lenei taumafaiga. O le taeao o se aso matagofie lava ma le manino, i le amataga lava o le tau totogo o le afe valu selau luasefulu. …

Ina ua mavae ona ou taunuu i le mea na ou muai filifilia ou te alu atu i ai, ina ua mavae ona ou vaavaai solo faataamilo ane ia te au, ma ina ua ou iloa ua nao au lava, sa ou tootuli i lalo ma amata ona tuu atu manaoga o lou loto i le Atua. Sa tau le mafai ona ou faia, i le taimi lava na vave ai ona ou mauaina se mana na faapea ona lofituina atoa ai au, … Sa siomia au i se pouliuli mafiafia, ma sa foliga mai ia te au i se taimi e peiseai ua malaia au i se faafanoga faafuasei.

Peitai, i le faaaogaina o loʼu malosi atoa e valaau atu ai i le Atua e laveai aʼu mai le mana o lenei fili sa taofia aʼu, ma i le taimi tonu lava na ou sauni ai e goto atu i se tulaga e aunoa ma se faamoemoe ma tuu atu aʼu lava i le faafanoga… na ou vaaia ai se malamalama faaniutu i luga aʼe tonu lava o loʼu ulu, ua sili atu le pupula i le la, ua alu ifo malie lava seia oo mai i oʼu luga.

… Ina ua oo mai le malamalama i oʼu luga, sa ou vaaia ni Tagata e toalua, o lo laua pupula ma le mamalu e lē mafaamatalaina, o tutu mai i oʼu luga aʼe i le ea. Sa fetalai mai le tasi o i laua ia te au, ma fofoga mai ia te au i lou igoa ma fetalai mai, ao tusi ane i le tasi—O Lo’u Atalii Pele lenei. Faalogo ia te Ia!…

… Sa ou vaai moni i se malamalama, ma i le totonugalemu o lena malamalama, sa ou vaaia ai ni Peresona se toalua, ma sa la’ua fetalai moni mai lava ia te a’u; ma e ui ina sa inosia ma sauaina au i lo’u fai atu sa ou vaai i se faaaliga vaaia, ae ua moni; … Sa ou vaai i se faaliga vaaia; ua ou iloaina, ma ua ou iloaina sa silafia e le Atua, ma e le mafai ona ou teenaina.

O se Mamanu mo le Sailia o le Upumoni

E mafai faapefea ona tatou iloa le mea moni? Ua faatulaga e Iosefa Samita se mamanu mo i tatou e mulimuli ai.

Sa i ai se fesili a Iosefa ma faitau le Iakopo 1:5 afai ua leai so tatou poto e mafai ona tatou ole atu i le Atua.

O le sailiga a Iosefa na taitai atu ai i le Toefuataiga o le talalelei a Iesu Keriso. O le a le mea o le a taitai atu i ai lau sailiga?

A i ai ni au fesili, o fea e te alu i ai mo ni tali?

Na faasoa mai e Peresitene Russell M. Nelson le auala e mafai ona tatou mulimuli ai i le faataitaiga a le Perofeta o Iosefa:

“Saili se nofoaga filemu. Ia faamaualaloina oe lava ia i luma o le Atua.”
“Tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o faanaunauga tonu o lou loto.
“Ona faalogo lea!”
“Tusi manatu e oo mai i lou mafaufau.”
“Tulitatao i faatinoga e uunaia oe e fai.”

“O finagalo moni ea le Atua e fetalai mai ia te oe? IOE!”

(Mai le konafesi aoao ia Aperila 2018.)

Ata na tusia e Andrew Roberts