O Le Ala Na Ou Maua ai le Faatuatua Ina Ua Ou Lagonaina e Pei ua Aveesea Mea Uma

Saunia e Jennifer Enamorado

O le aveesea o lo’u lima ma le maliliu o e pele o ni luitau faigata, ae sa fesoasoani mai le Tama Faalelagi ia te au e suia mo le lelei.

I se tasi po sa ou tootuli ai i autafa o lo’u moega, ma ole atu i le Tama Faalelagi pe mafai ona fesoasoani mai ia te au ia ou maua le faatuatua sili atu, i le manatuaina o se mau o le Feagaiga Fou lea na fai atu ai se soo ia Iesu Keriso e “faateleina lo tatou faatuatua” (tagai i le luka 17:5). Ou te lei iloa e faapea o le taimi lava e uma ai lenei tatalo, o le a ou feagai ai ma nisi o tofotofoga sili ona faigata i lo’u olaga. Ou te faafetai lava ona sa ou saili e faateleina lou faatuatua i le Faaola ina ua oo mai na tofotofoga, aua ou te le iloa pe faapefea ona ou faasaoina i latou e aunoa ma le fesoasoani mai o le Tama Faalelagi.

I ni nai aso talu ona uma lena tatalo, sa ou oo ai i se faalavelave matautia lea na toeitiiti lava a aveesea ai lou lima agavale ma sa tipiesea ai o’u tamatamailima uma i lena lima. Sa mautinoa lava sa le’i toe tutusa lo’u olaga. E ui lava ina sa ou lagonaina le alofa o lou Tama Faalelagi ma lou aiga ma uo e ala i le faagasologa umi o taotoga ma togafitiga, ae sa matua faigata lava.

I se tasi aso ina ua uma ona fai mai lou fomai e tatau ona ou mauaina ni togafitiga faaletino mo ni masina, sa ou alu i le fale ma loimata ma ole atu i le Tama Faalelagi, “o le a le umi e tatau ai ona ou onosaia lenei mea?” O le taimi lava lena, sa pei na tau mai ia te au e se leo agamalu ma le manino, “e le mafai ona e alualu i luma e aunoa ma tofotofoga. O loo manaomia pea isi mea e sili atu.

Sa ou le talitonu faapea ua ou maua se tali vave i lau tatalo. O le taimi lena, sa ou naunau ai lava e agai i luma i le faatuatua. Sa ou filifili e toe auina atu au pepa o le misiona ma auauna atu i le Atua, e ui lava i ou luitau. I ni nai masina mulimuli ane sa ou maua ai lou valaauga o le misiona i le misiona a Kuatemala Aai Kuatemala i Saute! Ae peitai o le mauaina o lena tulaga sa lei faigofie foi. Sa manaomia ai le tele o le toa ma le lototoa e talia ai ou tulaga, faagalo au lava, ma valaaulia isi e mulimuli ia Keriso.

O Le Manatuaina E Mafai Ona Ou Faia Mea Faigata

Sa matagofie la’u misiona. Sa ou aoao e faataua atili ia mataupu faavae o le talalelei, ma sa ou maua ai le talitonuga ia te au lava e faasoa atu lau molimau ma aumai le faamoemoe i le toatele o tagata o e sa le iloa le mea e maua mai ai. Sa ou lagonaina le suia o lou loto e le Tama Faalelagi. Ou te lei iloaina lava pe faapei le lagona o le alofa i tagata ese ma le naunau e tuuina atu mea uma ua ou maua mo i latou e aunoa ma le faatuai i le taimi nei—o le savalia o aso uma, timuga pe susulu atu, e o’u vae vaivai ma tiga.

Ina ua uma lau misiona, na fesoasoani na aafiaga uma ou te tumau ai i le faamoemoe i le lalolagi le mautonu ma papau i le aiga. Sa ou toe foi atu i le fale i se taimi sili ona faigata mo lou aiga ma lou atunuu. Sa tele ni faafitauli faaupufai ma faaletamaoaiga, ma e tele aiga sa malaga atu i isi atunuu ona o le leai o ni galuega faigaluega ma ni avanoa aoga. Sa ou le talitonu ua tele naua mea na suia i sea taimi puupuu, e oo lava i lou lava aiga. O nisi o tagata e pele ia i matou ma uo ua maliliu foi. Sa ou lagonaina le lofituina i faafitauli uma na siomia ai a’u.

I se tasi aso, i le lagonaina o le lotovaivai, sa ou aumaia i fafo lau api suesue o tusigamanatu ma amata ona ou tusia lagona o i lo’u loto. Sa ou mafaufau i le tele o aafiaga sa ou maua a o auauna atu i isi i lau misiona. O le toe manatuaina o na aafiaga faapitoa o le mea tonu lava lea sa ou manaomia e faaaofia atili ai au i Lana galuega, ia auauna atu ma faaauau ai pea ona atiinae meaalofa ua Ia faamanuiaina ai au. O lena aso sa tu matilatila mai ia te a’u se fasifuaitau taua e masani ona ta’u soo mai e le faletua o le peresitene o la matou misiona ia i matou: “E mafai ona e faia ni mea faigata.” Sa ou taumafai e manatua lena mea, e aofia ai a o aoao e faaaoga se lima faapipii ma taumafai e ola i se olaga masani.

O ni Suiga mo le Lelei

I le aluga o faigata sa ou feagai ai, sa tuputupu ae la’u molimau—ae maise lava lo’u faatuatua i vavega. E tutupu vavega pe afai tatou te faia se mea ma le naunautai, faatumauina, ma le faatuatua. O i latou e talitonu i le Tama Faalelagi e mafai ona i ai i taimi uma le faamoemoe i soo se tulaga.

Ou te iloa o tofotofoga i lou olaga faaletino o le a faaauau pea, ae e le tatau ona ou fefe aua e mafai e tofotofoga ona aumai faalatalata atili atu ai i tatou i le Tama Faalelagi, o le e mafai ona fesoasoani ia i tatou ia iloa le auala e alualu ai i luma. O lo’u faalavelave ma luitau faigata uma sa ou oo i ai talu mai lena taimi ua toe faamanatu mai ia te au e liliu atu i le Tama Faalelagi mo se fesoasoani. Ma ua Ia fesoasoani mai ia te au e suia mo le lelei. Ua ou matua fiafia lava sa ou tatalo mo se faatuatua atili, ma ua ou iloa e ala i ou tofotofoga, ua mafai ai ona ou auauna atu i le Tama Faalelagi ma ou latalata atili atu ai ia te Ia. E ui lava i le suia o lou olaga i ou tofotofoga, o loo ou matua fiafia lava ma ou te matua faafetai i le oo mamao mai i le fesoasoani a le Tama Faalelagi. E le mafai ona ou faatali mo le aso pe a ou toetu—pe a mafai ona ou toe vaai ia te Ia ma fai atu ia te Ia, “Faafetai! Faafetai lava mo le faalotomaualaloina o au, faafetai mo le mamanuina o au, faafetai mo le ‘faateleina o lo’u faatuatua!’”