“Ua Ou Fia Alu i le Fale”
Ata na tusia e Allen Garns
A o ma aai ma lo’u toalua i le aoauli i se faleoloa sanuisi i le lotoifale, sa savali mai i totonu se alii foliga ve’uve’ua, leiloa ma le le mautonu. Ina ua savali agai mai o ia i le ma laulau, sa ou te’i ona sa le’i fai mai mo se tupe. Sa ona ia fesili mai mo le faasinoga o le auala e alu i Flagstaff, Arisona. Sa ma tuuina atu ma lo’u toalua ia te ia ni faasinoga. Sa ia faafetai mai ia i ma’ua ma aluese atu.
Ina ua uma ona ma aai, sa ma agai atu loa i le fale. E lei umi ae ou vaaia le tamaloa o savali atu i le pamu penisini. Sa ou maua se uunaiga malosi e fesoasoani atu ia te ia ma fai atu loa i lo’u toalua e afe le taavale i le pamu kesi. Sa ou maua le tamaloa ma faailoa atu i ai lo’u igoa. Sa faanoanoa ma lelavā ona mata. O ona foliga sa pei na vane ai ni laina loloto mai se olaga faigata.
Sa ou fesili atu pe na faapefea ona ia fuafua e alu atu i Flagstaff. Sa ia fai mai, o le a savali. Sa ou iloa o le a faigata lena mea ona o Flagstaff e silia ma le 120 maila (193 km) le mamao. Sa ou tuuina atu ia te ia se tupe ma fai atu ia te ia, e mafai ona alu i se faleaiga lata ane mo meaai faavavave e faatau ai sana meaai, ma o le a ou toe foi mai e momoli o ia i le nofoaaga o pasi ma faatau se pepa e alu ai i le pasi i Flagstaff.
Sa ou toe foi atu i le taavale ma ta’u atu i lo’u toalua le mea na tupu. Ona o ona faafitauli tau i le soifua maloloina, sa ou valaau ai i sa’u uo ma talosagaina e sau ma te toe o. Sa malie mai o ia. Sa ma aoina mai ni sapalai, meaai, ma ni vai. Ona ma tietie atu lea i le faleaiga ma piki mai le tamaloa.
A o matou o atu i le nofoaga o pasi, sa amata ona fai mai soo si tamaloa, “Ou te fia alu i le fale” Sa ou fesili atu pe o Flagstaff sa i ai lona fale. E leai ae o lona afafine, o lē ua o ni nai tausaga e le’i toe talanoa i ai, sa nofo iina. Sa ia faamatala mai e faapea, o le lua vaiaso na muamua atu na tatala mai ai o ia mai le falepuipui. Sa momoli atu i laua ma se tasi o pagota ua magalo i le nofoaga o pasi ma tuuina atu ia i laua uma ni pepa malaga o le pasi. Sa gaoi e le isi pagota lana pepa malaga ma si ana tupe itiiti na i ai. Talu mai lena aso, na fealualuai ai lava i le ala tele. E leai se tasi e fesoasoani ia te ia.
Sa ia toe fai mai foi, “Ua ou fia alu i le fale.”
Sa matou taunuu atu i le nofoaga o pasi. Sa ou faatauina lana pepa malaga ma tuuina atu ia te ia se tupe ma sapalai na ma’ua aoina mai. Sa ia faafetai mai ia i ma’ua ma saofai i lalo. A o ma o ese mai, sa ou faalogoina pea lava pea upu a le tamaloa i lo’u mafaufau: “Ua ou fia alu i le fale.”
Pe le o le mea ea lena tatou te mananao uma i ai? Tatou te le o i ai uma lava mai le aiga alofa na tatou tuua ina ua tatou o mai i le lalolagi. E mafai e i tatou uma ona se mai lo tatou ala, o lea na faaali mai ai e Iesu Keriso ia i tatou le ala e mulimuli ai, ma e ala mai i Lana taulaga togiola, na totogiina ai le tau maoae mo a tatou agasala. E pei lava ona le mafai e lenei tamaloa ona foi atu na’o ia i le fale, e le mafai foi ona tatou foi atu i lo tatou aiga faalelagi e aunoa ma lo tatou Faaola.