Alu Pea, Sose!
E alala le tusitala i Colorato, ISA.
“Ia tatou taufetuli ma le onosai i le ala tanu o i o tatou luma” (Eperu 12:1).
Sa mavava Sose a o faalemu lana tamo’emo’e i se savali. O le asō o se tuuga tele! Sa tulimatai atu o ia i lenei aso mo le tele o masina. Ae nai lo le lagonaina o le fiafia i le taimi o sauniuniga ma faavevela, sa lagona e Sose le lelavā.
“O a mai?” sa fesili atu ai lona uso matua o Kilisitine. Sa la saofafai i lalo ma Sose i luga o le mutia ina ia mafai ona fālō o la vae.
“Ua matua o’u lelavā lava,” na fai atu ai Sose, a o aapa atu i ona tamaivae.
Sa ma’i o ia ma sa le aoga ai i ni nai aso. O anapo la, sa tuai ai ona moe o ia i le tau faaumaga o ana meaaoga.
“Ou te faamoemoe o le a ou le tuua i lalo la tatou au,” o le tala lea a Sose.
“Tau lava o le fai o le mea sili e te mafaia,” sa fai atu ai Kilisitine. “Pei lava o le a tatou amata!”
Na tamo’emo’e atu teineiti e faatasi atu i le latou au taaalo. A o latou tutu faatasi ma isi au taufetuli, sa moeiini mata o Sose ma manava tele i totonu. Sa ia iloa sa faamoemoe le latou au ia te ia e tamo’e saoasaoa, e pei ona sa masani ona ia faia. O le taimi taufetuli mai tagata taufetuli lelei e toalima o le latou au o le a iloa ai pe alu le latou au i le suega siamupigi. Sa le’i tu lelei o ia i lona tulaga ae pa loa le fana e amata ai le tuuga. Pa! Sa taufetuli ese atu le autamomo’e mai le laina amata ma faanatinati atu ai i luma.
Sa saele e Sose ona lima ma faauumi ana laa. Sa ia iloa e tatau ona ta’imua i le amataga pe afai e manao ia mamao lana mua. I le taimi muamua na mafai ai e Sose ona maua atu isi au taufetuli na muamua atu. Ae ina ua taumafai o ia e tamoe televave, sa le mafai ona ia faia.
Sa faamalosi atili le manava a Sose. Ae sa le mafai ona ia tuleia ona vae ia masasau atili. Sa amata ona tipi o ia e au taufetuli sa i ona tua. E masani lava o Sose, o le tagata sa faia le tipitipi tagata! Pei lava e sili ai le togi o lo’u solo, sa ia mafaufau ai.
Sa tilotilo ifo Sose i lalo i le palapala a o ia faalogoina se isi tagata tamoe o pasia o ia. “Alu pea, Sose!” na fai mai ai le tagata tamoe a o tamoe ane o ia. Sa ea a’e i luga Sose. Ona ia ataata lea. O se tasi o lana au taalo.
“E mafai ona e faia!” sa fai atu ai se tasi o le autaalo a o pasia ae o ia. A o pasi ane taitoatasi e le autaalo a Sose o ia, sa latou faamalosiau atu ia te ia e tamoe pea.
Sa lagona e Sose se uunaiga o le pulunaunau. Atonu o le a le i ai o ia i le toalima pito i luga, ae e mafai lava ona ia faaumaina le tuuga. Sa taulai atu o ia i ana sitepu ma sa le’i tu seia iu ina ia sopoia le laina o le tini.
“Ou te faamalie atu pe afai ou te … lei fesoasoani ina ia tatou … agavaa mo le isi tuuga, “o lana tala atu lea a o tau manavanava.
“Sa agavaa le tatou au!” Sa fai mai ai le faiaoga a Sose a o tamoe atu i teineiti. Sa alalaga tagata uma o le au, ma sa fusi mai e Kilisitine ia Sose i se opo lapoa.
O le po lena a o tootuli Sose e tatalo, sa mafaufau o ia i le ala na fesoasoani ai teine o lana autaalo ia te ia. O a latou upu na tuuina atu ai ia te ia le malosi e faaauau ai pea i le taimi na manao ai e togi le solo.
Sa tilotilo ae Sose i luga i le ata o Iesu o loo tautau i luga ae o lona moega. Sa mafaufau faapea o ia, e faia foi e Iesu lea lava mea mo i tatou. Sa ataata o ia a o ia vaai faalemafaufau atu i le tapuaiga a le Faaola ia te ia. “Alu pea, Sose! O loo O’u iinei e fesoasoani ia te oe.”
Sa faafetai Sose i le Tama Faalelagi mo Lana fesoasoani i le tamoega i le tausinioga o le olaga. Sa ia lagonaina le pei e mafai ona ia faia soo se mea a o taputapuai mai Iesu ia te ia!
Ata na tusia e Guy Francis